ޔުނައިޓެޑް އަރަބް އެމިރޭޓްސް (ޔޫއޭއީ) ގެ ދުބާއިން ފުރައިގެން އިސްރާއީލުގެ ތެލް އަވީވަށް ދަތުރުކުރި ފްލައިޑުބާއީގެ ފްލައިޓް އެފްޒެޑް1073 (FZ1073) ގައި ކޮކްޕިޓް ތެރޭގައި ހިނގި ހަމަނުޖެހުމަކާ ގުޅިގެން ކުއްލި ހާލަތުގައި ސައޫދީ އަރަބިއްޔާގެ ތަބޫކް އެއާޕޯޓަށް ޖައްސަން ޖެހުނު ހާދިސާ، އިސްރާއީލުން ސިޔާސީ ހަތިޔާރަކަށް ހަދައި ބޮޑެތި ދޮގުތަކެއް ފަތުރަން ފަށައިފިއެވެ.

ބުދަ ދުވަހު ހިނގި މި ހާދިސާގައި، ފްލައިޓް ދުބާއިން ފުރިތާ ގާތްގަނޑަކަށް ދެ ގަޑިއިރާއި ބައި ފަހުން، އުރުދުންގެ ވައިގެ ސަރަހައްދުން ދަތުރުކުރަނިކޮށް ކޮކްޕިޓް ތެރޭގައި ދެ ޕައިލެޓުންގެ ދެމެދުގައި ހަމަނުޖެހުމެއް ހިނގައި ވަޅިން ހަމަލާދިން ކަމަށް ރިޕޯޓްތައް ބުނެއެވެ. މި ހަމަނުޖެހުމުގެ ތެރޭގައި ބޯޓު ވަނީ 30 ސިކުންތުގެ ތެރޭގައި 14،000 ފޫޓަށް ތިރިއަށް ވެއްޓިފައެވެ.

ފްލައިޓްރާޑާ24 ގެ މައުލޫމާތު ދައްކާގޮތުން ޖީއެމްޓީން 05:31 ގައި އިމަޖެންސީ ކޯޑު 7700 އަދި 05:38 ގައި ޣައިރުގާނޫނީ ނުފޫޒެއް ފޯރުވިކަން އަންގައިދޭ ކޯޑު 7500 ސިގްނަލް ވަނީ ފޮނުވާފައެވެ. ބޯޓު ތަބޫކް އެއާޕޯޓަށް ޖެއްސީ 06:45 ގައެވެ.

މި ހާދިސާގައި ޒަޚަމްވި ކެޕްޓަނަކީ އިންޑިއާގެ ރައްޔިތެއް ކަމަށްވާ ސްމިތު މަޗާރ ކަމަށާއި އޭނާގެ ހާލު މިހާރު ސްޓޭބަލް ކަމަށް އިންޑިއާ އެމްބަސީން ވަނީ ބުނެފައެވެ

މި ހާދިސާގެ އެއްވެސް ރަސްމީ ތަހުގީގެއް ނުނިމެނީސް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ޑިފެންސް މިނިސްޓަރު އިސްރާއީލް ކަޓްޒް ވަނީ މިއީ "ޖިހާދީ ޓެރަރިސްޓް ހަމަލާއެއް" ކަމަށާއި އީރާނުގެ އަތެއް ވޭތޯ ބަލާނެ ކަމަށް ބުނެ ވާހަކަ ދައްކަން ފަށާފައެވެ. އަދި ހަމަލާދިން ޕައިލެޓަކީ އޮމާން މީހެއް ކަމަށާއި އޭނާ "الله އަކްބަރު" ގޮވި ކަމަށް ބުނެ ދޮގު ވާހަކަތައް އިސްރާއީލުގެ އޮފިޝަލުން މީޑިއާއަށް ދޫކޮށްލިއެވެ.

ނަމަވެސް، ފްލައިޑުބާއީ އިން ބުނެފައިވަނީ މިއީ އަދި ތަހުގީގު ކުރެވެމުންދާ ހާދިސާއެއް ކަމަށާއި، ހަގީގަތް ހޯދުމުގެ ކުރިން ދޮގު ވާހަކަތައް ނުފެތުރުމަށް އެދޭ ކަމަށެވެ. އަދި ޔޫއޭއީގެ އެޓާނީ ޖެނެރަލް ހަމަދު ސައިފް އަލް-ޝަމްސީ ވަނީ މިކަމުގެ ފުރިހަމަ ތަހުގީގެއް ހިންގުމަށް އަމުރުކުރައްވާފައެވެ.

މި ހާދިސާއަކީ އިސްރާއީލުން ރާވައިގެން ހިންގި "ފޯލްސް ފްލެގް"  ނުވަތަ ހަގީގަތް އޮޅުވާލައި ސިޔާސީ މަންފާއެއް ހޯދުމަށް އަމިއްލައަށް އުފައްދާ ޑްރާމާއެއް ކަމަށް ގިނަ ފަރާތްތަކަކުން ތުހުމަތުކުރަނީ ސަބަބުތަކެއް ހުރުމުންނެވެ؛

ކޮކްޕިޓްގެ ސަލާމަތީ ކަންކަން: 9/11 ހާދިސާގެ ފަހުން ކޮކްޕިޓް ދޮރުތަކަކީ ބޭރުން ނުވަދެވޭ ގޮތަށް ބަންދުކުރެވިފައި ހުންނަ ދޮރުތަކެކެވެ. އެހެން ކަމަށް ވާނަމަ އިސްރާއީލުން ފަސިންޖަރުން ދޮރު ހަލާކުކޮށްލައިގެން ވަން ކަމަށް ބުނާ ބުނުމަކީ ގަބޫލުކުރެވޭނެ ކަމެއް ނޫނެވެ.

