އަވައްޓެރި އިންޑިއާ އަޑީގައި އޮވެ، ރައީސް ޑރ.މުއިއްޒުގެ ވެރިކަން ވައްޓާލުމަށް މަސައްކަތްކުރިކަމަށްބުނެ ނެރުނު ރިޕޯޓަކީ ކަނޑައެޅިގެން ދޮގެއްކަމަށް ހާރިޖީ ވަޒީރު ޑރ.ޢަބްދުﷲ ޚަލީލް ވިދާޅުވެއްޖެއެވެ.

އިންޑިއާއަށް މިހާރު ކުރައްވަމުން ގެންދަވާ ދަތުރުފުޅުގައި އެޤައުމުގެ ވިއޯން ނިއުސްޗެނަލަށް ދެއްވި ބަސްދީގަތުމެއްގައި، ހާރިޖީ ވަޒީރު ވިދާޅުވީ، މި ސަރުކާރު ވައްޓާލުމަށް އިންޑިއާއިން ފަންޑުކުރަން އުޅުނުކަމަށް ބުނެ، ވޮޝިންޓަން ޕޯސްޓްގައި ޝާއިއުކޮށްފައިވާ ރިޕޯޓަކީ ސައްހަ ރިޕޯޓެއް ނޫންކަމަށެވެ. ވަޒީރު ވިދާޅުވީ، އެ ރިޕޯޓްގައި ތުހުމަތުކޮށްފައިވަނީ އެއްވެސް ވަރަކަށް ހަގީގަތް އެކުލެވޭ ވާހަކަތަކެއް ނޫންކަމަށާއި، ރާއްޖެއާ އިންޑިއާ އާ ދެޤައުމުގެ ދެމެދުގައި އޮތީ އެއަށްވުރެ މާ އިތުބާރުބޮޑު މާ ގާތްބަދަހި ގުޅުމެއްކަމަށެވެ.

ދެޤައުމުގެ ދެމެދު ގުޅުން ހީނަރުކުރަން އުޅޭބަޔަކުވެސް އުޅޭނޭކަން ފާހަގަކުރައްވަމުން މިނިސްޓަރު ވިދާޅުވީ އިންޑިއާއިންވެސް އެކަން ދަންނަކަމަށެވެ. ރާއްޖެއާ އިންޑިއާ އާ ދެޤައުމުގެ ދެމެދުގައި މިއަދުވެސް އޮތީ ވަރަށް ވަރުގަދަ ގުޅުމެއްކަމަށާއި، އެހެން ޤައުމަކާ ގުޅުން ބަދަހިވުމަކުން ރާއްޖެއާ އިންޑިއާ އާ ދެޤައުމުގެ ދެމެދު އޮތް ބަދަހި ގުޅުމަށް އެއްވެސް އަސަރެއް ނުކުރާނޭ ކަމަށެވެ.

Advertisement

އިންޑިއާއިން ރައީސް ޑރ.މުހައްމަދު މުއިއްޒުގެ ވެރިކަން ވައްޓާލުމަށް ފަންޑުކުރަން އުޅުނުކަމަށް ވޮޝިންޓަން ޕޯސްޓްގައި ޝާއިއުކުރި ރިޕޯޓް ހާރިޖީ ވަޒީރު ދޮގުކުރައްވާފައިވާއިރު، ކުރީގެ ރައީސް ނަޝީދުވެސް ވަނީ އެ ވާހަކަތައް ދޮގުކުރައްވާފައެވެ. މިކަމާ ގުޅޭގޮތުން ރައީސް ނަޝީދު ވިދާޅުވީ، އަވައްޓެރި އިންޑިއާއިން ރާއްޖޭގެ ވެރިކަމުގައި ހުންނެވި ވެރިއަކު މަގާމުން ދުރުކުރުމަށް މަސައްކަތް ނުކުރާނޭކަމަށެވެ. 

