ޒަރޫރީ ބޭނުންތަކުގައި މެޝިނަރީ ބޭނުންކޮށްގެން ވެލިނަގަމުންގެންދާކަން ފާހަގަކުރެވޭތީވެ، އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ) އިން ކަންބޮޑުވުން ފާޅުކޮށްފިއެވެ.

މިކަމާ ގުޅިގެން އީޕީއޭއިން އާއްމުކޮށް ނެރުނު ބަޔާނެއްގައި ބުނެފައިވަނީ، ރާއްޖޭގެ ރައްޔިތުންގެ ޒަރޫރީ ބޭނުންތަކަށް ވެލި ނެގުމަށް ކަނޑައަޅާފައިވާ ސަރަޙައްދުތަކަކީ މެޝިނަރީ ބޭނުންނުކޮށް، ހަމައެކަނި ޒަރޫރީ ބޭނުމަށް ވެލިނެގުމަށް ކަނޑައަޅާފައިވަ ސަރަހައްދުތަކެއް ކަމަށެވެ. އީޕީއޭއިން ބުނީ އުސޫލްތަކާ ހިލާފަށް އެ ސަރަހައްދުތަކުން ގިނަ އަދަދަކަށް ވެލިނަގަމުންދާކަމުގެ ޝަކުވާ އެ އިދާރާއަށް ލިބެމުންދާކަމަށާއި، މިގޮތުން، މެޝިނަރީ ބޭނުންކޮށްގެން އަދި ވިޔަފާރި އުސޫލުން އެކި އެކި ބޭނުމަށް ވެލި ނަގަމުންދާކަން ފާހަގަކުރެވިފައިވާކަމަށެވެ.

އީޕީއޭއިން ބުނީ ކޮންމެ އަތޮޅެއްގައިވެސް، މެޝިނަރީ ބޭނުންނުކޮށް، ރައްޔިތުންގެ ޒަރޫރީ ބޭނުމަށް ވެލި ނެގުމަށް ވަކި ޚާއްޞަ ސަރަޙައްދުތަކެއް ކަނޑައަޅާފައިވާކަމަށެވެ. މެޝަނަރީ ބޭނުންކޮށްގެން ފަޅުފުންކުރުމާއި ވެލިނެގުމުގެ މަސައްކަތްތަކަކީ، ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓު ހެދުމަށްފަހު، ކުރަންޖެހޭ ކަމަކަށްވާއިރު، މެޝނަރީ ބޭނުންކޮށްގެން ވެލި ނަގާނަމަ ހަމަޖެހިފައިވާ އުސޫލްތަކުގެ މަތިން އެކަންކަން ކުރިއަށްގެންދިއުމަށް އީޕީއޭއިން ވަނީ އިލްތިމާސްކޮށްފައެވެ.

މިގޮތުން މެޝިނަރީ ބޭނުންކޮށްގެން ވެލި ނަގަން ޖެހިއްޖެ ހިނދެއްގައި، އަތޮޅު ކައުންސިލާއި އަދި ކަމާގުޅޭ އެހެން ސަރުކާރުގެ އިދާރާތަކާއިއެކު މަޝްވަރާކޮށް، އެކަމަށް ޚާއްސަ ފަޅެއް ކަނޑައަޅައި، ތިމާވެއްޓަށް އަސަރުފޯރާނެ މިންވަރު ބަޔާންކުރާ ރިޕޯޓު ހެދުމާބެހޭ ގަވާއިދާ އެއްގޮތަށް އީ.އައި.އޭ މަރުހަލާ ފުރިހަމަކުރެއްވުމަށް އީޕީއޭއިން ވަނީ އިލްތިމާސްކޮސްފައެވެ. 

އީޕީއޭއިން ވަނީ އެ އިދާރާގެ އުސޫލްތަކާ އެއްގޮތަށް އަމަލުކުރަމުން ނުދާ ފަރާތްތަކާމެދު އެ އިދާރައިން ހަމަޖެހިފައިވާ އުސޫލުން ފިޔަވަޅުތައް އަޅަމުންގެންދާނޭކަމަށެވެ. މެޝިނަރީ ބޭނުންކޮށްގެން ބައެއް ފަރާތްތަކުން ވެލިނަގަމުންދާ މައްސަލަ އީޕީއޭއިން ފާހަގަކޮށްފައިވާއިރު، ޕަމްޕުފަދަ އާލާތްތައް ބޭނުންކޮށްގެން ފަޅުފަޅުން ވެލިނެގުމަކީ މިހާރު ވަރަށް އާއްމުކަމެކެވެ.