ލޮނުފެނުން މަސް ފިނިކުރާ ނިޒާމު (އާރުއެސްޑަބްލިއު ސިސްޓަމް) ގާއިމުކުރުމުގެ ލޯނަށް އެދި ހުށަހެޅުމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން އަލުން ހުޅުވާލައިފިއެވެ.

އެސްޑީއެފްސީ ޕޯޓަލް މެދުވެރިކޮށް އާރްއެސްޑަބްލިއު ފައިނޭންސިން ފެސިލިޓީއަށް އެދި ހުށަހެޅުމުގެ ފުރުސަތު ހުޅުވާލާނެ ކަމަށް މީގެ ކުރިން އެ ވުޒާރާއިން ހާމަކޮށްފައިވާއިރު، ބޮޑެތި ލުއިތަކަކާއި އެކު މިފަހަރު ހުޅުވާލާއިރު، އަލަށް ބަންނަ ދޯނިތަކުގައިވެސް އާރްއެސްޑަބްލިއު ސިސްޓަމް ހަރުކުރުމަށް ލޯނަށް އެދި މިފަހަރު ހުށަހެޅޭނެއެވެ.

އެސްޑީއެފްސީ މެދުވެރިކޮށް ދޫކުރާ ލޯނުގެ ދަށުން ރަހުނަކާއި ނުލާ 100،000 ރުފިޔާއިން ފެށިގެން 2،000،000 ރުފިޔާއަށް ހަމައަށް ލޯނުދޫކުރާއިރު، އަލުން ހުޅުވާލި ފެސިލިޓީގެ ދަށުން، ދޯނިތަކުގައި އަވިން ހަކަތަ އުފެއްދޭ ސޯލާ ނިޒާމާއި ޖެނެރޭޓަރު ގަތުމަށް ފުރުސަތު ދޭނެއެވެ.

އަދި ލޯނު އަނބުރާ ދެއްކުމަށް ހަ މަސް ދުވަހުގެ ގްރޭސް ޕީރިއޭޑަކާއެކު، 10 އަހަރު މި ސްކީމުގެ ދަށުން ލިބޭކަން ވެސް ފާހަގަކޮށްލަން ޖެހެއެވެ.

މަސްވެރިކަމާއި ބެހޭ ވުޒާރާއިން ހާމަކުރިގޮތުގައި، އެންމެ ފުރަތަމަ މިދިޔަ އަހަރުގެ ސެޕްޓެމްބަރު މަހު މި ލޯނަށް އެދި ހުށަހެޅުމަށް ހުޅުވާލި ފުރުސަތުގައި މުއްދަތު ހަމަވިއިރު 39 ފަރާތުން ލޯނަށް އެދި ވަނީ ހުށަހަޅާފައެވެ. އަދި މިހާރު ކުރިއަށްދަނީ މީގެ ތެރެއިން ޝަރުތު ހަމަވި 19 ފަރާތާއިއެކު އެގްރީމަންޓްތަކުގައި ސޮއިކުރުމުގެ މަސައްކަތްކަމަށް އެ ވުޒާރާއިން ވަނީ ބުނެފައެވެ.