ދިވެހިރާއްޖޭގައި ދެވަނަ ޙިއްޞާގެ ބާޒާރެއް ޤާއިމުކުރުމުގެ ބޭނުމުގައި ސައްތައިން ސައްތަ ސަރުކާރު ހިއްސާވާ ކުންފުންޏެއް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އުފައްދަވައިފިއެވެ.

"ނޭޝަނަލް އެކްސްޗޭންޖް ލިމިޓެޑް" ގެ ނަމުގައި މި ކުންފުނި އުފައްދަވާފައިވަނީ ކުންފުނީގެ ޤާނޫނު (ޤާނޫނު ނަންބަރު 2023/7) ގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިވަޑައިގަންނަވާ ބާރުގެ ދަށުން ނަންބަރު 2026/16 ޤަރާރު މެދުވެރިކޮށެވެ.

ރައީސް އޮފީހުން ބުނިގޮތުގައި ސަރުކާރުގެ މާލީ ބޭނުންތަކާއި އިސްލާމީ މާލީ ދާއިރާ ފުޅާވަމުންދާ މި ދަނޑިވަޅުގައި ސަރުކާރުގެ އެހީތެރިކަމާ އެކު ހިންގާ ދެވަނަ ޙިއްޞާގެ ބާޒާރެއް ކުރިއަށް ގެންދިޔުމަކީ މި ކުންފުނީގެ އަސާސީ މަޤުޞަދެވެ.

މި ކުންފުނީގެ ޒިންމާތަކުގެ ތެރޭގައި ރާއްޖޭގެ ކެޕިޓަލް މާކެޓު ކުރިއަރުވައި އެ ބާޒާރުގެ އިތުބާރާއި ދެފުށް ފެންނަ މިންވަރު ރަނގަޅުކުރުން ހިމެނެއެވެ. ހަމައެހެންމެ ޒަމާނީ ސެކިއުރިޓީޒް އެކްސްޗޭންޖްތަކާއި ޓްރޭޑިންގ ފެސިލިޓީތައް ޤާއިމުކޮށް ހިންގުމާއި ދައުލަތުގެ ސެކިއުރިޓީޒް އާއި އިސްލާމީ ޝަރީޢާގެ ހަމަތަކަށް ފެތޭ ސުކޫކާއި އެ ނޫން ވެސް މާލީ ވަސީލަތްތައް ނެރެ ލިސްޓުކޮށް މުޢާމަލާތުކުރެވޭނެ މަގު ތަނަވަސްކުރުން ވެސް އެ ކުންފުނީގެ މަސައްކަތްތަކުގެ ތެރޭގައި ހިމެނެއެވެ.

މީގެ އިތުރުން ސެންޓްރަލް ސެކިއުރިޓީޒް ޑިޕޮސިޓަރީ އާއި ކްލިއަރިންގ އަދި ސެޓްލްމަންޓުގެ ޒަމާނީ ޕޯސްޓް-ޓްރޭޑް ޚިދުމަތްތައް ފޯރުކޮށްދިނުމަކީ ވެސް އެ ކުންފުނީގެ މަޤުޞަދެކެވެ. ރާއްޖެ އާއި ރާއްޖެއިން ބޭރުގެ މާލީ މުއައްސަސާތަކާ ގުޅިގެން ހަރުދަނާ އަދި ދެމެހެއްޓެނިވި މާލީ ބާޒާރެއް ރާއްޖޭގައި ބިނާކުރުމަކީ ވެސް އެ ކުންފުނިން ހާސިލުކުރުމަށް ކަނޑައަޅާފައިވާ ލަނޑުދަނޑިއެކެވެ.