ރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު މިމަހުގެ 13 ވަނަ ދުވަހު އެސްޓޯނިއާއަށް ވަޑައިގަތުމަށް ހަމަޖެހިފައިވާކަމަށް ރައީސް އޮފިީހުން ބުނެފިއެވެ.

ރައީސް އޮފީހުން ބުނީ، މިމަހުގެ 13 އިން 16 ވަނަ ދުވަހަށް އެސްޓޯނިއާގެ ރައީސް ޑރ. އަލާރ ކާރިސްގެ ދަޢުވަތަކަށް އެގައުމަށް ރައީސް ޑރ.މުޢިއްޒު ކުރައްވާ މި ދަތުރުފުޅަކީ ދިވެހިރާއްޖޭގެ އިސްވެރިޔަކު އެސްޓޯނިއާއަށް ކުރައްވާ ފުރަތަމަ ރަސްމީ ދަތުރުފުޅުކަމަށެވެ.

ރައީސް އޮފީހުން ބުނީ، ރައީސް ޑރ.މުޢިއްޒުގެ މި ދަތުރުފުޅުގައި ދެ ޤައުމުގެ ދެމެދުގައި އޮންނަ ގުޅުން ބަދަހިކުރުމާއި، އެކުގައި މަސައްކަތްކުރުމުގެ ފުރުޞަތުތައް ހޯދުމާއި ގުޅޭގޮތުން މަޝްވަރާކުރެވޭނެކަމަށާއި، މި މަޝްވަރާތަކުގައި ޑިޖިޓަލް، ސައިބަރ އަދި އީ-ގަވަރނަންސްގެ ދާއިރާތަކުންނާއި، މޫސުމާއި ތިމާވެށީގެ މައްސަލަތަކުގައި އަދި ސައިންސާއި ތަޢުލީމުގެ ދާއިރާއިން ދެގައުމުން އެއްބާރުލުން ދެވިދާނެ ދާއިރާތައް ހިމެނޭކަމަށެވެ.

މި ދަތުރުފުޅުގައި ރައީސް ޑރ. މުޢިއްޒު، އެގައުމުގެ ރައީސް ޑރ. ކާރިސް ގެ އިތުރުން އެސްޓޯނިއާގެ ޕާލަމެންޓް 'ރީގިކޯގޫ' ގެ ރައީސް ލައުރި ހުއްސާރއާއި، އެކި ވުޒާރާތަކުގެ ވަޒީރުންނާ ބައްދަލުކުރެއްވުމަށް ހަމަޖެހިފައިވާކަމަށާއި، މީގެ ތެރޭގައި ތަޢުލީމާއި ދިރާސާގެ ވަޒީރު ކްރިސްޓީނާ ކަލާސްއާއި، މޫސުމާބެހޭ ވަޒީރު އެކްސެލެންސީ ޔޯކޯ އަލެންޑަރ، ޞިއްޙަތާބެހޭ ވަޒީރު އެކްސެލެންސީ ރީނާ ސިކުޓް، ޢަދުލު އިންސާފާއި ޑިޖިޓަލް ކަންކަމާބެހޭ ވަޒީރު އެކްސެލެންސީ ލީސާ-ލީ ޕަކޮސްޓާ އަދި ޚާރިޖީ ވުޒާރާގެ ސެކްރެޓަރީ ޖެނެރަލް މިސްޓަރ ޖޮނަތަން ވްސެވިއޯވް ހިމެނޭކަމަށް ރައީސް އޮފީހުން ބުނެއެވެ.

މި ދަތުރުފުޅުގައި ރައީސް ޑރ.މުޢިއްޒު، އެސްޓޯނިއާގެ ދެވަނައަށް އެންމެ ބޮޑު ސިޓީ، ޓާރޓޫ ސިޓީއަށްވެސް ޒިޔާރަތްކުރެއްވުމަށް ހަމަޖެހިފައިވާއިރު، މި ސިޓީގައި ހުންނަ ޓާރޓޫ ޔުނިވަރސިޓީއަކީ ސައިންޓިފިކް ދުނިޔޭގައި ފާހަގަކޮށްލެވޭ ޔުނިވާސިޓީއެކެވެ. އެގޮތުން އެމަނިކުފާނު މި ޔުނިވަރސިޓީއަށާއި، އެތަނުގެ ރިސާޗް އެންޑް ޑިވެލޮޕްމެންޓާއި، އެސްޓޯނިއާގެ ޖީނޯމް ޑޭޓާބޭސް ސެންޓަރަށާއި، ގްރީންއެނަރޖީ ޑޭޓާ ސެންޓަރަށް ޒިޔާރަތްކުރައްވާނެއެވެ.

