މިދިޔަ އަހަރު ނިމުނުއިރު، ޓޫރިޒަމް މާކެޓަށް ސަފާރީ 9 އުޅަނދު އިތުރުވެފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ޓޫރިޒަމް މިނިސްޓްރީން ނެރެ އާއްމުކޮށްފައިވޗާ އެންމެފަހުގެ ތަފާސްހިސާބުތަކަށް ބަލާއިރު، މިއަހަރު ނިމުނުއިރު، ޓޫރިޒަމް ވިޔަފާރީގައި 155 ސަފާރީ އޮޕަރޭޓްކުރަމުންދެއެވެ. ތަފާސްހިސާބުތައް ދައްކާގޮތުން 2023 ވަނަ އަހަރު ނިމުނުއިރު، އޮޕަރޭޓްކުރަމުންދިޔަ ސަފާރީ އުޅަނދުތަކުގެ އަދަދު ހުރީ 146 ގައެވެ. ސަފާރީ އުޅަނދުފަހަރުގެ މާކެޓަކީ، މިހާރު ރާއްޖޭގެ ޓޫރިޒަމް މާކެޓްގައި ވަރަށް ބާރަށް ކުރިއަރަމުން އަންނަ މާކެޓެކެވެ. ރާއްޖެއަށް ޑައިވްކުރުމަށް އަންނަ ގިނަ މީހުން ހިޔާރުކުރަނީ ސަފާރީ އުޅަނދުތަކެވެ.

ސަފާރީ އުޅަނދުފަހަރުން ރާއްޖޭގެ ބައިތުލް މާލަށް ލިބޭ އާމްދަނީ އަހަރުން އަހަރަށް އިތުރުވަމުންދާއިރު، ސަފާރީ އުޅަނދުތަކުން މިހާރުވެސް ޓޫރިޒަމް ޖީއެސްޓީ އާއި ގްރީން ޓެކްސްގެ ގޮތުގައި ނިސްބަތުން ރަނގަޅު އަދަދެއް ދައްކައެވެ. ފިނޭންސް މިނިސްޓްރީގެ ތަފާސްހިސާބުތަކަށް ބަލާއިރު، މިއަހަރުގެ ސެޕްޓެމްބަރުމަހުގެ ނިޔަލަށް ސަފާރީތަކުން ގްރީން ޓެކްސްގެ ގޮތުގައި 16.3 މިލިއަން ރުފިޔާ ވަނީ ލިބިފައެވެ. ދައުލަތުގެ ޓެކްސް އިދާރާގެ ތަފާސްހިސާބުތަކަށް ބަލާއިރު، 2023 ވަނަ އަހަރު އެކަނިވެސް ޓޫރިސްޓް ހިދުމަތްދޭ ސަފާރީ އުޅަނދުތަކުން ކުރި ޖުމްލަ ވިޔަފާރީގެ އަގު 736 މިލިއަން ރުފިޔާއަށް އަރައެވެ.

ރާއްޖޭގައި ސަފާރީ އުޅަނދުގެ މާކެޓް އިތުރުވަމުން އަންނައިރު ސަފާރީތަކަށް އޮތް އެންމެބޮޑު ގޮންޖެހުމަކީ އުޅަނދުތައް އަޅާނެ އެކަށީގެންވާ ބަނދަރެއް ނެތުންކަމަށް ސަފާރީތައް އޮޕަރޭޓްކުރާ ފަރާތްތަކުން ބުނެއެވެ. ސަފާރީތައް މިހާރު އަޅަން ވަގުތީގޮތުން ބޭނުންކުރަނީ ހުޅުމާލެ ފަޅުތެރެއެވެ.