ހިޔާވެހި ފައިނޭންސް ސްކީމަކީ ރައްޔިތުންނަށް ލިބިފައި އޮތް ރަނުގެ ފުރުޞަތެއްކަމަށާއި، އޭގެ ބޭނުން ހިފުމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އިލްތިމާސްކުރައްވައިފިއެވެ.

ރައީސް ޑރ.މުޢިއްޒު މިފަދައިން އިލްތިމާސްކުރެއްވީ އެމަނިކުފާނު ހުވަދުއަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން ގއ. މާމެންދޫއަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުންނެވެ.

ރައީސް ޑރ.މުޢިއްޒު ވިދާޅުވީ، ސަރުކާރުގެ އެންމެ އިސް ސިޔާސަތަކީ ގެދޮރުގެ ދަތިކަމުގެ މައްސަލައަށް ދާއިމީ ހައްލެއް ހޯދުންކަމަށާއި، ރާއްޖޭގެ ރައްޔިތުންނަށް އެންމެ ބޮޑުވެފައިވާ މައްސަލައަކީ ބޯހިޔާވަހިކަމުގެ ދަތިކަން ކަމަށްވާއިރު، އެކަމަށް ޙައްލެއް ލިބެން އޮތް ދެވަނަ ގޮތަކީ ހައުސިންގް މަޝްރޫޢުތައް ހިންގުންކަމަށެވެ.

މި މަޝްރޫޢުތައް މިއަހަރުގެ ތެރޭގައި ފެށުމަށް ދަޢުލަތުގެ ބަޖެޓުގައި 1.5 ބިލިއަން ރުފިޔާ ހިމަނުއްވާފައި އޮތްކަން ފާހަގަކުރައްވަމުން ރައީސް ޑރ.މުޢިއްޒު ވިދާޅުވީ، މިއީ ކުރިއަށް އޮތް އަހަރުތަކުގައިވެސް ބަޖެޓަށް އިތުރު ކުރެވޭނެ މިންވަރެއް ކަމަށާ، މިކަމުގެ މަގްސަދަކީ ގެދޮރުގެ ދަތިކަމުގެ މައްސަލައަށް، ޙަޤީޤީ މާނައިގައި ދާއިމީ ޙައްލެއް ހޯއްދަވައިދެއްވުން ކަމަށެވެ.

‎ހިނގަމުން މިދާ ރިޔާސީ ދައުރު ނިމޭއިރު، ދިވެހި ކޮންމެ ރައްޔިތަކީ ގެދޮރުގެ މައްސަލައަށް ދާއިމީ ޙައްލެއްގެ ފުރުޞަތު އޮތް މީހަކަށް ވުމަކީ ޢަމާޒުކަމަށާއި، ހައުސިންގް ޔުނިޓް ނުވަތަ ލޯނު ސްކީމާއި އެނޫންވެސް އެފަދަ މަޝްރޫޢުތަކުގެ ތެރެއިން ކޮންމެ މީހަކީވެސް އެމީހެއްގެ ފުރަތަމަ ބޯހިޔާވައްސަށް ފުރުޞަތު ލިބިފައި އޮތް ރައްޔިތެއް ކަމުގައި ހެދުމަށް ވެވަޑައިގެން ވައުދު ފުއްދަވާނެކަމަށް ރައީސް ޑރ.މުޢިއްޒު ވިދާޅުވިއެވެ.

މިގޮތުން މިދިޔަ އަހަރުގެ ނޮވެންބަރު މަހުގެ ތެރޭގައި އިފްތިތާހްކުރި "ހިޔާވެހި ފައިނޭންސިންގް ޕްރޮގްރާމް" އަށް އަލިއަޅުވާލައްވައި ރައީސް ޑރ.މުޢިއްޒު ވިދާޅުވީ،  އަތްފޯރާ ހެޔޮ އަގެއްގައި ގެދޮރު ޢިމާރާތް ކުރެވޭނެ މަގު މި ލޯނު ސްކީމުގެ ދަށުން ހަމަޖެހިގެންދާނެކަމަށާއި، މިކަމަށްޓަކައި ރާއްޖޭގައި ހިންގާ މައިގަނޑު ހުރިހާ ބޭންކުތަކާއި އެކު އެއްބަސްވުންތަކުގައި ސަރުކާރުން ސޮއިކޮށްފައިވާކަމަށެވެ.

މިއީ އަތްފޯރާ ފަށުގެ ލޯނު ސްކީމެއް ކަމަށާއި، އިސްލާމިކް ފައިނޭންސް މޮޑެލުގެ މި ލޯނު ސްކީމުުގައި އެއްވެސް ވަރަކަށް ދީނުގައި ހުއްދަނޫން އެއްވެސް ކަމެއް ނުހިމެނޭކަން ފާހަގަކުރައްވާ ރައީސް ޑރ.މުޢިއްޒު ވަނީ ގޯތީގައި ގެދޮރު ބިނާކުރުމަށް އަމިއްލައަށް ގެ އެޅުމަށް 5 އިންސައްތައިގެ އިންޓަރެސްޓްގެ އިކުއިޓީ ބަހައްޓަން ނުޖެހޭ މި ލޯނު ސްކީމްގެ ބޭނުން ހިފުމަށް ރާއްޖޭގެ ރައްޔިތުންނަށް އިލްތިމާސްކުރައްވާފައެވެ.

ރައީސް ޑރ.މުޢިއްޒު އިތުރަށް ވިދާޅުވީ، ކޮންމެ އަހަރެއްގެ ބަޖެޓުން 1000 މިލިއަން ރުފިޔާ ކޮންމެ އަހަރަކު އިތުރު ކުރެވޭނެކަމަށާއި، ކޮންމެ އަހަރަކު 2 ބިލިއަނަށްވުރެ ގިނަ ރުފިޔާގެ ލޯނު ދޫކުރެވޭނެކަމަށެވެ.