އާބާދީގައި ބައި މިލިއަނެއްހާ މީހުން ދިރިއުޅޭ ކުޑަކުޑަ ދިވެހިރާއްޖެއިން އެތައް ބިލިއަން ޑޮލަރެއްގެ ބިޔަ އިންވެސްޓްމަންޓެއް ގެނައިރު، އެއަށްވުރެ މާ ބޮޑު އިޤްތިޞާދަކާއި ވަސީލަތްތައް ހުރި ސްރީލަންކާއަށް އެފަދަ އިންވެސްޓްމަންޓްތައް ނުގެނެވޭތީ އެ ޤައުމުގެ އިޤްތިޞާދީ ސިޔާސަތުތަކަށް ނޫސްވެރިންގެ ފާޑުކިޔުން އަމާޒުވެއްޖެއެވެ.

މި ބަހުސް ހޫނުވެފައިވަނީ، ޔޫއޭއީގެ މަޝްހޫރު އީގަލް ހިލްސް ކުންފުންޏާއެކު ރަސްމާލޭގައި ތަރައްޤީކުރާ "ވޯޓާފްރަންޓް އެންޑް މެރީނާ" މަޝްރޫޢުގެ ވިޔަފާރި އެއްބަސްވުމުގައި ދިވެހި ސަރުކާރުން ސޮއިކުރުމާ ގުޅިގެންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ މި މަޝްރޫޢުގެ އެއްބަސްވުމުގައި މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުالله މުއްޠަލިބު އަދި އީގަލް ހިލްސްގެ ޗެއާމަން މުޙައްމަދު އަލާއްބާރު ސޮއިކުރައްވާފައިވާއިރު، މި މަޝްރޫޢުގެ އެކި ފިޔަވަހިތަކުގެ އަންދާޒާ އަގު 20 ބިލިއަން ޑޮލަރުގެ އަދަދަކަށް އަރައެވެ. މި މަޝްރޫޢުން 54،000 އަށް ވުރެ ގިނަ ވަޒީފާ އުފެދި، އަހަރަކު 2 ބިލިއަން ޑޮލަރުގެ ފަތުރުވެރިކަމުގެ އާމްދަނީއެއް ލިބޭނެ ކަމަށް ސަރުކާރުން ލަފާކުރެއެވެ.

އީގަލް ހިލްސްއާއެކު ރަސްމާލެ މަޝްރޫޢުގައި ސޮއި ކުރުން-

ލަންކާގެ އިޤްތިޞާދީ މާހިރުން ފާހަގަކުރާ ގޮތުގައި، ލަންކާއަކީ 20 މިލިއަނަށް ވުރެ ބޮޑު އާބާދީއަކާއި، އިންޑިއާ ކައިރީގައި އޮތް ސްޓްރެޓީޖިކް ލޮކޭޝަނަކާއި، ބޮޑެތި ބަނދަރުތަކާއި، މެނުފެކްޗަރިން އަދި ފަތުރުވެރިކަމުގެ މުއްސަނދި ވަސީލަތްތައް ހުރި ޤައުމެކެވެ. އެހެންނަމަވެސް، 2025 ވަނަ އަހަރުވެސް ލަންކާއަށް ލިބުނީ އެންމެ 1.057 ބިލިއަން ޑޮލަރުގެ ސީދާ ބޭރުގެ އިންވެސްޓްމަންޓެވެ. އޭގެ ތެރެއިންވެސް އަލަށް ފެށި މަޝްރޫޢުތަކަކީ އެންމެ 134 މިލިއަން ޑޮލަރެވެ.

