ޑިމޮކްރެޓްސް ލީޑަރޝިޕްގައި ތިއްބެވި ބައެއް ބޭފުޅުން ޕާޓީ ދޫކޮށްލެއްވީ އެއްވެސްކަހަލަ މައްސަލައެއް ޖެހިގެނެއް ނޫންކަމަށް ޑިމޮކްރެޓްސް ހިންގުމާ ވަގުތީގޮތުން ހަވާލުވެ ހުންނެވި، ހުސައިން ފިރުޝާން ވިދާޅުވެއްޖެއެވެ.

ޑިމޮކްރެޓްސްގެ ރައީސަކަށް ހުންނެވި ހަސަން ލަތީފާއި، އެޕާޓީގެ ނައިބުރައީސްއަކަށް ހުންނެވި ޝިފާޒް އިއްޔެ އެޕާޓީން ވަކިވެ ވަޑައިގެން، މިއަދު ވަނީ އެމްޑީޕީއާ ގުޅިވަޑައިގެންނެވިކަން އިއުލާނުކުރައްވާފައެވެ.

ޑިމޮކްރެޓްސްގެ ލީޑަރޝިޕްގެ ބައެއް ބޭފުޅުން އެ ޕާޓީ ދޫކޮށްދިއުމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ފިރުޝާން ވިދާޅުވީ، އެބޭފުޅުން ޕާޓީ ދޫކޮށްލެއްވީ އެއްވެސް މައްސަލައެއް ޖެހިގެން އަދި ހިޔާލުތަފާތުވުމެއް އޮވެގެނެއް ނޫންކަމަށެވެ. ޑިމޮކްރެޓްސް ދޫކޮށް ދިޔަ ބޭފުޅުންނަކީ އެޕާޓީއަށް ވަރަށް ހިދުމަތްތެރި ބޭފުޅުންކަމަށާއި، އެކަން ބަލައިގަންނަކަމަށެވެ. ފިރުޝާން ވިދާޅުވީ މިއީ ސިޔާސީ ޕާޓީގެ ހަޔާތުގައި އަންނާނޭ ދުވަސްތައް ކަމަށާއި، އެޕާޓީން ކުރިއަށްދާނީ އެކަންކަމާ ކުރިމަތިލައިގެން ކަމަށެވެ. ފިރުޝާން ވިދާޅުވީ ޕާޓީ ދޫކޮށް ލީޑަރޝިޕްގެ ބައެއް ބޭފުޅުން ދިޔަނަމަވެސް އެޕާޓީއަށް ހީނަރުކަމެއް ނާންނާނެ ކަމަށާއި، ޕާޓީ ދާނީ ސިޔާސީ ހަރަކާތްތަކައިގެން ކުރިއަށެވެ. 

މިގޮތުން މާދަމާޭ ބޭއްވުމަށް ހަމަޖެހިފައިވާ ޑިމޮކްރެޓްސްގެ ޖެނެރަލް އެސެމްބްލީއަށްފަހު، ޕާތީގެ މުސްތަގްބަލުގެ ލީޑަރޝިޕް ކަނޑައެޅިގެންދާނޭކަމަށްވެސް ފިރުޝާން ވިދާޅުވިއެވެ.

ނޫސްވެރިންގެ ބައްދަލުވުމެއްގައި ވާހަކަދައްކަވަމުން ޑިމޮކްރެޓްސްގެ މެމްބަރު އިމްތިޔާޒް ފަހުމީ ވިދާޅުވީ، ރާއްޖޭގައި ހަރަކާތްތެރިވާ ސިޔާސީ ޕާޓީތަކުގެ ތެރެއިން ޑިމޮކްރެޓްސް އަކީ އެންމެ ސާފު މެމްބަރުންތިބި ޕާޓީކަމަށާއި، ކުރިއަށްއޮތްތަނުގައި ޑިމޮކްރެޓްސް ފެނިގެންދާނީ ރައްޔިތުންގެ އެންމެ އުއްމީދީ ޕާޓީގެ ގޮތުގައެވެ. މިގޮތުން ޑޮމޮކްރެޓްސް ވެގެންދާނީ ރައްޔިތުން އިތުބާރުކުރާފަދަ ސިޔާސަތުތަކެއް އެކުލަވާލާނެ ޕާޓިއަކަށްކަމަށް އިންތި ވިދާޅުވިއެވެ. އިންތި ވިދާޅުވީ މިވަގުތު ޑިމޮކްރެޓްސް ތެރެއިން އިތުރުބަޔަކު ޕާޓީދޫކޮށް ދާން ނޫޅޭކަމަށާއި ރައީސް ނަޝީދުވެސް ހުންނެވީ ޑިމޮކްރެޓްސްއާ އެކުގައިކަމަށެވެ.