ރާއްޖޭގެ އަސްކަރިއްޔާގެ އެކި ދާއިރާތަކުގެ ގާބިލުކަން އިތުރުކުރުމުގެ ގޮތުން އަވައްޓެރި އިންޑިއާއިން އެހީތެރިކަން ފޯރުކޮށްދިނުމުގައި ދެމިއޮންނާނޭކަމަށް އެޤައުމުގެ ޑިފެންސް މިނިސްޓަރު ރަޖްނަތު ސިންގް ވިދާޅުވެއްޖެއެވެ.

ޑިފެންސް މިނިސްޓަރު މުހައްމަދު ޣައްސާން މައުމޫން މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި މިއަދު ވަނީ، އެޤައުމުގެ ޑިފެންސް މިނިސްޓަރު ރަޖްނަތު ސިންގް އާ ބައްދަލުކުރައްވާފައެވެ. މި ބައްދަލުވުމާ ބެހޭގޮތުން މީޑިއާތަކަށް ދެއްވި ބަސްދީގަތުމެއްގައި ރަޖްނަތު ވިދާޅުވެފައިވަނީ، ދިވެހިރާއްޖޭގެ އަސްކަރިއްޔާގެ ގާބިލްކަން އިތުރުކޮށް ވަރުގަދަކުރުމަށް އިންޑިއާއިން އެހީތެރިކަން ދޭނޭކަމަށެވެ. އެގޮތުން އިންޑިއާގެ އަވައްޓެރި ޤައުމުތަކަށް އިސްކަން ދިނުމުގެ ސިޔާސަތުގެ ދަށުން އިންޑިއާއިން، ރާއްޖޭގެ އަސްކަރިއްޔާގެ ގާބިލްކަން އިތުރުކުރުމަށް ބޭނުންވާ އާލާތްތައް ދޭނޭކަމަށް ރަޖްނަތު ވިދާޅުވިއެވެ.

އިންޑިއާގެ ޑިފެންސް މިނިސްޓަރު ވިދާޅުވީ، އެޤައުމުން ރާއްޖޭގެ އަސްކަރިއްޔާއަށް މިހާރުވެސް ދެމުންގެންދާ އެހީތައް ދަމަހައްޓައި އިތުރުކުރާނޭކަމަށެވެ. އަދި ރާއްޖޭގެ ރައްޔިތުންގެ ލާބައަށް ކުރާ ކަންކަމުގައި އަބަދުވެސް އެހީތެރިކަން ދެމުންގެންދާނޭކަމަށްވެސް ވަނީ ވިދާޅުވެފައެވެ.

Advertisement

ރާއްޖޭގެ އަސްކަރިއްޔާގެ ގާބިލްކަން އިތުރުކުރުމަށް އިންޑިއާގެ އެހީތެރިކަން ދޭނޭކަމަށް އެޤައުމުން ބުނެފައިވާއިރު، ދެ ޤައުމުގެ ދެމެދުގައި ވެވުނު އެއްބަސްވުމުގެ ދަށުން ދިވެހި ސަރުކާރުން ވަނީ ރާއްޖޭގައި ތިބި އިންޑިއާގެ އަސްކަރިއްޔާގެ ސިފައިން އެ ޤައުމަށް ފޮނުވާލާފައެވެ. 

ސަރަހައްދީ ގުޅުމަށް ބަލާއިރު ރާއްޖެއާ އިންޑިއާ އަކީ ހުރިހާ ދާއިރާއަކުންވެސް ވަރަށްރަނގަޅު ގުޅުމެއް އޮންނަ ދެ ޤައުމެވެ. ހާއްސަ ގޮތެއްގައި އަސްކަރީ ރޮނގުންވެސް ދެޤައުމުގެ ދެމެދުގައި ގުޅުން ބޮޑުކަން ދެ ޤައުމުގެ ސަރުކާރުންވެސް ފާހަގަކުރެއެވެ.