އިރުވައިމޫސުމާއި ދިމާކޮށް، ހދ.ކުޅުދުއްފުށި ކުޅިއަށް ޒިޔާރަތްކޮށްފައިވާ ގުޑުގުޑާ ދޫނިތަކަށް އުނދަގޫވާފަދަ އެއްވެސް އަމަލެއް ނުހިންގުމަށް ކުޅުދުއްފުށި ސިޓީ ކައުންސިލުން އިލްތިމާސްކޮށްފިއެވެ.

ކުޅުދުއްފުށި ސިޓީ ކައުންސިލުން ބުނީ، ބައެއް ފަރާތްތަކުން، ކުޅުދުއްފުށި ކުޅިއަށް އިރުވައި މޫސުމުގައި ޒިޔާރަތްކުރާ ގުޑުގުޑާ ދޫނިތަކާއި މާކައިރިއަށް ދިޔުމާއި، ދޫނިތަކަށް ގޯނާވާގޮތަށް ކުޅީގައި ކެނޯ ދުއްވާކަމުގެ ޝަކުވާ ގިނަ ރައްޔިތުންގެ ފަރާތުން ލިބެމުން އަންނަކަމަށެވެ.

ގުޑުގުޑާ ދޫނި ކުޅީގައި ތިބޭއިރު، ކެނޯ ދުއްވުމަކީ މަނާކަމެއްކަން ފާހަގަކޮށް، ކައުންސިލުން ބުނީ، ޑްރޯން ދުއްވާ ފަރާތްތަކުންވެސް ދޫނިތަކަށް އުނދަގޫވާފަދަ އެއްވެސް އަމަލެއް ނުހިންގުމަށް އިލްތިމާސްކުރާކަމަށެވެ.

މިއާއިއެކު، ކުޅުދުއްފުށި ސިޓީ ކައުންސިލުން ވަނީ، ކުޅީގައި ކެނޯ ދުއްވާނަމަ، ނުވަތަ ދޫނިތަކަށް އުދަނގޫވާފަދަ އަމަލުތައް 7328831 އަށް ގުޅައި ރިޕޯޓްކުރުމަށް ވެސް ވަނީ އެދިފައެވެ.

މޫސުމީ ހިޖުރަކުރާ މި ދޫނި، 2021 ވަނަ އަހަރުން ފެށިގެން ކޮންމެ އަހަރެއްގެ ވެސް އިރުވައި މޫސުމާއި ދިމާކޮށް، ކުޅުދުއްފުށީ ކުޅިން ފެނިގެންދާއިރު، މިކަމަށް އެތައް ބައެއްގެ ސަމާލުކަން ލިބެއެވެ.

ރާއްޖެއަށް ހިޖުރަކުރާ މި ފަދަ ދޫނިތަކަށް ގޯނާ ކުރުމަކީ މަނާކަމަކަށްވާއިރު، މިފަދައިން ހިމާޔަތްކޮށްފައިވާ އެއްވެސް ޖަނަވާރަކަށް ގޯނާއެއްކޮށް، ނުވަތަ އެފަދަ އަމަލެއް ހިންގައިފިނަމަ، 30،000 ރުފިޔާއާއި 50،000 ރުފިޔާއާއި ދެމެދުގެ އަދަދަކުން ޖޫރިމަނާ ކުރެވޭނެއެވެ.