ކުރިއަށްއޮތް ރައްޔިތުންގެ މަޖިލީހުގެ ދައުރު ފެށޭތަނުން އަންހެނުން ކޮމިޓީ މެމްބަރުންނަށް ރޯދަ އެލަވަންސް އާއި އެހެނިހެން އިނާޔަތްތައް ލިބިދޭ އިސްލާހު ހުށަހަޅުއްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު ވަނީ ކުރިއަށްއޮތް ރަމަޟާންމަހުން ފެށިގެން އަންހެނުންގެ ތަރައްޤީއަށް މަސައްކަތްކުރާ ކޮމިޓީ (ޑަބްލިއުޑީސީ)ގެ މެމްބަރުންނަށް ރޯދަ އިނާޔާތް ލިބިގެންދާނޭކަމަށް މިދިޔަ ޑިސެމްބަރުމަހުގެ ތެރޭގައި ދަނގެއްޗަށް ވަޑައިގެން ބޭއްވި ޖަލްސާގައި ވިދާޅުވެފައެވެ.
ރައީސް ޑރ.މުއިއްޒު ގދ.ވާދޫއަށް ކުރެއްވި ޒިޔާރަތުގައި މިއަދު އެރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވިދާޅުވީ، މަޖިލީހުގެ ދެން އަންނަ ދައުރު ފެށޭތަނުން ފުރަތަމަ ހަފްތާގެ ތެރޭގައި އަންހެނުންގެ ތަރައްޤީއަށް މަސައްކަތްކުރާ މެމްބަރުންނަށް ދިނުމަށް ވައުދުވި އިނާޔަތްތައް ދިނުމާ ގުޅޭ އިސްލާހު ހުށަހެޅުމަށް މަސައްކަތްކުރަމުންދާކަމަށެވެ.
އެއީ ލާމަރުކަޒީ ޤާނޫނާއި ވަޒީފާއާ ބެހޭ ޤާނޫނަށް ގެންނަންޖެހޭ ދެ އިސްލާހެއް. މިހާރު އެ ލިބޭ އެލަވަންސަށް މުސާރައިގެ ސްޓޭޓަސް ދެނީ. އެލަވަންސް ބޮޑުކުރާ ވާހަކައެއްނޫން. އެލަވަންސެއްގެ ގޮތުގައި އޮވެގެންނެއް ރޯދަމަހުގެ އެލަވަންސެއް ނުދޭ މިހާތަނަކަށް. ބޭންކުން ލޯނެއް ނުނެގޭ.ވިހެއުމުގެ ޗުއްޓީއެއް ނުލިބޭ. މިކަހަލަ އެއްވެސް ކަމެއް ނުވޭ
ރައީސް ޑރ.މުއިއްޒު ވިދާޅުވިއެވެ.
ރައީސް ވިދާޅުވީ މިދިޔަ އަހަރުތަކުގެ ތެރޭގައި ރަށްރަށުގެ އަންހެނން ކޮމިޓީތަކާ ބައްދަލުކުރިއިރު، އެ ކޮމިޓީތަކުގެ އެންމެބޮޑު ޝަކުވާއަކީ އެއީކަމަށާއި، އެކަންކުރަން ވައުދުވާން ޖެހުނީ އެ ސަބަބަށްޓަކައި ކަމަށެވެ. ރައީސް ވިދާޅުވީ މަޖިލީހުގެ ތެރެއިން އެ ދެޤާނޫނަށް އިސްލާހުތައް ގެނެސް އަންހެނުންގެ ކޮމިޓީތަކަށް ވީ ވައުދު ފުއްދަވައިދެއްވާނޭކަމަށެވެ. މިގޮތުން މި ފެށޭ ރޯދަމަހު އަންހެނުން ކޮމިޓީތަކުގެ މެމްބަރުންނަށް ރޯދަ އެލަވަންސް ދޭނޭކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.
ދަނގެއްޗަށް ވަޑައިގެން ރައީސް އެދުވަހު ދެއްކެވި ވާހަކަފުޅުތަކުގައި ވަނީ، އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަކީ ވަރަށް ބޭއިންސާފުގޮތަކަށް ގާނޫނުގައި އޮންނަ ޕޮއިންޓެއް ނަގައިގެން ވަރަށް ނިކަމެތިގޮތެއް ހަދާފައި އޮންނަ ކޮމިޓީތަކެއް ކަމަށް ވިދާޅުވެފައެވެ.
ކޮންމެ ރަށެއްގައިވެސް އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަކީ އެރަށެއްގެ ތަރައްޤީއަށް ވަރަށް މުހިއްމު ދައުރެއް އަދާކުރާ ކޮމިޓީއެއްކަން ފާހަގަކުރައްވަމުން ރައީސް ޑރ.މުއިއްޒު ވިދާޅުވީ، އެފަދަ ކޮމިޓީތަކަށް ދިމާވެފައިވާ ވަރަށް ގިނަ ކަންކަން ޤާނޫނު ހަދާ މަޖިލީހުގެ ތެރެއިން ރަނގަޅު ކޮށްދެއްވާނޭކަމަށެވެ.
މި ސަރުކާރުން ރާއްޖޭގެ އިގްތިސާދު ރަނގަޅުކުރުމަށް ފިޔަވަޅުތައް އަޅަމުންދަނީ، ރައްޔިތުންނަށް ދެމުންގެންދާ އެއްވެސް އެއްޗެއް އުނި ނުކޮށް އަދި ފައިސާވެސް ޗާޕުނުކޮށްކަމަށް ރައީސް ޑރ.މުއިއްޒު ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