ރައީސް އޮފީހުން މައުލޫމާތުދޭ ގޮތުގައި، މި ބައްދަލުވުންތަކާއި މަޝްވަރާތަކުގައި އެސްޓޯނިއާގެ ޓެކްނޮލޮޖީގެ ކުރިއެރުންތަކަށް އަލިއަޅުވާލުމަށް ހަމަޖެހިފައިވާއިރު، ރައީސް ޑރ.މުޢިއްޒުގެ މި ދަތުރުފުޅުގައި އެސްޓޯނިއާގެ ރައީސްގެ ޑިޖިޓަލް އެޑްވައިޒަރީ ކައުންސިލުން އިންތިޒާމުކުރާ ބައްދަލުވުމެއްގައިވެސް ބައިވެރިވެވަޑައިގަންނަވާނެއެވެ. މި ބައްދަލުވުމުން ދެ ޤައުމުގެ ދެމެދުގައި އިތުރަށް އެއްބާރުލުން ދެވިދާނެ ދާއިރާތައް ބަލައި ދިރާސާކުރުމުގެ ފުރުޞަތު ލިބިގެންދާނެކަމަށް ރައީސް އޮފީހުން ބުނެއެވެ.

މި ދަތުރުފުޅުގައި ރައީސް ޑރ.މުޢިއްޒުގެ އަރިހުގައި ޚާރިޖީ ވަޒީރު ޑރ. ޢަބްދުﷲ ޚަލީލާއި، ހޯމްލޭންޑް ސެކިއުރިޓީ އެންޑް ޓެކްނޮލޮޖީ ވަޒީރު ޢަލީ އިޙްސާނާއި، ސަރުކާރުގެ އިސް ބޭފުޅުންގެ ވަފުދަކާއިއެކު، ރާއްޖޭގެ ޓެކްނޮލޮޖީ ދާއިރާގެ އިސް ފަރާތްތަކުގެ މައްޗަށް އެކުލެވޭ އެކުލެވޭ އަމިއްލަ ވަފުދެއްވެސް ވަޑައިގަންނަވާއިރު، މި ވަފުދުން އެސްޓޯނިއާގެ ޑިޖިޓަލް ދާއިރާގައި މަސައްކަތްކުރާ ކުންފުނިތަކާއި އިންސްޓިޓިއުޓްތަކާ ބައްދަލުކުރައްވާނެއެވެ.

ޑިޖިޓަލް ޓްރާންސްފޮމޭޝަންއަކީ ރައީސް ޑރ. މުޢިއްޒުގެ އެންމެ މުހިންމު އިސްކަންދެއްވާ ކަންތައްތަކުގެ ތެރެއިން ކަމަކަށްވާއިރު، އެސްޓޯނިއާގެ ޑިޖިޓަލް ޓްރާންސްފޮމޭޝަން އަކީ ދުނިޔޭގެ ފެންވަރުގައި ފާހަގަކޮށްލެވޭ ގައުމެކެވެ. މިގޮތުން މި ގައުމަކީ އީ-ސަރވިސްތަކުގެ ދާއިރާއިން ދުނިޔޭގެ އިސް ސަފުގައި ހިމެނޭ ޤައުމެކެވެ. އަދި މިއީ އީ-ރެޒިޑެންސީ ޕްރޮގްރާމާއި، ކުރިއަރާފައިވާ އީ-ގަވަރނަންސް ޕްލެޓްފޯމްތަކާއި، ސަރުކާރުގެ ޚިދުމަތްތަކުގައި ޑިޖިޓަލް ޙައްލުތައް ފަސޭހަކަމާއެކު ބޭނުންކުރުމުގެ ގޮތުން މަޝްހޫރުވެފައިވާ ޤައުމެކެވެ.