މި ރަމަޟާން މަހު ކޮންމެ ގޭބިސީއަކަށް 48 ދަޅުގެ މަސްކޭހެއް ދިނުމަށް ހަމަޖެހިފައިވާކަމަށް މިފްކޯއިން ހާމަކޮށްފިއެވެ.

މިރަމަޟާން މަހު ރާއްޖޭގެ ކޮންމެ ގޭބިސީއަކަށް މަސްދަޅު ކޭހެއް ހަދިޔާ ކުރައްވާނެ ކަމަށް މީގެކުރިން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެފައިވާއިރު، މިފްކޯއިން ދައުލަތުގެ މީޑިއާ، ޕީއެސްއެމަށް މައުލޫމާތު ދެމުން ބުނީ، މިކަމަށްޓަކައި ތައްޔާރުވަމުންދާކަމަށެވެ.

މިގޮތުން މިފްކޯއިން ބުނީ، ކުރިއަށް އޮތް ރަމަޟާން މަހު ކޮންމެ ގޭބީސީއަކަށް ދިނުމަށް ހަމަޖެހިފައިވަނީ 48 ދަޅުގެ މަސްކޭހެއް ކަމަށާއި، މިފްކޯއިން ކޮންމެ ރަމަޟާން މަހަކަށް ލައްކައަކާ ގާތްކުރާ އަދަދަކަށް މަސްދަޅު އުފައްދާއިރު، ރައީސް ޑރ.މުޢިއްޒުގެ މިވައުދުފުޅާއިއެކު، އިތުރު މަސްދަޅު އުފެއްދުމުގެ މަސައްކަތް ކުރަމުން އަންނަކަމަށެވެ.

Advertisement

މިއީ  އެސްޓީއޯއާ ގުޅިގެން ކުރިއަށްގެންދާ މަސައްކަތެއްކަން ފާހަގަކޮށް މިފްކޯއިން ބުނީ، އަންނަ މަހު މަސްދަޅުތައް ތައްޔާރުކޮށް ނިމުމުން ގޭބީސީތަކަށް މަސްދަޅު ކޭސް ދޫކުރާނެގޮތްތައް ރާވަމުން އަންނަކަމަށެވެ.

މިދިޔަ އަހަރު ސަރުކާރުން 82،000 ގޭބީސީއަކަށް ކާޑު ހަދިޔާ ކޮށްފައިވާއިރު، ކޮންމެ ގޭބީސީއަކަށް މިއަހަރު މަސް ހަދިޔާކުރުމަށް ރައީސް ޑރ.މުޢިއްޒު ނިންމަވާފައިވާއިރު، މި ރޭޓުން ބަލާނަމަ 82،000 ގޭބިސީއަށް 62.9 މިލިޔަން ރުފިޔާގެ މަސްދަޅު ހަދިޔާ ކުރެވޭނެއެވެ.

ހަމަމިއާއިއެކު، މިދިޔަ އަހަރެކޭވެސް އެއްފަދައިން މިއަހަރުވެސް ހުރިހާ ގޭބިސީއަކަށް ފެން ބިލާއި ކަރަންޓު ބިލުން ޑިސްކައުންޓް ދެއްވުމަށްވެސް ރައީސް ޑރ.މުޢިއްޒު ވަނީ ނިންމަވާފައެވެ.