މިރިހި އައިލެންޑް ރިސޯޓް ކައިރީގައި އޮތް "ނޯތު 07" ސަފާރީއިން މޫދަށް ވެއްޓި، ގެއްލުނު މީހާ މަރުވެފައި އޮއްވާ ފެނިއްޖެއެވެ.

އެ ސަފާރީން ވެއްޓިގެން ހޯދަމުން ދިޔައީ، ނ. ހޮޅުދޫ / ސީވީޑް، ޢަލީ އަރުޝަދު (35 އަހަރު) އެވެ.

ފުލުހުން މިއަދު ބުނި ގޮތުގައި، ސަފާރީގެ ސީސީޓީވީ ފުޓޭޖު ބެލިއިރު، ރޭގެ ވަގުތެއްގައި ސަފާރީގެ ޑެކް މަތީގައި ހުއްޓާ އަރުޝަދު ވެއްޓި ޑެކްގެ އަރިމަތީ ޖެހިފައި މޫދަށް ވެއްޓިފައިވާ ތަން ވަނީ ފެނިފައެވެ. 

Advertisement

އޭނާގެ ހޯދުމުގެ މަސައްކަތް ފުލުހުންނާއި އެމްއެންޑީއެފުން ދިޔައީ ކުރަމުންނެވެ. 

އެމްއެންޑީއެފުން ދާދި ދެންމެ އަކު ބުނީ، ގެއްލުނު ދިވެހި މީހާގެ ހަށިގަނޑު، އެމްއެންޑީއެފް މާލެ އޭރިއާ ކޮމާންޑް، ކޯސްޓްގާޑު ސެކަންޑް ސްކޮޑްރަންގެ ޑައިވަރުން، ކަނޑުގެ 69 މީޓަރު އަޑިން ހޯދާފައިވާ ކަމަށެވެ. އަދި ޑައިވަރުންގެ ޓީމުން، އެ މީހާގެ ހަށިގަނޑު، 15:35 ހާއިރު ލޯންޗަށް ނަގާފައިވާ ކަމަށެވެ.