ފޮރިން މިނިސްޓަރު އަބްދުالله ޚަލީލަށް ފަހު ޑިފެންސް މިނިސްޓަރު މުހައްމަދު ޣައްސާން މައުމޫން ވެސް އިންޑިއާއަށް ވަޑައިގަންނަވަން ހަމަޖެހިއްޖެއެވެ.

އިންޑިޔާގެ ވިއޯން ނޫހުން ރިޕޯޓް ކޮށްފައިވާ ގޮތުން ޣައްސާން މައުމޫންގެ މި ދަތުރުފުޅު އޮންނާނީ ޖެނުއަރީ 7 އާއި 8 ވަނަ ދުވަހުއެވެ. މިއީ ޣައްސާން  އިންޑިއާއަށް ކުރައްވާ ފުރަތަމަ ދަތުރުފުޅެވެ.

މި ދަތުރުފުޅުން ދެ ޤައުމުގެ ސަލާމަތީ ދާއިރާގެ އެއްބާރުލުން އިތުރުވެގެންދާނެ ކަމަށް، މި ދަތުރުފުޅާ ގުޅޭ ގޮތުން ވިއޯން ނޫހަށް މައުލޫމާތު ދެއްވަމުން ފޮރިން މިނިސްޓަރު ޚަލީލް ވިދާޅުވި ކަމަށް އެ ނޫހުގައިވެއެވެ.

Advertisement

ޑިފެންސް މިނިސްޓަރުގެ މި ދަތުރުފުޅަކީ ފާއިތުވި ހަފުތާތަކުގައި ރާއްޖެއިން އިންޑިއާއަށް ސަރުކާރުގެ މިނިސްޓަރުން ކުރައްވާ ތިންވަނަ ދަތުރުފުޅެވެ. މީގެ ކުރިން ފޮރިން މިނިސްޓަރާއި ފިނޭންސް މިނިސްޓަރުވެސް ވަނީ އިންޑިއާއަށް ދަތުރުފުޅު ކުރައްވާފައެވެ. މި ދަތުރުފުޅުތަކަކީ އައު އަހަރުގައި އިންޑިއާއަށް ކުރެއްވި ފުރަތަމަ މިނިސްޓަރީ ފެންވަރުގެ ދަތުރުފުޅުތަކެވެ.

މީގެ އިތުރުން، ފާއިތުވި އަހަރު ރައީސް މުޢިއްޒު ވަނީ އިންޑިއާއަށް ދެ ދަތުރުފުޅެއް ކުރައްވާފައެވެ. އޭގެ ތެރޭގައި އިންޑިއާގެ ބޮޑުވަޒީރު މޯދީގެ ހުވާ ކުރެއްވުމުގެ ރަސްމިއްޔާތަށް ވަޑައިގަތުމާއި، ދެ ޤައުމުގެ ގުޅުން ބަދަހިކުރުމަށް ކުރެއްވި ދަތުރުފުޅު ހިމެނެއެވެ.

މީގެ އިތުރުން މިދިޔަ އަހަރު އިންޑިއާގެ ފޮރިން މިނިސްޓަރު ޑރ. ޖައިޝަންކަރުވެސް ވަނީ ރާއްޖެއަށް ވަޑައިގެންފައެވެ. އަދި އިންޑިއާގެ ބޮޑުވަޒީރު މޯދީ ރާއްޖެއަށް ވަޑައިގަތުމަށް ދަޢުވަތު އެރުވިފައިވާކަންވެސް ފާހަގަކޮށްލަންޖެހެއެވެ.