މަޝްއަރު ޓްއާސްގެ ހަވާލުގައި މިދިޔަ ރަމަޟާންމަހު އުމްރާއަށް ދިޔަ މީހުންގެ ޓިކެޓަށް ފައިސާ ދައްކަންދިން ޗެކްތަކެއް ބައުންސްވި މައްސަލަ ތަހުގީގުކުރުމަށްފަހު ފުލުހުން އެ މައްސަލަ ޕީޖީއަށް ފޮނުވައިފިއެވެ.

މަޝްއަރު ޓްއާސްގެ ހަވާލުގައި މިދިޔަ ރަމަޟާންމަހު އުމްރާއަށްދިޔަ 50 މީހުން މައްކާގައި ތާށިވީ، އެއާލައިން ޓިކެޓަށް ދައްކަންޖެހޭ ފައިސާ ދެއްކުމުގައި އިހުމާލުވުމުންނެވެ. ޓިކެޓަށްވާ ފައިސާ މަޝްއަރުގެ ފަރާތުން އެއާލައިންގެ އޭޖެންޓު އޭޝް ޓްރެވަލްސް އަށް ދައްކާފައިވަނީ ޗެކުންނެވެ. ނަމަވެސް އެ ގްރޫޕުން ދިން ޗެކްތައް ވަނީ ބައުންސްވެފައެވެ.

އެ މައްސަލަ އިސްލާމިކް މިނިސްޓްރީން ފުލުހުންނަށް ރިޕޯޓްކުރީ މިދިޔަ އަހަރުގެ އޭޕްރިލްމަހުގެ ތެރޭގައެވެ. ފުލުހުން މި މައްސަލަ ބެލުމަށްފަހު ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވަނީ މިދިޔަ ޑިސެމްބަރުމަހުގެ ތެރޭގައެވެ. ވޮއިސްއަށް މައުލޫމާތު ލިބިފައިވާ ގޮތުގައި މަޝްއަރުން އެއާލައިން އޭޖެންޓަށް ޓިކެޓް ފައިސާގެ ގޮތުގައި 60،000 ޑޮލަރު ދޭންޖެހެއެވެ. 

Advertisement

އުމްރާއަށް މީހުން ގެންގޮސް އިހުމާލުވުމުގެ މައްސަލައެއް އިއްޔެވެސް ވަނީ ފެންމަތިވެފައެވެ. އަލް ހިޖުރަ ނަމަކަށް ކިޔާ ގްރޫއްޕެއްގެ ހަވާލުގައި އުމްރާއަށް ދިޔަބަޔަކު މައްކާގައި ތާށިވިއިރު، އެންމެފަހުން އެމީހުން ގެނައުމުގެ ޒިއްމާތަކާ ހަވާލުވީ ސަރުކާރުގެ ހައްޖުކުންފުނި، ހައްޖު ކޯޕަރޭޝަނުންނެވެ.