އިތުރު ލުއިތަކާއި އެކު ލޮނުފެނުން މަސް ފިނިކުރާ ނިޒާމު ގާއިމުކުރުމުގެ ލޯނަށް ހުޅުވާލުމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ނިންމައިފިއެވެ.

މިކަމާއި ގުޅޭގޮތުން ދައުލަތުގެ މީޑިއާ، ޕީއެސްއެމަށް މައުލޫމާތު ދެމުން މަސްވެރިކަމާއި ބެހޭ ވުޒާރާއިން ބުނީ، މިހާރު ކުރިއަށްދަނީ، ލޮނު ފެނުން މަސް ފިނިކުރާ ނިޒާމު، އާރްއެސްޑަބްލިއު ސިސްޓަމް ގާއިމުކުރުމަށް ދޫކުރަން ނިންމާފައިވާ ލޯން ސްކީމަށް އެދި ހުށައެޅި މީހުންގެ ތެރެއިން ޝަރުތު ހަމަވާ 19 މީހުންނާއިއެކު އެގްރީމަންޓްތަކުގައި ސޮއިކުރުމުގެ މަސައްކަތް ކަމަށެވެ. 

އެ ވުޒާރާއިން ބުނީ، އަންނަ އަންގާރަ ދުވަހު އެސްޑީއެފްސީ ޕޯޓަލް މެދުވެރިކޮށް އާރްއެސްޑަބްލިއު ފައިނޭންސިން ފެސިލިޓީއަށް އެދި ހުށަހެޅުމުގެ ފުރުސަތު ހުޅުވާލާނެ ކަމަށާއި، ބޮޑެތި ލުއިތަކަކާއި އެކު މިފަހަރު ހުޅުވާލާއިރު، އަލަށް ބަންނަ ދޯނިތަކުގައިވެސް އާރްއެސްޑަބްލިއު ސިސްޓަމް ހަރުކުރުމަށް ލޯނަށް އެދި މިފަހަރު ހުށަހެޅޭނެކަމަށެވެ.

Advertisement

މީގެ ކުރިން މަސްވެރިކަމާއި ބެހޭ ވުޒާރާއިން ފާހަގަކުރި ގޮތުގައި މިކަމުގެ ސަބަބުން، ރަނގަޅު މަސްވެރިކަމެއްގައި މަސްވެރިން އައިސް ހޯދަން ދުއްވަން ޖެހޭ ދުއްވުން ހުއްޓިގެންދާނެކަމަށާއި، އައިސްޕްލާންޓް އަޅާފައި ހުންނަ ދޯނިތަކަށް ވަގުތު ސަލާމަތްވެ، ގިނަ ވަގުތު މަސްވެރިކަމުގައި ހޭދަ ކުރެވިގެންދާނެއެވެ.

އެ ވުޒާރާއިން ބުނީ، ދޯނިތަކުގައި އައިސްޕްލާންޓް އެޅުމުން މަސް ފިނިކޮށް ގިނަ ވަގުތު ގެންގުޅެވޭނެ ކަމަށާއި، މަހުން އުފައްދާ އެކި ބާވަތްތަކުގެ ކޮލިޓީ އިތުރުވާނެ ކަމަށެވެ. ހަމައެއާއިއެކު، ރާއްޖެ އަކީ ބާނާ މަހުގެ ބޮޑުބައި އެކްސްޕޯޓްކުރާ ގައުމަކަށް ވާއިރު، މަހުގެ ކޮލިޓީ ރަނގަޅުވުމުން ބޭރުގެ ބާޒާރުތަކުން މަހަށް ރަނގަޅު އަގު ލިބުމަށް ފުރުސަތު ފަހިވެގެންދާނެ ކަމަށް އެވުޒާރާއިން ބުނެއެވެ.