އާސަންދައިގެ ދަށުން ބޭސްސިޓީއަށް ބޭސް ލިބުމުގައި ރައްޔިތެއްގެ ޝަކުވާއެއް އޮތްނަމަ އެކަން ރިޕޯޓްކުރުމަށް އާސަންދަ ކުންފުނިން އެދިއްޖެއެވެ.
އާސަންދައިން ބޭސްލިބުމުގައި ދަތިތަކެއް ހުންނަކަމަށް ބުނެ ބައެއް ފަރާތްތަކުން ދަނީ ސޯޝަލް މީޑިއާގައި ޝަކުވާކުރަމުންނެވެ. މިކަމާ ގުޅިގެން އާސަންދަ ކުންފުނިން މިއަދު އާއްމުކުރި އިއުލާނެއްގައި ބުނީ، އާސަންދަ ސްކީމުގެ ދަށުން ބޭސް ނަގާއިރު، އަމިއްލަ އަތުން ފައިސާ ދައްކަން ޖެހިއްޖެނަމަ، ނުވަތަ ބޭހެއް ނުލިބިއްޖެނަމަ ޝަކުވާ ހުށަހެޅުމަށެވެ. ޝަކުވާ ހުށަހަޅަން ޖެހެނީ އާސަންދަ ޝިކާވަތި ޗެޓްލައިން (7951400) ނަމްބަރަށް ވައިބާ މެދުވެރިކޮށެވެ.
ރިޕޯޓްކުރާއިރު، ބޭސް ސިޓީ އަދި ބޭހުގެ ރަޝީދު ފޮނުވުމަށް އާސަންދައިން އިލްތިމާސްކުރެއެވެ. އާސަންދައިގެ ހިދުމަތަކީ ރައްޔިތުންނާ އެްމެ ގުޅުންބޮޑު އެއް ހިދުމަތެވެ. އާސަންދަ ނިޒާމާމެދު ރައްޔިތުންގެ އިތުބާރު ބޮޑުވާނޭކަމަށް އެ ހިދުމަތް ފަރުމާކުރުމަކީ، ހާއްސަ އިސްކަމެއްދޭ ކަމެއްކަމަށް ސަރުކާރުން ވަނީ ބުނެފައެވެ.
އާސަންދައިގެ ދަށުން ދެމުންދާ ހިދުމަތްތައް ހަރުދަނާކުރުމަށް ސަރުކާރުން ފިޔަވަޅުތަކެއް އަޅަމުން އަންނައިރު، ސަރުކާރުން މިހާރުވެސް ވަނީ އާސަންދައިގެ ދަށުން ވިއްކަމުން އަންނަ 250 ބޭހެއްގެ އަގު ކޮންޓްރޯލްކޮށްފައެވެ. ދައުލަތުގެ ބައިތުލްމާލުން ކުރަމުން އަންނަ ހޭދައިގެ ތެރެއިން އާސަންދައިގެ ދަށުން އެންމެބޮޑު ހޭދައެއް ކުރަނީ ބޭހަށެވެ. މީގެކުރިން ބޭސްސިޓީ ހިފައިގެން އާސަންދައިގެ ދަށުން ބޭސްނަގަން ދިޔަނަމަވެސް މިހާރު ބޭސް ދޫކުރަނީ ކުރިއަށްވުރެ ރަނގަޅަށް މޮނިޓަރކުރެވޭ އުސޫލެއްގެ ތެރެއިންނެވެ.
Advertisement
This content is created and paid for by advertisers and does not involve Voice Journalists
