މޫސުން ގޯސްވާނެކަމަށް ލަފާކޮށް، މޫސުމާއި ބެހޭ އިދާރާ (މެޓް އޮފީސް) އިން ށ އަތޮޅުން ފެށިގެން ތ އަތޮޅަށް ރީނދޫ ސަމާލު ނެރެފިއެވެ.
މޫސުމާއި ބެހޭ އިދާރާއިން މި ސަރަހައްދަށް ރީނދޫ ސަމާލު ނެރެފައިވަނީ މިއަދު ހެންދުނު 9:00 އިން ފެށިގެން މެންދުރު 13:00 އާއި ހަމައަށެވެ.
މިގޮތުން އެ އިދާރާއިން ބުނީ، މި ސަރަހައްދަށް ބޯކޮށް ވާރޭވެހުމާއިއެކު ގުގުރާނެކަމަށް ލަފާކުރާކަމަށެވެ.
މޫސުމާއި ބެހޭ އިދާރާއިން މިއަދު ހެނދުނު 8:45 އިން މެންދުރު ފަހު 14:00 އާއި ހަމައަށް ހއ އަތޮޅުން ފެށިގެން ލ އަތޮޅަށް ހުދު ސަމާލުނެރެފައިވާއިރު، އެއިދާރާއިން ބުނީ، މި ސަރަހައްދަށް ބޯކޮށް ވާރޭވެހުމާއިއެކު ގުގުރާނެކަމަށް ލަފާކުރާކަމަށެވެ.
މިއަދު ހަވީރު 18:00 އާއި ހަމައަށް މޫސުން ލަފާކުރާގޮތަށް ބަލާއިރު، އެ އިދާރާއިން ބުނީ، އުތުރާއި މެދު ރާއްޖެތެރޭގެ އެކި ހިސާބަށް ވިއްސާރަކުރުމާއިއެކު ގުގުރާނެކަމަށާއި، ބައެއް ރަށްތަކަށް ބޯކޮށް ވާރޭވެހޭނެކަމަށް ލަފާކުރެވޭކަމަށެވެ.
ހަމައެއާއިއެކު، ދެކުނުގެ އެކި ހިސާބަށް ކެރީގެ އަސަރު ފޯރާނެކަމަށާއި، ގުގުރާނެކަމަށް ލަފާކޮށް އެއިދާރާއިން ވަނީ ހުރިހާ ފަރާތްތަކުންވެސް މޫސުމަށް ސަމާލުވުމަށް އިލްތިމާސްކޮށްފައެވެ.
Advertisement
This content is created and paid for by advertisers and does not involve Voice Journalists
