މައްކާއަށް އުމްރާއަށްދިޔަ ދިވެހި އުމްރާވެރިންގެ ތެރެއިން ގްރޫއްޕެއްގެ ހަވާލުގައި ގޮސް ނާދެވިފައިތިބި އުމްރާވެރިންގެ ހާލަތު ވަރަށްގާތުން ބަލަމުންދާކަމަށް އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

އަލްހިޖްރަ ކިޔާ ކުންފުންޏެއްގެ ޙަވާލުގައި އުމްރާއަށް ދިޔަ ބަޔަކު ރާއްޖެ ނާދެވި މައްކާގައި ތާށިވުމާ ގުޅިގެން އިސްލާމިކް މިނިސްޓަރު ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ، އެމީހުންގެ ހާލަތު ސަރުކާރުން ވަރަށް ގާތުން ބަލަމުންދާކަމަށެވެ. މިގޮތުން އެމީޙުން ރާއްޖެ ގެނައުމަށް ކޮށްދެވެންހުރި ކަންކަން މިނިސްޓްރީން ކުރާނޭކަމަށް ޝަހީމް ވިދާޅުވިއެވެ.

މިކަމާ ގުޅޭގޮތުން ދައުލަތުގެ މީޑިއާ އާ ވާހަކަދައްކަވަމުން މިނިސްޓަރު ޝަހީމް ވަނީ މިފަހަރު އުމްރާއަށްދިޔަ ދިވެހިންގެ ބަޔަކު މައްކާގައި ތާށިވެފައި ތިބެންޖެހުނު މައްސަލައެއް އިސްލާމިކް މިނިސްޓްރީގެ ސަމާލުކަމަށް އައިސްފައިވާކަމަށް ވިދާޅުވެފައެވެ. އެމީހުން ގެންދިޔަ ގްރޫޕަކީ އުމްރާއަށް މީހުން ގެންދިއުމުގެ ހުއްދައޮތް ކުންފުންޏެއްކަމަށް މިނިސްޓަރު ވަނީ ފާހަގަކުރައްވާފައެވެ.

މިނިސްޓަރު ވިދާޅުވީ އެމީޙުން އުމްރާއަށްގެންދިޔަ ކުންފުނިން އެކަމުގެ ޒިންމާނަގަން ޖެހޭއިރު، އުމްރާގެ އަޅުކަން އަދާކުރުމަށް ދޭ ފައިސާ އެހެންކަންކަމަށް ބޭނުންކޮށް އުމްރާވެރިން ހާލުގައިޖެހެން ޖެހޭގޮތް މެދުވެރިވުމަކީ ވަރަށްބޮޑު މައްސަލައެއްކަމަށް ވިދާޅުވެފައެވެ. ނަމަވެސް ދިވެހިންގެ ބަޔަކު އެހީއަށް ބޭނުންވެފައިވާ ދަނޑިވަޅެއްގައި ފުރަތަމަ އިސްކުރާނީ އެމީހުންގެ ރައްކާތެރިކަން ކަށަވަރުކުރުންކަމަށް މިނިސްޓަރު ވަނީ ވިދާޅުވެފައެވެ.

ވޮއިސްއަށް މައުލޫމާތު ލިބިފައިވާ ގޮތުގައި އަލްހިޖްރަ ކިޔާ ކުންފުންޏެއްގެ ޙަވާލުގައި އުމްރާއަށް ދިޔަ 24 މީހަކު މައްކާގައި ރާއްޖެ ނާދެވިފައި ތިބިއިރު، އޭގެ ތެރޭގައި ކުޑަކުދިންވެސް ހިމެނެއެވެ. އެމީހުން ރާއްޖެ އަންނަން އޮތީ މިމަހުގެ 5 ވަނަ ދުވަހުއެވެ. ނަމަވެސް އަންނަން ޓިކެޓް ހަމަނުޖެހުމުން އެމީހުން ތާށިވީއެވެ. މައުލޫމާތު ލިބިފައިވާ ގޮތުގައި އެމީހުން މައްކާއަށް ދިޔައިރުވެސް ދަތުރުގެ ކަންކަން ހުރީ ވަރަށް ދޯދިއާކޮށެވެ. އެކަން އެޖަމާއަތަށް ނިސްބަތްވާ ބައެއް މީހުން ވަނީ އާއިލާ މީހުންނާ ހިއްސާވެސް ކޮށްފައެވެ.

މިފަހަރަކީ ރާއްޖެއިން އެންމެގިނަ މީހުން އުމްރާއަށްދިޔަ ފަހަރުކަމަށް އިސްލާމިކް މިނިސްޓްރީން ބުނެއެވެ. އެގޮތުން މިފަހަރު 6373 ވުރެ ގިނަ މީހުން އުމްރާގެ އަޅުކަން އަދާކުރުމަށް މައްކާއަށް ގޮސްފައިވާކަމަށް ވަޒީރު ޑރ.މުޙައްމަދު ޝަހީމް ވަނީ ވިދާޅުވެފައެވެ. ޢާއްމުގޮތެއްގައި ރާއްޖެއިން ޑިސެމްބަރު މަހުގެ ޢުމްރާއަށް 4000 އެއްހާ މީހުންކަމަށްދާކަމަށް އިސްލާމީ ކަންތައްތަކާ ބެހޭ ވުޒާރާއިން ހާމަކުރިނަމަވެސް، މިއަހަރަކީ ރެކޯޑް އަދަދަކަށް އުމްރާއަށް މީހުންދިޔަ އަހަރެކެވެ.