މާލެސިޓީގައި އިމާރާތެއް ކުރަމުންދަނިކޮށް، ޖެހިގެންހުރި ގޭގެ ބައެއް ގަނބައިގެންފިއެވެ.

މާލެސިޓީ ކައުންސިލުން ބުނީ މި ހާދިސާ ހިނގާފައިވަނީ، މ. ނެވިގޭޓާ އިމާރާތްކުރަމުންދަނިކޮށް ކަމަށެވެ. ގަނބައިގަނެފައިވަނީ މ.ލަކީހެވަންގެ ބައެކެވެ. ލަކީހެވަން އިމާރާތުގެ ބައެއް ގަނބައިގަތުމާއި ގުޅިގެން އެ ގެއިން މީހުން ހުސްކުރުމުގެ މަސައްކަތް ކުރިއަށްދާކަމަށް މާލެސިޓީ ކައުންސިލުން ވަނީ ބުނެފައެވެ. މިކަމާ ގުޅިގެން އެ ގޭގެ ފާރުތަކުގައި ވަނީ ރެނދުވެސް އަޅާފައެވެ. 

މާލެސިޓީ ކައުންސިލުން ބުނީ މި ހާދިސާގައި އެއްވެސް މީހަކަށް އަނިޔާވެފައި ނުވާކަމަށެވެ. މިކަން ފާހަގަވީ މިއަދު މެންދުރުފަހުގެ ވަގުތެއްގައެވެ. ސިޓީ ކައުންސިލުން ބުނީ މ.ލަކީހެވަންގެ އަޑިއަށްދިއުމުގެ މި މައްސަލަ ދިމާވި ސަބަބެއްަކަމަށް ބެލެވެނީ ޝީޓްޕައިލްނުކޮށް އިމާރާތް ކުރަމުންދިއުމުންކަމަށް ފާހަގަކުރެވޭ ކަމަށެވެ. 

މ.ލަކީހެވަންގައި ދިރިއުޅެމުން އައި މީހުން އެހެން ތަނަކަށް ބަދަލުކުރުމުގެ މަސައްކަތް ފަށާފައިވާއިރު، އެގޭގައި ހަތަރު އާއިލާއެއް ދިރިއުޅެމުންދާކަމަށް މައުލޫމާތު ލިބެއެވެ.