މިދިޔަ އަހަރު މުޅިން އަލަށް 21 ރަށަކަށް ފެނުގެ ހިދުމަތް އަދި 4 ރަށަކަށް ނަރުދަމާގެ ހިދުމަތް ދީފައިވާކަމަށް ފެނަކަ ކޯޕަރޭޝަން ލިމިޓެޑުން ހާމަކޮށްފިއެވެ.

ފެނަކައިން ބުނީ، އެ ކުންފުނިން ޚިދުމަތް ދޭ ރަށްރަށުގައި މެދުކެނޑުމެއްނެތި ޚިދުމަތް ދިނުމަށްޓަކައި މުހިންމު މަސައްކަތްތަކެއް މިދިޔަ އަހަރު ކުރެވުނުކަމަށާއި، މާލީ ގޮންޖެހުންތަކާއެކުވެސް އައު ރަށްރަށުގައި ޚިދުމަތް ފެށުންފަދަ މުހިންމު ކަންކަން މިދިޔަ އަހަރެއް ހާ ދުވަހުގެ ތެރޭގައި ކުރެވުންކަމަށް ކުންފުނިން ވިދާޅުވެއެވެ.

ފެނަކައިން ޖުމްލަ 107 ރަށެއްގައި ފެނާއި ނަރުދަމާގެ ޚިދުމަތް ދެމުން އަންނައިރު، އެ ކުންފުނިން ބަލަހައްޓަމުން ގެންދާ 31،092 އަށްވުރެ ގިނަ ފެނުގެ ކަނެކްޝަން ގާއިމްކޮށްފައި އެބަހުއްޓެވެ. ފެނަކައިން ބުނީ މީރުފެން އުފައްދާ ނިޒާމުތަކުން ދުވާލަކު 10،661 ޓަނުގެ ފެން އުފެއްދުމުގެ ޤާބިލްކަން އެބަހުރިކަމަށެވެ. 

Advertisement

މިއާއިއެކު، މިދިޔަ އަހަރު 5 ރަށެއްގައި ދުވާލަކު 564 ޓަނުގެ ފެން އުފެއްދުމުގެ ޤާބިލްކަން އިތުރުކުރެވިފައިވާކަން ފެނަކައިން ފާހަގަކުރިއެވެ.

ރަށްރަށުގައި އަލަށް އާބާދުވާ ސަރަހައްދުތަކުގައި ޤާއިމްކުރާ އައު 360 ހައުސިން ޔުނިޓަށް އަލަށް ފެނުގެ ކެނެކްޝަން ދިނުމުގެ މަސައްކަތް ކޮށްފައިވާކަމަށާއި، އެ ކުންފުނިން 92 ރަށަކަށް ނަރުދަމާގެ ޚިދުމަތް ދެމުންގެންދިޔައިރު، ރައްޔިތުންގެ އަތުން އެއްވެސް ފީއެއް ނުނަގާކަން އެ ކޯޕަރޭޝަނުން ފާހަގަކުރިއެވެ.

ފެނަކައިން އިތުރަށް ބުނީ، އެ ކޯޕަރޭޝަނުން މުޅިން އަލަށް މިދިޔަ އަހަރު 4 ރަށަކަށް ނަރުދަމާގެ ޚިދުމަތް ދޭން ފަށާފައިވާކަމަށެވެ.