ދެވަނަ ވާހަކައަކަށް ޕައިލެޓް ފައިން ދޮރު ހުޅުވި ކަމަށް ބުނި ބުނުމަކީ ވެސް ހެއްވާ ވާހަކައެކެވެ. މީގެ އިތުރުން ޕައިލެޓުންގެ ސެކިއުރިޓީ ޗެކިން ފޫއަޅުވާލައި ތޫނު ހަތިޔާރު ވެއްދި ގޮތަކާ މެދު ސުވާލު އުފެދެއެވެ. އަދި އޮމާނާއި އިސްރާއީލާ ދެމެދު ސިޔާސީ ގުޅުމެއް ނޯންނައިރު އެ ގައުމުގެ ރައްޔިތަކު އިސްރާއީލަށް ދާ ފްލައިޓެއް ދުއްވަން ހުރުމަކީ ވެސް ސުވާލު އުފެދޭ ކަމެކެވެ.

އޮކްސިޖަން މާސްކް ނޭޅުން: 14،000 ފޫޓަށް މިހާ ކުޑަ ވަގުތުކޮޅެއްގެ ތެރޭގައި ތިރިވުމުން އޮޓޮމެޓިކުން ފަސިންޖަރުންގެ އޮކްސިޖަން މާސްކްތައް ވެއްޓެން ޖެހޭނެއެވެ. ނަމަވެސް ބޯޓު ތެރެއިން އާންމުވި ވީޑިއޯތަކުން އެފަދަ އެއްވެސް މަންޒަރެއް ނުފެނެއެވެ.

އިތުރު ޕައިލެޓުން ތިބުން: ކުރު ރީޖަނަލް ފްލައިޓެއްގައި، ކުއްލިއަކަށް އިތުރު ދެ ޕައިލެޓުން "މުއުޖިޒާތެއް ފަދައިން" ތިބެން ޖެހުނު ސަބަބަކީ ބޮޑު ސުވާލެކެވެ.

ވަގުތާއި ސިޔާސީ ހާލަތު: މިދިޔަ އާދީއްތަ ދުވަހު ނަތަންޔާހޫ ސިއްރިއްޔާތުގައި މޮސާޑުގެ ވެރިޔާއާއެކު ޔޫއޭއީއަށް ދިޔައެވެ. އަންގާރަ ދުވަހު، އިންތިޚާބު ކައިރިވެފައި ވަނިކޮށް ދުޝްމަނުން ހަމަލާއެއް ދީފާނެ ކަމުގެ އިންޒާރު ދިނެވެ. އަދި ޖެހިގެން އައި ބުދަ ދުވަހު މި ހާދިސާ ހިނގުމަކީ ރޭވިގެން ހިނގި ކަމެއް ކަމަށް ބެލެވެއެވެ.

ޣައްޒާގައި އިސްރާއީލުން ހިންގަމުންދާ ގަތުލުއާންމުތަކާއި ހަނގުރާމައިގެ ޖަރީމާތަކުގެ ސަބަބުން ބައިނަލްއަގުވާމީ ދުނިޔޭގައި އެ ޖަމާއަތުގެ އަގު ވަނީ މުޅިން ވެއްޓިފައެވެ. އަދި އެތެރޭގެ އިންތިޚާބާއި ސިޔާސީ ޕްރެޝަރުތައް ބޮޑުވެފައިވާ ދަނޑިވަޅެއްގައި، މުޅި ދުނިޔޭގެ ސަމާލުކަން ޣައްޒާގެ ގަތުލުއާންމުން އެހެން ދިމާއަކަށް އަނބުރާލައި، އިސްރާއީލަކީ "ވިކްޓިމް" އެއް ނުވަތަ އަނިޔާ ލިބޭ ބައެއްގެ ގޮތުގައި ދައްކައި ހަމްދަރުދީ ހޯދުމަކީ އިސްރާއީލުން އަބަދުވެސް ބޭނުންކުރާ އުކުޅެކެވެ.

ނޫސްވެރިޔާ ޝީރީން އަބޫ އާގިލާގެ މަރުގައި ވެސް ފުރަތަމަ ފަލަސްތީނު މީހުންގެ ބޮލުގައި އަޅުވައި، ފަހުން އެއީ އިސްރާއީލު ސިފައިން ކަމަށް އެއްބަސްވި ފަދައިން، މި ހާދިސާއަކީ ވެސް ސިޔާސީ ފައިދާއަށްޓަކައި ހަދާފައިވާ ބޮޑު ދޮގު ވާހަކައެއް ކަން ދަނީ ހާމަވަމުންނެވެ.