މިއަދު ތައާރަފުކުރި މޯލްޑިވްސް ގެސްޓް އިންފޮމޭޝަން ސިސްޓަމް (އެމް.ޖީ.އައި.އެސް) އަކީ ރާއްޖެއަށް އަންނަ ފަތުރުވެރިންގެ މައުލޫމާތު އެއް ވިއުގައަކުން ލިބި، ދައުލަތުގެ މާލީ އިދާރާތަކާ ގުޅުވައިދޭ ވަރަށް މުހިންމު ވަސީލަތެއްކަމަށް މިނިސްޓަރ އޮފް ފިނޭންސް އެންޑް ޕަބްލިކް އެންޓަޕްރައިޒަސް ޙަސަން ޒަރީރު ވިދާޅުވެއްޖެއެވެ.
ވަޒީރު މިހެން ވިދާޅުވީ މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން މި ސިސްޓަމް ތައާރަފުކުރުމަށް ބޭއްވި ރަސްމިއްޔާތު ޝަރަފްވެރިކޮށްދެއްވައި ވާހަކަފުޅު ދައްކަވަމުންނެވެ. އެމް.ޖީ.އައި.އެސް އަކީ ރާއްޖެއަށް ޒިޔާރަތްކުރާ ފަތުރުވެރިންގެ މަޢުލޫމާތު އެއްވިއުގައަކުން ގުޅާލާ، ދައުލަތުގެ މާލީ އިދާރާތަކާ ސީދާ ގުޅުވައިދޭ މަރުކަޒީ ނިޒާމެކެވެ.
ފަތުރުވެރިކަމަކީ ރާއްޖޭގެ އިޤްތިޞާދުގެ މައި ސިނާއަތަށް ވުމާއެކު، މި ދާއިރާގެ މަޢުލޫމާތަކީ ސަރުކާރާއި ދައުލަތުގެ ގިނަ އިދާރާތަކަކުން ބޭނުންކުރާ މަޢުލޫމާތެކެވެ. އަދި މިސިސްޓަމްގެ ސަބަބުން މި މައުލޫމާތުތައް ބަލަހައްޓާ ދައުލަތުގެ ކަމާބެހޭ މުއައްސަސާތަކުން ކުރާ މަސައްކަތްތަކަށް ބޮޑު ލުޔެއް ލިބިގެންދާނެ ކަމަށް ވަޒީރުފާހަގަކުރެއްވިއެވެ.
ވަޒީރު ވިދާޅުވީ، މި ސިސްޓަމް ތައާރަފުކުރުމަކީ ޒަމާނީ ޓެކްނޮލޮޖީގެ އެހީގައި ދައުލަތް ހިންގުން ހަރުދަނާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ މޯލްޑިވްސް 2.0 ގެ ޑިޖިޓަލް ތަޞައްވުރުގެ ދަށުން ހާސިލުކުރެވުނު މުހިންމު ލަނޑުދަނޑިއެއް ކަމަށެވެ. މީގެ އިތުރުން މީރާގެ ޑިޖިޓަލް ޓްރާންސްފޯމޭޝަން ރޯޑްމެޕްގައި ހިމެނޭ ރިޕޯޓިންގ އޮޓޮމޭޓްކުރުމުގެ ލަނޑުދަނޑި ހާސިލުކުރުމަށް އެމް.ޖީ.އައި.އެސް އަކީ ލިބުނު ބޮޑު ކުރިއެރުމެއްކަން ފާހަގަކުރައްވާ ވަޒީރު ވިދާޅުވީ މިސިސްޓަމްގެ ސަބަބުން މީރާގެ މަސައްކަތްތަކަށްވެސް ކުރިއެރުންތައް އަންނަތަންފެނިގެންދާނެކަމަށެވެ.
އަދި މީރާއަކީ އެފޯޓްލެސް ޓެކްސް ނިޒާމެއް ގާއިމުކުރުމަށް މަސައްކަތްކުރާ މުއައްސަސާއެއްގެ ގޮތުގައި ދެމިއޮތުމަށް މިނިސްޓަރ އިލްތިމާސްކުރައްވައި ވިދާޅުވީ ޑިޖިޓަލައިޒޭޝަންގެ މަސައްކަތުގައި މީރާ ވާންވާނީ އެންމެ ކުރީގައި އޮންނަ މުއައްސަސާކަމުގައެވެ.
މި ސިސްޓަމްގެ ސަބަބުން ފަތުރުވެރިކަމުގެ ދާއިރާގައި ހަރަކާތްތެރިވާ ވިޔަފާރިތަކަށް ބޮޑެތި ފައިދާތަކެއް ކުރާނެ ކަމަށް ވަޒީރު ވިދާޅުވިއެވެ. ޚާއްޞަކޮށް އަމިއްލަ ޕްރޮޕަޓީ މެނޭޖްމަންޓް ސިސްޓަމްއެއް ނެތް ގެސްޓްހައުސްތަކާއި ވިޔަފާރިތަކަށް، ފަތުރުވެރިންގެ މަޢުލޫމާތު ބެލެހެއްޓުމަށް މި ފުރިހަމަ ޕްލެޓްފޯމަކީ ބޮޑު އެހީއަކަށް ވާނެ ކަމަށް ވިދާޅުވިއެވެ.
މިފަދަ ފުރިހަމަ ނިޒާމެއް ކުރު މުއްދަތެއްގެ ތެރޭގައި ގާއިމުކުރެވުނީ ކަމާގުޅޭ މުއައްސަސާތަކުގެ އެއްބާރުލުން ވަރަށް ބޮޑަށް ލިބިގެން ކަމަށާއި އަދި ވަކިން ޚާއްސަކޮށް ކޮންޓްރޯލަރ ޖެނެރަލް އޮފް އިމިގްރޭޝަން، ކޮމިޝަނަރ އޮފް ޕޮލިސް (ރިޓަޔަރޑް) އަޙުމަދު ފަސީޙް ފޯރުކޮށްދެއްވި ފުރިހަމަ އެއްބާރުލުން ފާހަގަކުރައްވައި ވަޒީރު ވަނީ ޝުކުރުއަދާކުރައްވާފައެވެ. އަދި މި ވިއުގަ ފަރުމާކުރުމާއި ގާއިމުކުރުމުގައި މީރާގެ މުވައްޒަފުން ކުރެއްވި ފަންނީ އަދި އިޚްލާޞްތެރި މަސައްކަތްތަކަށް ވަޒީރު ތައުރީފުކުރެއްވިއެވެ.
Advertisement
This content is created and paid for by advertisers and does not involve Voice Journalists
