ކުރިއަށްއޮތް ހޯމަދުވަހާ ހިސާބަށް މިހާރުކުރަމުންދާ ވިއްސާރަ ދެމިގެންދާނޭކަމަށް މޫސުމާބެހޭ ޤައުމީ އިދާރާ، މޯލްޑިވްސް މީޓިއޮލޮޖިކަލް ސެންޓަރުން ބުނެފިއެވެ.

މެޓް އޮފީހުން ބުނީ މިއަދުވެސް ރާއްޖޭގެ ބައެއް ހިސާބުތަކަށް ވިއްސާރަ ކުރާނޭކަމަށެވެ. މިގޮތުން އުތުރާއި މެދުރާއްޖެ ތެރެއަށް ވިއްސާރައިގެ އަސަރުކުރާނޭކަމަށް ބެލެވޭއިރު، ކުރިއަށްއޮތް 48 ގަޑިއިރަށްފަހު މޫސުން ރަނގަޅުވާނޭކަމަށް ލަފާކުރެވޭކަމަށްވެސް މެޓް އޮފީހުން ވަނީ ބުނެފައެވެ. 

ރާއްޖެއަށް މިހާރު ކުރަމުންދާ ވިއްސާރައަކީ އަވައްޓެރި ސްރީލަންކާގެ އިރުދެކުނުގައި އުފެދިފައިވާ ކޮޅިގަނޑާއި އެ ކޮޅިގަނޑާއި ގުޅިފައިވާ ލޯޕްރެޝަރ ޓްރަފްގެ ސަބަބުން ކުރަމުންދާ ވިއްސާރައެކެވެ. މޫސުމާ ބެހޭ ޤައުމީ އިދާރާއިން ލަފާކޮށްފައިވަނީ، މިމަހުގެ 5 ވަނަ ދުވަހުގެ ނިޔަލަށް ރާއްޖޭގެ ބޮޑުބަޔަކަށް ގުރުމާއެކު ބޯކޮށް ވާރޭވެހި، ވަޔާއި ކަނޑުތައް ގަދަވެ އަދި ބައެއް އަތޮޅުތަކަށް އުދަ އަރާނޭކަމަށެވެ.

Advertisement

ވޭތުވެދިޔަ 24 ގަޑިއިރު ރާއްޖޭގެ މޫސުން ހުރިގޮތަށް ބަލާއިރު، ބައެއް ރަށްތަކަށް ވަނީ ރެކޯޑް އަދަދަކަށް ވާރޭ ވެހިފައެވެ. މިގޮތުން މާލެއަށް އިއްޔެ ކުރި ވިއްސާރާގައި މަގުތަކުގައި ފެންބޮޑުވެ، ވިއްސާރައިގައި މިފަހަކަށް އައިސް ގެއްލުން ނުލިބޭވަރަށް ވަނީ ގެއްލުންވެފައެވެ. މިގޮތުން މާލެއަށް ކުރި ވިއްސާރައިގައި ފެންބޮޑުވުމުގެ ސަބަބުން 36 ގެއަކުން 226 މީހަކަށް ވަގުތީ ބޯހިޔާވަހިކަމާއި ކެއިންބުއިމުގެ އެހީތެރިކަމަށް އެދިފައިވާކަމަށް ޑިޒާސްޓާ އޮފީހުން ވަނީ ބުނެފައެވެ.

މި ވިއްސާރާގައި ބައެއް ރަށްތަކުގައި ވަރަށްބޮޑަށް ފެންބޮޑުވެ، ބައެއް ގެތަކުން މީހުން ބަދަލުކުރަން ޖެހިފައިވާކަމަށް ޑިޒާސްޓާ އޮފީހުން ވަނީ ބުނެފައެވެ. އެންމެބޮޑަށް ފެންބޮޑުވި ރަށްތަކުގެ ތެރޭގައި ހިމެނެނީ ފ.މަގޫދޫ، ކުޑަހުވަދޫ، މީދޫ، ނަރުދޫ، ކ.ގުރައިދޫ، މާމިގިނލި ހިމެނެއެވެ.