އެމްޑީޕީއަކީ ދިވެހިރާއްޖެއަށް އުއްމީދާއި ހެޔޮ ބަދަލު ގެނެސްދޭ، ފަޚުރުވެރި ޕާޓީކަމަށް އެޕާޓީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

ޝާހިދު މިހެން ވިދާޅުވީ، އެމްޑީޕީގެ ކުރީގެ ބައެއް އިސް ބޭފުޅުން އެނބުރި އެޕާޓީއާއި ގުޅިވަޑައިގަތުމާއި ގުޅިގެން އެބޭފުޅުންނަށް މަރުޙަބާ ދަންނަވައި، އެކްސް ޕްލެޓްފޯމްގައި ކުރެއްވި ޕޯސްޓެއްގައެވެ. މީގެކުރިން އެމްޑީޕީގެ އިސް މަގާމުތަކެއްގައި ތިއްބެވި ބޭފުޅުންކަމަށްވާ، މުހައްމަދު ޝިފާޒް އަދި ހަސަން ލަތީފް ވަނީ ޑިމޮކްރެޓްސްއިން ވަކިވެ ވަޑައިގަތުމަށްފަހު މިއަދު އެމްޑީޕީއާ ގުޅިވަޑައިގަންނަވާފައެވެ.

އެމްޑީޕީއާ އަލަށް ގުޅިވަޑައިގެންނެވި އެޕާޓީގެ ކުރީގެ ނައިބު ރައީސް މުހައްމަދު ޝިފާޒްއާއި، ކުރީގެ ޗެއާޕަރސަން ހަސަން ލަތީފް، އަދި ކުރީގެ ޕީޖީ ލީޑަރު އަލީ އާޒިމްގެ އިތުރުން ޕާޓީގެ ޕޮލިސީ ކޮމިޓީގެ ކުރީގެ މުގައްރިރު އަދި އެސްޓީއޯގެ ކުރީގެ އެމްޑީ ހުސެން އަމްރު އަށް ޝާހިދު ވަނީ މަރުހަބާ ވިދާޅުވެފައެވެ.

ޝާހިދު ވިދާޅުވީ އެނާ އެދިވަޑައިގަންނަވަނީ ޑިމޮކްރަސީ ހަރުދަނާކޮށް، ރައްޔިތުންގެ ބާރުވެރިކަން އިތުރުކުރުމަށް އެމްޑީޕީ އިން ކުރަމުންގެންދާ މަސައްކަތްތަކުގައި ބައިވެރިވެވަޑައިގަތުމަށް ވީހާވެސް ގިނަ ބޭފުޅުން އެޕާޓީއާ ގުޅިވަޑައިގަތުމަށް ކަމަށެވެ.

ޑިމޮކްރެޓްސްގެ ލީޑަރޝިޕްގައި ތިއްބެވި ބައެެއް ބޭފުޅުން އެޕާޓީން ވަކިވެ ވަޑައިގެންނެވިނަމަވެސް އެޕާޓީއަށް ނިސްބަތްވާ އިތުރު ބޭފުޅަކު ޕާޓީން ވަކިވާކަށް އަދި ނެތްކަމަށް އިމްތިޔާޒް ފަހުމީ ވަނީ ވިދާޅުވެފައެވެ. މީގެ އިތުރުން ރައީސް ނަޝީދު އަދިވެސް ހުންނެވީ ޑިމޮކްރެޓްސްއާއެކު ކަމަށާއި، އެމަނިކުފާނު އެމްޑީޕީއަށް ދިއުމުގެ ވާހަކައެއް އަދި ނެތްކަމަށް އިންތި ވަނީ މިއަދު ވިދާޅުވެފައެވެ.