ޖޭޕީ ކައުންސިލް މެންބަރު މުޙައްމަދު ފިރާޤު އަދާލަތު ޕާޓީއަށް ވެއްދި މައްސަލައެއް ފެންމަތިވެއްޖެއެވެ.
ފިރާގު އަދާލަތު ޕާޓީއަށް ވައްދާފައިވާކަން އިލެކްޝަންސް ކޮމިޝަންގެ ވެބްސައިޓުން އެނގޭ އިރު، އޭގައިވާ ގޮތުން އޭނާ އެ ޕާޓީއަށް ވައްދާފައިވަނީ، މިދިޔަ އަހަރުގެ ނޮވެމްބަރު މަހުގެ 12 ވަނަ ދުވަހުގައެވެ.
އެކަމާ ނުރުހުންވެ ފިރާގު މީސް މީޑިއާގައި ކުރި ޕޯސްޓެއްގައި ވަނީ، އަދާލަތު ޕާޓީގެ ރައީސް ޢިމްރާން އަބްދުالله ޓެގް ކުރައްވައި، އޭނާ އަދާލަތައް ވެއްދީ ކިހިނެއްތޯ ސުވާލު ކޮށްފައެވެ.
މީގެ އިތުރުން، އީސީ ޓެގްކޮށް އޭނާ ކުރި ޕޯސްޓެއްގައި ވަނީ، އޭނާ ޖޭޕީން އެހެން ޕާޓީއަކަށް ޕާޓީ ބަދަލުވުމުގެ އެއްވެސް ނިޔަތެއް ނެތްކަމަށާ އޭނާއަކީ އެޕާޓީގެ ހަރަކާތްތެރި ކައުންސިލް މެންބަރެއްކަމުގައި ބުނެފައެވެ.
އެހެންކަމުން، އޭނާއަށް ނޭނގި ޕާޓީ ބަދަލު ކުރި ގޮތް ތަޙްޤީޤުކޮށްދިނުމަށް އެދިފައެވެ. އަދި މިފަދަ ހުއްދަނެތި ކުރެވޭ ބަދަލުތަކަކީ އީސީގެ އިތުބާރަށް އުނިކަން އަންނާނެ އަދި ޕާޓީގެ މެންބަރުކަމުގެ ސަލާމަތްތެރިކަމާމެދު ސީރިއަސް ކަންބޮޑުވުންތަކެއް އުފެދޭނެ ކަމެއްކަން ފާހަގަކޮށް އޭނާ ވަނީ ޕާޓީ ބަދަލުކުރުމަށް ހުށަހެޅުނު ފޯމު ހިމެނޭ ގޮތަށް، ތަފްސީލީ ލިޔެކިޔުންތައް ބެލޭނެ ގޮތް ހަދައިދިނުމަށް އެދިފައެވެ.
Advertisement
This content is created and paid for by advertisers and does not involve Voice Journalists
