މާފުށީ ޖަލުގައި ބަނޑުހައިހޫނު ކަމުގެ ހަޅުތާލެއް ނުހިނގާ ކަމަށާ، ޖަލު ގައިދީން ތިބެނީ ކައިގެން ކަމަށް ކަރެކްޝަނަލް ސާވިސަސް އިން ބުނެފިއެވެ.
މާފުށީ ޖަލުގެ ބައެއް ޔުނިޓް ތަކުގައި ތިބި ގައިދީން ނުކައި، ބަނޑުހައި ހޫނު ކަމުގެ ހަޅުތާލު ހިންގާތާ ތިން ދުވަސް ވެފައިވާ ކަމަށާ، ނުކައި ހުރުމުގެ ސަބަބުން ބައެއް ގައިދީންގެ ހާލު ދެރަވެ ހޮސްޕިޓަލުގައި ފަރުވާވެސް ދިން ކަމަށްބުނެ މީސް މީޑިއާގައި ވާހަކަތައް އަންނަނީ ފެތުރެމުންނެވެ.
މީގެ އިތުރުން، ޖަލު ގައިދީއެއްގެ އާއިލާއިން ”ވޮއިސް“އަށް މަޢުލޫމާތު ދިން ގޮތުގައި، ބައެއް ގައިދީންނަށް ދިނުމަށް ޑޮކްޓަރުން ލަފާދީފައިވާ ޚާއްޞަ ކެއުން ދިނުން މިހާރު ވަނީ ހުއްޓާލާފައެވެ. އެގޮތުން ހަކުރު ހުންނަ މީހުންނާއި، އެހެން ބަލިތައް ހުންނަ މީހުންނަށް ދޭންޖެހޭ ޚާއްޞަ ކާއެއްޗެހި ނުދޭ ކަމަށް ބުނެފައިވެއެވެ.
މީގެ އިތުރުން، ޔޫ2 ގޮޅި (ވާނުވާ މީހުން ތިބޭ ގޮޅީ)ގައި ތިބޭ މީހުންނަށް ދީފައި ހުރި ލުއިތައް ވެސް ގެންގޮސްފައިވާ ކަމަށް ބުނެފައިވެ.
ކުރީ ސަރުކާރުގައި އެމީހުންނަށް މަހަކު އެއް ފަހަރު ނިކުމެވޭނެ ގޮތަށް އޮތް އުސޫލު ބަދަލުކުރި އިރު، ރައީސް ޑރ. މުހައްމަދު މުޢިއްޒު ވެރިކަމާބހަވާލުވެވަޑައިގެން އެ މީހުންނަށް އަބަދުވެސް ނިކުމެވޭ ގޮތް ހަދައި ކުޅެން ވެސް ދެވޭ ގޮތަށް ނިންމި ކަމަށް ބުނެފައިވެއެވެ. ނަމަވެސް އެ ކަންކަން ވެސް މިހާރު ހުއްޓުވާފައިވާ ކަމަށް ޢާއިލާތަކުން ބުނެފައިވެއެވެ.
އެކަމާއި ގުޅިގެން ”ވޮއިސް“ އަށް މައުލޫމާތު ދެއްވަމުން ކަރެކްޝަންސް އިން ބުނީ، ޖަލުގައި ތިބި ގައިދީންނަށް ކަރެކްޝަންސް އިން ދޭ ކާތަކެތި ނުކައި ކަމަށެވެ. އެހެން ނަމަވެސް، ކާބޯތަކެއްޗާއި އެނޫންވެސް ޒަރޫރީ ބޭނުންތަކަށް ބޭނުންކުރާ ތަކެތި ޖަލުގައިދީންނަށް ވިޔަފާރި އުސޫލުން ވިއްކާ ކަމަށާ، އެ ވިއްކާ ފަރާތްތަކުގެ އަތުން ކާބޯތަކެތި ގަނެގެން ގައިދީން އެ އެއްޗެހި ކައި ކަމަށެވެ.
މީގެ އިތުރުން، ހާލު ދެރަވި ކަމަށް ބުނި ގައިދީން ގެންގޮސް އެ މީހުންގެ ވައިޓަލްސް ބެލި ކަމަށާ، އެމީހުންގެވެސް ހާލު ރަނގަޅު ކަމަށް ކަރެކްޝަންސް އިން ބުންޏެވެ.
މާފުށީ ޖަލުގައި ތިބި ބައެއް ބަންދުމީހުން މި ސަރވިސްއިން ފޯރުކޮށްދޭ ކާބޯތަކެތި ބައެއް ފަހަރު ނުނެގި ނަމަވެސް، ވިޔަފާރި އުޞޫލުން ގަނެފައިވާ ތަކެތި ބޭނުން ކުރަމުންދާކަމަށާއި އެއްވެސް ކަމަކާ ގުޅިގެން އެއްވެސް ބަންދުމީހެއްގެ ސިއްޙީ ހާލަތު ގޯސްވެ، ހޮސްޕިޓަލްގައި އެޑްމިޓްކޮށް ވަކި ޚާއްސަ ފަރުވާ ދެވިފައިވާ ނުވާ ވާހަކަ ދަންނަވަމެވެ
ކަރެކްޝަންސް
މީގެ އިތުރުން، ކަރެކްޝަންސް އިން މިކަމާއި ގުޅޭ ގޮތުން، މިއަދު އެކްސްގައި ކުރި ޕޯސްޓެއްގައި ބުނެފައިވަނީ، ޖަލުތަކުގެ ސަލާމަތާއި ރައްކާތެރިކަން ކަށަވަރުކުރުމަށާއި މަސައްކަތްތައް ހަރުދަނާކުރުމުގެ ގޮތުން ބައެއް އުޞޫލުތަކަށް ބަދަލުގެނެވުނު ނަމަވެސް، އެ ސަރވިސްގެ ބެލުމުގެ ދަށުގައިވާ ޤައިދީންނާއި ބަންދުމީހުންނަށް ލިބެންޖެހޭ އެއްވެސް އަސާސީ ޢިނާޔަތެއް، ޚިދުމަތެއް އުނިކުރެވިފައެއް ނުވާނެ ކަމަށެވެ.
Advertisement
This content is created and paid for by advertisers and does not involve Voice Journalists