ރައީސް ނަޝީދު ވިދާޅުވީ، އިންޑިއާއިން އައީ އަބަދުވެސް ދިވެހިންގެ ޑިމޮކްރަސީއަށް ތާއީދުކުރަމުން ކަމަށާއި، އެފަދަ ކަމަކަށް އިންޑިއާއިން ތާއީދެއް ނުކުރާނޭ ކަމަށެވެ. އަދި އިންޑިއާގެ ފަރާތުން ދުވަހަކުވެސް އެފަދަ ހުށަހެޅުމެއް އައިސްފައިވެސް ނުވާކަމަށެވެ. ރައީސް ޑރ.މުއިއްޒުގެ ވެރިކަން ވައްޓާލުމަށް ދުވަހަކުވެސް ބަޔަކު ރޭވިކަމުގެ މައުލޫމާތު ލިބިވަޑައިގެންފައި ނުވާކަމަށާއި، އެކަހަލަ ސީރިއަސްކަމެއް ކުރަން އުޅުނުކަން އެނގިވަޑައިގެންފައި ނުވާކަމަށްވެސް ރައީސް ނަޝީދު ވަނީ ވިދާޅުވެފައެވެ.

އެމެރިކާގެ ނޫހެއް ކަމަށްވާ ވޮޝިންގްޓަން ޕޯސްޓުގައި ބުނެފައިވަނީ، މި އަހަރުގެ ޖަނަވަރީ މަހު، އިންޑިޔާގެ އިންޓެލިޖެންސް އޭޖެންސީ އާރްއޭޑަބްލިއުގެ އޭޖެންޓުން ދިވެހިރާއްޖޭގެ އިދިކޮޅު ފަރާތްތަކާއެކު ރައީސް މުޢިއްޒުގެ ވެރިކަން ވައްޓާލުމަށް މަޝްވަރާތައް ފެށި ކަމަށް މި މަޝްވަރާތަކުގައި ބައިވެރިވި ބައެއް ފަރާތްތަކުން ބުނެފައިވާ ކަމަށެވެ. މި މަޝްވަރާތަކުގެ ތެރެއިން "ޑިމޮކްރެޓިކް ރިނިއުވަލް އިނީޝިއޭޓިވް" ގެ ނަމުގައި ޕްލޭނެއް އެކުލަވާލާފައިވާކަމަށްވެސް ބުނެފައިވެއެވެ.

މި ޕްލޭންގައި ހިމެނެނީ ރައީސް މުޢިއްޒުގެ ޕާޓީގެ މެންބަރުންވެސް ހިމެނޭ ގޮތަށް 40 މަޖިލިސް މެންބަރުންނަށް ރިޝްވަތު ދީގެން ރައީސް މުޢިއްޒުގެ މައްޗަށް އިތުބާރު ނެތް ކަމުގެ ވޯޓެއް ނެގުމަށް ކަމަށް ދަ ޕޯސްޓުގައި ބުނެފައިވެއެވެ. މީގެ އިތުރުން، 10 އިސް ސިފައިންނާއި ފުލުހުންނަށާއި، ބާރުގަދަ 3 ގޭންގަކަށް ފައިސާ ދީގެން ރައީސް މުޢިއްޒުގެ ވެރިކަން ވައްޓާލުމަށް މަގުފަހިކުރުމަށް ރޭވިކަމަށްވެސް ބުނެފައިވެއެވެ.

މި ޕްލޭން ތަންފީޒުކުރުމަށް 87 މިލިއަން ރުފިޔާ (6 މިލިއަން ޑޮލަރު) ބޭނުންވާނެކަމަށް ލަފާކޮށްފައިވާއިރު، މި ފައިސާ ހޯދާނީ އިންޑިޔާއިން ކަމަށް ދިވެހި ދެ އޮފިޝަލަކު ބުނެފައިވާކަމަށް ވޮޝިންގްޓަން ޕޯސްޓުން ހާމަކޮށްފައިވެއެވެ.