ފާއިތުވި 24 ގަޑިއިރު ތެރޭގައި އެންމެ ބޯކޮށް ވާރޭ ވެހުނީ މާލެއަށް ކަމަށް މޫސުމާއި ބެހޭ އިދާރާ (މެޓް އޮފީސް) އިން ބުނެފިއެވެ.
މިގޮތުން އިއްޔެ މާލެއަށް 130.7 މިލިމީޓަރުގެ ވާރޭވެހިފައިވާއިރު، މެޓް އޮފީހުގެ ތަފާސްހިސާބުތަކުން ދައްކާގޮތުގައި ދެވަނައަށް އެންމެ ގިނައިން ވާރޭވެހިފައިވަނީ ހުޅުލެއަށެވެ. މިގޮތުން އިއްޔެ ހުޅުލެއަށް 79.5 މިލިމީޓަރުގެ ވާރޭ ވަނީ ވެހިފައެވެ.
ތިން ވަނަ އަށް އެންމެ ގިނައިން ހުޅުމާލެއަށް ވާރޭވެހިފައިވާއިރު، ފާއިތުވި 24 ގަޑިއިރު ތެރޭގައި އެރަށަށް ވަނީ 70.3 މިލިމީޓަރުގެ ވާރޭ ވެހިފައެވެ.
ރާއްޖޭގެ އެހެން ހިސާބުތަކަށް ބަލާ އިރު، ފާއިތުވި 24 ގަޑިއިރު ތެރޭގައި ދެން އެންމެ ބޯކޮށް ވާރޭ ވެހުނީ ގދ. ކާޑެއްދޫއަށެވެ. މިގޮތުން އެރަށަށް ވަނީ 54.5 މިލިމީޓަރުގެ ވާރޭ ވެހިފައެވެ.
މިއަދުވެސް މޫސުން ގޯސްވާނެކަމަށް ލަފާކޮށް މޫސުމާއި ބެހޭ އިދާރާއިން ރާއްޖޭގެ ބޮޑު ބަޔަކަށް ހުދު ސަމާލު ނެރެފައިވާއިރު، އެ އިދާރާއިން ވަނީ ށ އަތޮޅުން ފެށިގެން ތ އަތޮޅަށް ރީނދޫ ސަމާލު ނެރެފައެވެ.
Advertisement
This content is created and paid for by advertisers and does not involve Voice Journalists
