ހުއްޓިފައިވާ މަޝްރޫއުތަކަށް ބޭނުންވާ ބޮޑުހިލަ ބަލްކުކޮށް ރާއްޖެ ގެނައުމަށް ނިންމާފައިވާކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހާމަކުރައްވައިފިއެވެ.
ރައީސް ޑރ.މުޢިއްޒު މިފަދައިން ހާމަކުރައްވާފައިމިވަނީ ގދ.ރަތަފަންދޫ ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުންނެވެ.
އެމްޓީސީސީ އާއި ހަވާލުކުރެވިގެން ފެށިފައިވާ އެރަށުގެ ގިރާ ސަރަހައްދު ހިމާޔަތްކުރުމުގެ މަޝްރޫއަށް އަލިއަޅުވާލައްވައި ރައީސް ޑރ.މުޢިއްޒު ވިދާޅުވީ، އެހެން ރަށްތަކެކޭވެސް އެއްފަދައިން އެ މަޝްރޫއުވެސް ތަކެއްޗާއި ފައިސާގެ ތާށިކަމާއި ހުރެ މަޑުޖެހިފައިވާކަމަށެވެ.
މިގޮތަށް ހުއްޓިފައިވާ ހުރިހާ ރަށަކަށް ބޭނުންވާތަކެތި ހަަމަކުރުމުގެ މަސައްކަތްކުރަމުންދާކަން ފާހަގަކުރައްވާ ރައީސް ޑރ.މުޢިއްޒު ވިދާޅުވީ، އެންމެ ގިނަ ރަށްތަކުގައި މަސައްކަތް ހުއްޓިފައި އޮތީ ބޮޑުހިލަ ނުލިބުމުގެ ސަބަބުން ކަމަށެވެ.
ރައީސް ޑރ.މުޢިއްޒު ވިދާޅުވީ، މިކަމާއި ގުޅިގެން މިދިޔަ ހަފްތާގެ ތެރޭގައި މިކަމާއި ގުޅޭ ހުރިހާ ކުންފުނިތަކުގެ ވެރިންނާއި ފިނޭންސް އަދި ކޮންސްޓްރަކްޝަން މިނިސްޓަރާއި އެކީގައި ބައްދަލުވުމެއް ބާއްވައި، ހުރިހާ ރަށަކަށް ބޭނުންވާ ބޮޑުހިލަ ބަލްކުކޮށް ރާއްޖެ ގެނައުމަށް ނިންމަވާފައިވާކަމަށެވެ.
މިދިޔަ ހަފްތާ ތެރޭގައި އަޅުގަނޑު ހަމަ މިކަމާއި ބެހޭ ހުރިހާ ކުންފުނިތަކުގެ ވެރިންނާއި ފިނޭންސް މިނިސްޓަރާއި އަދި ކޮންސްޓްރަކްޝަން މިނިސްޓަރާއިއެކު ބައްދަލުވުމެއް ބާއްވާފައި ގޮތްތަކެއް ރާވައިފިން. ހުރިހާ ރަށަކަށް ބޭނުންވާ ބޮޑުހިލަ ބަލްކުކޮށް ރާއްޖެ ގެންނަަން. އެއީ އެކި ރަށްރަށުގައި މިހުރީ މަސައްކަތް ހުއްޓިފައި ބޮޑުހިލަ ނެތިގެން. ނޫނިއްޔާ ޝޯ ޕްރޮކްޓެކްޝަނަށް ބޭނުންވާ މެޓީރިއަލް ނެތިގެން،"
ރައީސް ޑރ.މުޢިއްޒު ވިދާޅުވިއެވެ.
މީގެ އިތުރުންވެސް ރައީސް ޑރ.މުޢިއްޒު ވިދާޅުވީ، ބަނދަރުތަކާއި ރަށްގިރުމުގެ މައްސަލައާއި ބިން ހިއްކުން ފަދަ ކަންކަމަށް ބޭނުންވާ ހިލަ ގެނައުމަށް ކަންތައްތަކެއް ރޭވިފައިވާކަމަށާއި، މިދިޔަ ހަފްތާގައި ނިމުނު ހިސާބުގައި މިކަމަށްޓަކައި ފައިސާވެސް ހަމަޖައްސާފައިވާކަމަށެވެ.
މިއާއިއެކު، ރައީސް ޑރ.މުޢިއްޒު ވަނީ ރަތަފަންދޫގެ ގޮނޑުދޮށް ހިމާޔަތްކުރުމުގެ މަޝްރޫއު ކުރިއަށްދާއިރު، ރަށުގެ ރައްޔިތުން މޫދަށް އެރެވޭނެ ސަރަހައްދެއްވެސް ހިމެނޭ ފަދައިން އެ މަޝްރޫއު ކުރިއަށް ގެންދަވާނެކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
