ދިވެހި ވަޠަނީ ޚިދުމަތް (ނޭޝަނަލް ސަރވިސް) އިތުރަށް ފުޅާކޮށް، އޭގެ ތެރެއަށް ފަންނީ އިތުރު ދާއިރާތަކާއި އިންޓަރންޝިޕް ޕްރޮގްރާމްތައް ތަޢާރަފްކުރުމަށް ސަރުކާރުން ނިންމައިފިއެވެ.

މިކަން ހާމަކުރައްވާފައިވަނީ ދިވެހި ވަޠަނީ ޚިދުމަތުގެ ޕްރޮގްރާމަށް އެއް އަހަރު ފުރުމުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު "އެކްސް" ގައި ކުރެއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ، ދިވެހި ޒުވާނުންގެ ކުރިމަގު ބައްޓަންކޮށް އުޖާލާކޮށްދިނުމުގެ މުޅިން އާ ރާސްތާއެއް ފަހިކޮށްދިނުމުގެ އުންމީދާއެކު 1 އޮކްޓޫބަރު 2025 ގައި ފެށި މި ޚިދުމަތަށް އެއް އަހަރު ފުރުނުއިރު، ފުރަތަމަ އަހަރުވެސް ކަނޑައެޅި ލަނޑުދަނޑި ޙާޞިލުކުރެވިފައިވާ ކަމަށެވެ.

އެގޮތުން އަހަރަކު 1000 ޒުވާނުން ތަމްރީނުކުރުމަށް ސަރުކާރުން ކަނޑައެޅި އަމާޒުގެ ދަށުން، ނޭޝަނަލް ސަރވިސް އިނީޝަލް ޓްރޭނިންގގެ ތެރެއިން 1028 ޒުވާނުން އަދި ނޭޝަނަލް ސަރވިސް ސްކިލް ޓްރޭނިންގ ޕްރޮގްރާމުން 136 ޒުވާނުން ތަމްރީނުކުރެވިފައިވާކަން އެމަނިކުފާނު ފާހަގަކުރެއްވިއެވެ.

ވަޠަނީ ޚިދުމަތުގެ ކުރިމަގު ފެންނަނީ ވަރަށް އުޖާލާކޮށްކަން ފާހަގަކުރައްވަމުން ރައީސް ވިދާޅުވީ، ކުރިއަށް އޮތް ތަނުގައި މި ޚިދުމަތުގެ ތެރެއަށް ފަންނީ އައު ދާއިރާތަކާއި އިންޓަރންޝިޕް ޕްރޮގްރާމްތައް ތަޢާރަފްކުރެވޭނެ ކަމަށެވެ. އަދި ތަމްރީނު ފުރިހަމަކުރާ ޒުވާނުންނަށް ވަޒީފާގެ ފުރުޞަތުތައް ފަހިކޮށްދިނުމަށްޓަކައި، ނޭޝަނަލް ކެރިއަރ ސަރވިސްގެ ދައުރު ފުޅާކުރުމަކީވެސް ސަރުކާރުގެ މުހިންމު އަމާޒެއް ކަމުގައި ރައީސް ވިދާޅުވިއެވެ.

މި މުނާސަބަތުގައި ރައީސުލްޖުމްހޫރިއްޔާ ވަނީ ތަމްރީނުތައް ފުރިހަމަކުރި ހުރިހާ ޒުވާނުންނަށާއި އެ ޒުވާނުންގެ ޢާއިލާތަކަށް ތަހުނިޔާ އަރިސްކުރައްވައި، މި ޕްރޮގްރާމް ހިންގުމުގައި ޝާމިލުވި އެންމެހައި ފަރާތްތަކަށް ޝުކުރު އަދާކުރައްވާފައެވެ.

ދިވެހި ވަޠަނީ ޚިދުމަތަކީ ދިވެހި ޒުވާނުންގެ މެދުގައި ޤައުމިއްޔަތުގެ ރޫޙާއި ފަޚުރު ދިރުވައި އާލާކޮށް، މާތްވެގެންވާ އިސްލާމްދީނަށް ލޯބިކުރާ ހަރުދަނާ ޖީލެއް ބިނާކުރުމަށް ސަރުކާރުން ފަށާފައިވާ ޚާއްޞަ ޕްރޮގްރާމެކެވެ. މީގެއިތުރުން، ރާއްޖެއަށް ކުރިމަތިވާ ބޮޑެތި ކާރިސާތަކާއި ނުރައްކާތަކުގެ ވަގުތުތަކުގައި ޤައުމީ ޚިދުމަތަށް ސާބިތުކަމާއެކު ކުރިމަތިލާނެ ޒިންމާދާރު ރައްޔިތުން ބިނާކުރުމަކީވެސް މި ޕްރޮގްރާމުގެ މައިގަނޑު އެއް މަޤްޞަދެވެ.