އަތޮޅުތެރޭ ގޭބިސީތަކުގެ ކަރަންޓްބިލުގައި ކުނި ފީ، ހިމަނަން ނިންމި ނިންމުން ވޭސްޓް މެނޭޖްމަންޓް ކޯރޕަރޭޝަން، ވެމްކޯއިން ބާތިލްކޮށްފިއެވެ.
މިކަމާ ގުޅިގެން ވެމްކޯއިން މިއަދު ނެރުނު ބަޔާނެއްގައި ބުނީ، މިއަހަރުގެ ޖެނުއަރީމަހުން ފެށިގެން ވެމްކޯއިން އަތޮޅުތެރޭގެ ރަށްރަށުގައި ދެމުން އަންނަ ކުނިއުކައިދިނުމުގެ ހިދުމަތުގެ ފީ، ޔުޓިލިޓީ އެހެން ބިލެއްގައި ހިމެނުމަށް ނިންމި ނިންމުން، ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ލަފާފުޅުގެ މަތިން ބާތިލްކުރުމަށް ނިންމާފައިވާކަމަށެވެ.
ވެމްކޯއިން ބުނީ މިބަދަލާއެކު ކުނި އުކައިދިނުމުގެ ހިދުމަތް އަދި އެ ހިދުމަތަށް ބިލް ކުރެވޭނީ ރަޖިސްޓްރީކުރާ ފަރާތްތަކަށް އެކަނިކަމަށެވެ. މީގެ އިތުރުން ބިލްތަކަށް ފައިސާ ދެއްކުމުގެ ކަންކަން ވެމްކޯގެ އަތޮޅުތެރޭގެ ރަށްރަށުގައި ގާއިމްކޮށްފައިވާ އޮފީސްތަކުންނާއި، ވެމްކޯގެ އަވަސްޕޭ ޕޯޓަލް މެދުވެރިކޮށް އިންތިޒާމްކުރެވިފައިވާނޭކަމަށެވެ. ވެމްކޯއިން މާލެ ސަރަހައްދުގެ ގޭބިސީތަކުގެ ކުނި ފީ ނަގަމުން އަންނަނީ ކަރަންޓް ބިލުގެ ތެރޭގައި ހިމަނައިގެންނެވެ. ސްޓެލްކޯގެ ކަރަންޓް ބިލުގެ ތެރޭގައި ކުނި ފީ ހިމަނާފައިވަނީ 2023 ވަނަ އަހަރުގެ އޭޕްރިލްމަހުން ފެށިގެންނެވެ.
ވެމްކޯއިން ދަނީ މާލެ ސަރަހައްދުގެ ރަށްތަކުގެ އިތުރުންވެސް އަތޮޅުތެރޭގެ ރަށްތަކުގައި ކުނި މެނޭޖްކުރުމުގެ މަސައްކަތްކުރަމުންނެވެ. ރަށްރަށުގެ އިތުރުން ބައެއް ރިސޯޓްތަކުގެ ކުނި މެނޭޖްކުރުމުގެ މަސައްކަތްވެސް ވެމްކޯއިން އަންނަނީ ކުރަމުންނެވެ.
Advertisement
This content is created and paid for by advertisers and does not involve Voice Journalists