ރަސްމާލެ ޕްރޮޖެކްޓް ނިމުމުން ހުންނާނެ ގޮތް ދައްކުވައިދޭ ކުރެހުމެއް

ލަންކާގެ މާހިރުންނާ ހަވާލާދީ އެގައުމުގެ ނޫހެއްގައި ލިޔެފައިވާ  ގޮތުގައި ލަންކާއިން ރާއްޖޭގެ ކިބައިން ދަސްކުރަންޖެހޭ މުހިންމު ފިލާވަޅުތަކެއް އެބަހުއްޓެވެ. އޭގެ ތެރޭގައި:

• ވަސީލަތްތައް އިންވެސްޓްމަންޓަކަށް ބަދަލުކުރުން: ރާއްޖެއިން ވަނީ ބިމުގެ ދަތިކަމާއި ތިމާވެށީގެ ނާޒުކުކަން ފަދަ ގޮންޖެހުންތައް އިޤްތިޞާދީ ފުރުޞަތުތަކަކަށް ބަދަލުކޮށް، ރަނގަޅު އުސޫލުތަކަކާއެކު އިންވެސްޓަރުންނަށް ވިއްކަން ދަސްކޮށްފައެވެ.

• ސިޔާސަތުތަކުގެ ޔަޤީންކަން: ލަންކާގައި ސަރުކާރު ބަދަލުވުމާއެކު ޓެކުހާއި، ގަވާއިދުތަކާއި، އިންވެސްޓްމަންޓް އިސްކަންދޭ ދާއިރާތައް ބަދަލުވުމަކީ އިންވެސްޓަރުންގެ އިތުބާރު ގެއްލޭ ކަމެކެވެ. އިންވެސްޓަރުން ބޭނުންވަނީ ސަރުކާރަކާއެކު ނޫން، ދައުލަތާއެކު ހެދޭ ދެމެހެއްޓެނިވި އެއްބަސްވުންތަކެކެވެ.

• އިދާރީ ލަސްތައް ނައްތާލުން: ލަންކާގައި ރަނގަޅު ޕްލޭންތައް ހުރި ނަމަވެސް، އެކަންކަން ތަންފީޒުކުރުމުގެ ބަދަލުގައި އިދާރީ ބޮޑެތި އުނދަގޫތަކާއި ދިގުދެމިގެންދާ މަރުހަލާތަކުގެ ސަބަބުން މަޝްރޫޢުތައް އޮންނަނީ ހުއްޓިފައެވެ.

ރާއްޖެއިން ވަނީ ބޯހިޔާވަހިކަމާއި، ފަތުރުވެރިކަމާއި، އުމްރާނީ ތަރައްޤީ އަދި ތިމާވެށީގެ ސިޔާސަތުތައް އެއް ވިއުގައަކުން ގުޅުވާލައި، ބައިނަލްއަޤްވާމީ ބޮޑެތި އިންވެސްޓަރުން ޝައުޤުވެރިވާނެ ފަދަ ޕެކޭޖެއްގެ ގޮތުގައި ރަސްމާލެ މަޝްރޫޢު ހުށަހަޅާފައެވެ.

ލަންކާގެ ކޮޅުނބު ޕޯޓް ސިޓީ ފަދަ ބޮޑެތި ޕްރޮޖެކްޓްތައް ހުރި ނަމަވެސް، އެ ޤައުމުން ހަމައެކަނި ބޮޑެތި ތަސައްވުރުތައް ދެއްކުމުގެ ބަދަލުގައި، އިންވެސްޓަރުންނަށް ވިޔަފާރިކުރަން ފަސޭހަ، އިތުބާރުހުރި މާޙައުލެއް ޤާއިމުކޮށް، އެ ތަސައްވުރުތައް ހަޤީޤީ މުޢާމަލާތްތަކަކަށް ބަދަލުކުރަން ޖެހޭ ކަމަށް މުރާސިލުން ފާހަގަކުރެއެވެ.

ލަންކާގެ އެ ނޫހުގައި ބުނެފައިވާ ގޮތުން ރާއްޖެއިން އިންވެސްޓްމަންޓް ހޯދުމުގައި ދައްކަމުންދާ މިސާލަކީ މުޅި ސަރަޙައްދަށްވެސް މުހިންމު ފިލާވަޅެކެވެ.