މިދިޔަ ހުކުރު ދުވަހު ކުރި ވިއްސާރައާއި ގުޅިގެން މާލޭގެ  ގޭބީސީތަކަށް ލިބުނު ގެއްލުން 2.2 މިލިއަނަށް އަރާކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

މިދިޔަ ހުކުރުދުވަހު ކުރި ވިއްސާރައާއި ގުޅިގެން އެންޑީއެމްއޭއިން ނެރުނު އަދާހަމައިގައި ބުނީ، ޖެނުއަރީ 3 ވަނަ ދުވަހުގެ 00:00 އިން ފެށިގެން 4 ޖެނުއަރީގެ 00:00 އާއި ހަމައަށް މާލެއަށް 161.9 މިލިމީޓަރުގެ ވާރޭވެހިފައިވާއިރު، މިއީ ރެކޯޑެއްކަމަށެވެ.

މިއާއިއެކު އެ އޮތޯރިޓީން ބުނީ، ޖެނުއަރީ 3 ވަނަ ދުވަހުގެ 15:00 އިން ފެށިގެން 18:00 އާއި ހަމައަށް 3 ގަޑިއިރުގެ ތެރޭގައި 109.8 މިލިމީޓަރުގެ ވާރޭވެހިފައިވާއިރު، މިއީ 3 ގަޑިއިރުގެ ތެރޭގައި މިހާތަނަށް މާލެއަށް ބޯކޮށް ވާރޭވެހުމުގެ ރެކޯޑެއްކަމަށެވެ.

ވިއްސާރައިގައި ފެންބޮޑުވުމާއި ގުޅިގެން ހިފާގެންގުޅޭ ތަކެއްޗާއި އިމާރާތްތަކަށް އެކިވަރުގެ ގެއްލުން ލިބިގެން ޑެމޭޖް އެސެސްމަންޓް ހަދަން ޖެހޭކަމަށް މާލެއިން 145 ގެއެއް ފާހަގަކުރެވިފައިވާކަމަށާއި އޭގެ ތެރެއިން 115 ގެއެއްގެ އެސެސްމަންޓް ހަދާ ނިމިފައިވާއިރު، 13 ގެއަކުން އެސެސްމަންޓް ހަދަން ބޭނުންނުވާކަމަށް ބުނެފައިވާކަމަށާއި، އެކި ސަބަބުތަކާއި ހުރެ 17 ގެއެއްގެ އެސެސްމަންޓް ހެދިފައިނުވާކަމަށް އެންޑީއެމްއޭއިން ފާހަގަކުރިއެވެ.

އެންޑީއެމްއޭއިން ބުނީ، އަތޮޅު ތެރޭގެ ރަށްރަށަށް އުދަ އަރައިގެން 2 ރަށަކުން ރިޕޯޓްކުރިކަމަށާއި، ބޯކޮށް ވާރޭވެހި ފެންބޮޑުވުމުގެ ސަބަބުން އަތޮޅުތެރޭގެ 8 ރަށަކުން ރިޕޯޓުކޮށްފައިވާއިރު 4 ރަށެއްގެ 73 ގެއަކަށް އެކިވަރުގެ ގެއްލުން ލިބިގެން އެސެސްމަންޓް ރިޕޯޓު ހުށައަޅާފައިވާކަމަށެވެ.

އެންޑީއެމްއޭއިން މައުލޫމާތުދޭ ގޮތުގައި، އެދުވަހުގެ ވިއްސާރައިގައި މާލޭގެ ގޭބިސީތަކަށް ލިބުނު ގެއްލުން 2.2 މިލިއަނަށް އަރާއިރު، އަތޮޅު ތެރޭގެ ރަށްރަށުގެ ގޭބިސީތަކަށް ލިބުނު ގެއްލުން 8 ލައްކަ ރުފިޔާއަށް އަރައެވެ. އަދި މިއީ މާލެއާއި ރަށްރަށުގެވެސް ހަމައެކަނި ގޭބިސީތަކަށް ލިބުނު ގެއްލުންކަމަށާއި، މީގައި ވިޔަފާރިއާއި ގުދަންތަކާއި ދަނޑުބިންތައް ނުހިމެނޭކަމަށް އެއިދާރާއިން ހާމަކުރެއެވެ.

އެންޑީއެމްއޭއިން ހިންގި ފެންބޮޑުވުމުގެ އޮޕަރޭޝަނަށް 61،500 ރުފިޔާ ހަރަދުވެފައިވާއިރު، ރިލީފްގެ ގޮތުގައި ހާލުގައި ޖެހުނު ފަރާތްތަކަށް ބޯހިޔާވަހިކަމާއި ކެއިން ބުއިމަށް ދެ ލައްކަ ރުފިޔާގެ އެހީތެރިކަން ވަނީ ފޯރުކޮށްދީފައެވެ.

މިއީ މިހާތަނަށް ވިއްސާރައިގެ ސަބަބުން ހާލުގައި ޖެހުނު ފަރާތްތަކަށް އެހީތެރިކަން ފޯރުކޮށްދިނުމަށް ހިންގުނު އެންމެ ބޮޑު އޮޕަރޭޝަންކަން ފާހަގަކޮށް އެ އޮތޯރިޓީން ބުނީ، މިއީ އެންމެ ބޮޑަށް ގެއްލުންވެ އެންމެ ގިނަ މީހުންނަށް ރައްކާތެރި ތަންތަނަށް ބަދަލުކުރަންޖެހުނު ފަހަރުކަމަށެވެ.