މާފަންނު ސަރަހާ ކައިރީގައި ގާއިމްކޮށްފައިވާ ޕަމްޕް ސްޓޭޝަން ހަލާކުވެފައިވަނީ، މާލެސިޓީ ކައުންސިލްގެ އިހުމާލުންކަމަށް މިނިސްޓަ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ކޮންސްޓްރަކްޝަން މިނިސްޓަރު މުއްތަލިބް މިހެން ވިދާޅުވީ، މާލެއަށް ރޭ ކުރި ވިއްސާރާގައި މާފަންނުކޮޅުގައި ފެންބޮޑުވެ، ފެން ހިންދުމަށް މާފަންނު ސަހަރާކައިރީގައި ގާއިމްކޮށްފައިވާ ޕަމްޕް ސްޓޭޝަނަށް ގެއްލުންވެފައި ހުރުމާ ގުޅިގެންނެވެ.

މުއްތަލިބް އެކްސްގައި ވިދާޅުވީ، މާފަންނު ސަރަހާ ކޮނުމުގެ މަސައްކަތް ސިޓީ ކައުންސިލްގެ މަސައްކަތްކުރާ މީހުން ކުރިއިރު، އެތަނުގައި ހުރި ޕަމްޕް ސްޓޭޝަން، މިނިސްޓްރީއަށް އެނގުމަކާ ނުލައި ރޫޅާލާފައިހުރި ކަމަށެވެ. މިނިސްޓަރު ވިދާޅުވީ، އެއީ ވަރަށް ޒިއްމާދާރުކަން ކުޑަ އަމަލެއްކަމަށާއި، ޕަމްޕް ސްޓޭޝަން ރޫޅާލާފައިވުމުން އެ ސަރަހައްދުގައި ފެންބޮޑުވުމުގެ މައްސަލަ ދިމާވެފައިވާކަމަށެވެ.

Advertisement

މިނިސްޓަރު މުއްތަލިބުގެ އެވާހަކަތަކަށް ރައްދުދެއްވަމުން މާލޭގެ މޭޔަރު އާދަމް އާޒިމް ވިދާޅުވީ، ޕަމްޕް ސްޓޭޝަން ހަލާކުވެފައި ހުންނަތާ އެތައް ދުވަހެއް ވެއްޖެ ކަމަށާއި، އެކަން މިނިސްޓަރު މުއްތަލިބުގެ ސަމާލުކަމަށް މީގެކުރިން ގެނެސްފައިވާނޭކަމަށެވެ. އެގޮތުން  މިނިސްޓަރުގެ ސަމާލުކަމަށް ލިޔުމުން މީގެ ކުރިން ގެނެސްފައިވާނޭކަން ފާހަގަކުރައްވަމުން އާޒިމް ވަނީ އެކަމާ ގުޅޭ ލިޔެކިޔުންތައް ސޯޝަލް މީޑިއާގައި ހިއްސާކުރައްވާފައެވެ.

މޭޔަރު އާޒިމްގެ އެ ޕޯސްޓަށް ރައްދުދެއްވަމުން މިނިސްޓަރު މުއްތަލިބް ވިދާޅުވީ، އެ ޕަމްޕް ސްޓޭޝަން މިދިޔަ ހަފްތާގައިވެސް މަސައްކަތްކުރި ކަމަށާއި، މިނިސްޓްރީގެ ފަރާތުން ޕަމްޕް ސްޓޭޝަންތަކުގެ ހާލަތު ގަވާއިދުން ބަލަމުންގެންދާކަމަށެވެ.

މިނިސްޓަރު ވިދާޅުވީ ޕަމްޕް ސްޓޭޝަން ގާއިމްކޮށްފައި ހުރި ސަރަހައްދު ކޮނުމުގެ މާނައެއް ނެތްކަމަށާއި، އެ ސްޓޭޝަން ގާއިމްކުރީ އެތަންކޮނެ ގަބުރުތައް ނަގައި ސާފުކުރުމަށްފަހު ކަމަށެވެ

މާލޭގެ މާފަންނު ސަރަހައްދަކީ ވާރޭ ވެހިއްޖެނަމަ އެންމެބޮޑަށް ފެންބޮޑުވާ އަވަށެވެ. މާފަންނު ސަރަހައްދަށް ބޮޑުވާ ފެންގަނޑު ހިންދުމަށް މީގެކުރިން އެތައް މަސައްކަތްތަކެއް ކުރިނަމަވެސް ހާއްސަ ގޮތެއްގައި މާފަންނު ސަރަހައްދު ފެންބޮޑުވުމުގެ މައްސަލައަށް ހައްލެއް އައިސްފައެއް ނުވެއެވެ.