މޯލްޑިވްސް ޙައްޖު ކޯޕަރޭޝަން ލިމިޓެޑްގެ ފަރާތުން ހުޅުމާލޭގައި ތަރައްޤީކުރުމަށް ހަމަޖެހިފައިވާ ލަގްޒަރީ ހައުސިންގ މަޝްރޫޢު "ނިއަމް ރެސިޑެންސް" ގެ އެޕާޓްމަންޓްތައް ވިއްކުމަށް މިހާތަނަށް ކުރިއަށްގެންދިޔަ އެންމެހާ މުޢާމަލާތްތައް ބާތިލްކޮށްފިއެވެ.
މިކަމާ ގުޅިގެން ހައްޖު ކޯޕަރޭޝަނުން ނެރުނު ބަޔާނެއްގައި ބުނެފައިވަނީ، އެ ކޯޕަރޭޝަންގެ މާލީ ޙާލަތު ރަނގަޅުކޮށް ކުންފުންޏަށް އެންމެ ބޮޑު މާލީ ފައިދާއެއް ހޯދުމަށް ކުރެވެމުންދާ މަސައްކަތްތަކުގެ ތެރެއިން ތަރައްޤީކުރާ "ނިއަމް ރެސިޑެންސް" ގެ ޔުނިޓްތައް ވިއްކުމަށް މިހާތަނަށް ކޮށްފައިވާ އެންމެހާ މުޢާމަލާތްތައް މިހާރު ބާތިލުކުރަން ނިންމާފައިވާ ކަމަށެވެ. މީގެ ތެރޭގައި އެ ކުންފުނީގެ މުވައްޒަފުންނަށް އެޕާޓްމަންޓްތައް ވިއްކުމަށް ކޮށްފައިވާ މުޢާމަލާތްތައް ވެސް ހިމެނެއެވެ.
ހައްޖު ކޯޕަރޭޝަނުން އިތުރަށް ހާމަކުރި ގޮތުގައި، މި ޕްރޮޖެކްޓުގެ ތެރެއިން ތަރައްޤީކުރެވޭ ކޮންމެ އެޕާޓްމަންޓު ޔުނިޓަކުން ކުންފުންޏަށް އެންމެ ބޮޑު މާލީ ފައިދާއެއް ލިބޭނެ ގޮތަށް ޕްރޮޖެކްޓު ކުރިޔަށްގެންދިއުމަށްޓަކައި، ޔުނިޓުތަކުގެ އަގުތައް އަލުން ކަނޑައެޅުމުގެ މަސައްކަތް މިހާރު ދަނީ ކުރެވެމުންނެވެ.
އަދި މި މަސައްކަތްތަކާއި، ޔުނިޓުތައް ވިއްކުމަށްޓަކައި ޢާންމުކޮށް ހުޅުވާލުމަށް ކުރަންޖެހޭ އެންމެހާ އިދާރީ އަދި ފަންނީ މަސައްކަތްތައް ފުރިހަމަކުރުމަށްފަހު، "ނިއަމް ރެސިޑެންސް" ގެ އެޕާޓްމަންޓްތައް ގަތުމުގެ ފުރުޞަތު ވަރަށް އަވަހަށް ޢާންމުކޮށް ހުޅުވާލެވޭނެ ކަމަށް ވެސް ހައްޖު ކޯޕަރޭޝަނުގެ ބަޔާނުގައި ވެއެވެ.
Advertisement
This content is created and paid for by advertisers and does not involve Voice Journalists
