ޗުއްޓީގައި އޮތް ރައްޔިތުންގެ މަޖިލީހުގެ މިއަހަރުގެ ތިންވަނަ ދައުރުގެ ޖަލްސާތައް އަންނަ ހޯމަ ދުވަހު ފެށުމަށް ތާވަލުކޮށްފިއެވެ.
މަޖިލީހުން ޢާންމުކޮށްފައިވާ އެޖެންޑާއަށް ބަލާއިރު ތިންވަނަ ދައުރުގެ ފުރަތަމަ ޖަލްސާގައި މަޖިލީހުގެ ރައީސްގެ މޭޒުން ދެ ކަމެއް ހުށަހެޅުމަށް ވަނީ ހަމަޖެހިފައެވެ.
އެގޮތުން މީރާގެ ޑެޕިއުޓީ ކޮމިޝަނަރ ޖެނެރަލް އޮފް ޓެކްސޭޝަންގެ މަޤާމަށް ބޭފުޅަކު ޢައްޔަނުކުރެއްވުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލައާއި، "މައްކަތުލް މުކައްރަމާ ކޮންވެންޝަން އޮފް ދަ މެންބަރ ސްޓޭޓްސް އޮފް ދަ އޯގަނައިޒޭޝަން އޮފް އިސްލާމިކް ކޯޕަރޭޝަން އޮން އެންޓި-ކޮރަޕްޝަން ލޯ އެންފޯސްމަންޓް ކޯޕަރޭޝަން" މުޢާހަދާގައި ބައިވެރިވުމާ ގުޅޭ ގޮތުން މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ހުށަހަޅުއްވާފައިވާ މައްސަލަ ހުށަހަޅާނެ ކަމަށް އެޖެންޑާގައިވެއެވެ.
މީގެ އިތުރުން ސަރުކާރުން ހުށަހަޅާފައިވާ ކުށްކޮށްގެން ހޯދާ މުދަލާ ގުޅޭ ބިލުގެ އިބްތިދާޢީ ބަހުސް ވެސް އެ ޖަލްސާގައި ފެށުމަށް ވަނީ ތާވަލްކޮށްފައެވެ.
މަޖިލީހުގެ ޤަވާއިދު ބުނާ ގޮތުން ކޮންމެ އަހަރެއްގެ ޖަލްސާތައް ކުރިއަށް ގެންދާނީ ތިން ދައުރަކަށް ބަހާލައިގެންނެވެ. ފެބްރުއަރީ އެކަކުން މެއި 15 އަށް ފުރަތަމަ ދައުރު ޖޫން އެކަކުން އޮގަސްޓް 15 އަށް ދެވަނަ ދައުރު އަދި އޮކްޓޫބަރު އެކަކުން ނޮވެމްބަރު ނިޔަލަށް ތިންވަނަ ދައުރު ކުރިއަށްދާނެ ކަމަށް ޤަވާއިދުގައި ބަޔާންކޮށްފައިވެއެވެ.
ދެވަނަ ދައުރުގެ ޖަލްސާތައް ނިންމާލައި މަޖިލީހުން ޗުއްޓީއަށް ދިޔައީ މިދިޔަ އޮގަސްޓް މަހުގެ 26 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
