އިންޑިއާއަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ޚާރިޖީ ވަޒީރު ޑރ.އަބްދުﷲ ޚަލީލް ޔޫއޭއީއަށް ފުރާވަޑައިގެންފިއެވެ.

ޔޫއޭއީގެ ޑެޕިއުޓީ ޕްރައިމް މިނިސްޓަރ އަދި ފޮރިން މިނިސްޓަރ ޝެއިޙް އަބްދުﷲ ބިން ޒަޔެދް އަލް ނަހްޔާންގެ ދަޢުވަތަކަށް ވަޒީރު ޚަލީލް އެގައުމަށް ކުރައްވާ މި ދަތުރުފުޅުގައި އަރިހުގައި އެމްބެސެޑަރ އެޓް ލާޖް ޢަބްދުﷲ ޙަމީދާއި ޖޮއިންޓް ސެކްރެޓަރީ މަރްޔަމް ރީޝާ ބައިވެރިވެވަޑައިގަންނަވައެވެ.

ވަޒީރު ޚަލީލްގެ މި ދަތުރުފުޅުގައި ޔޫއޭއީގެ ޑެޕިއުޓީ ޕްރައިމް މިނިސްޓަރ އަދި ފޮރިން މިނިސްޓަރ ޝެއިޙް އަބްދުﷲ ބިން ޒަޔެދް އަލް ނަހްޔާން ބައްދަލުކުރެއްވުމަށް ހަމަޖެހިފައިވާއިރު، ތަފާތު ދާއިރާތަކުން ރާއްޖެ އާއި ޔޫއޭއީ ގުޅުން ބަދަހިކުރުމުގެ ފުރުޞަތުތައް ހޯދުމަށް ޔޫއޭއީ ސަރުކާރުގެ އިސްވެރިންނާ ބައްދަކުރެއްވުމަށްވެސް ވަނީ ހަމަޖެހިފައެވެ.

Advertisement

ޚާރިޖީ ވުޒާރާއިން ބުނީ، ވަޒީރު ޚަލީލްގެ މި ދަތުރުފުޅުގެ ސަބަބުން ދިވެހިރާއްޖެއާއި ޔޫއޭއީއާ ދެމެދު އޮތް ޒަމާންވީ ގުޅުން އިތުރަށް ބަދަހިވެ، ދިވެހިރާއްޖޭގެ ތަރައްޤީއަށްޓަކައި އެ ޤައުމުންވާ އެހީތެރިކަން ފާހަގަކޮށް ދެގައުމުގެ ދެމެދުގައިވާ ގުޅުން އިތުރުކުރުމަށްޓަކައި  އެކުގައި ކުރަމުންގެންދާ މަސައްކަތްތައް ހާމަވެގެންދާނެކަމަށެވެ.