އުމްރާއަށް މީހުން ގެންދިއުމުގެ އުޞޫލާ ޚިލާފުވެފައިވާތީ 19 ކުންފުންޏެއް ޖޫރިމަނާ ކޮށްފިއެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވި ގޮތުގައި، އުޞޫލާ ޚިލާފުވި މިންވަރަށް ބަލައި، 19 ކުންފުންޏެއް 5,000 ރުފިޔާއިން ޖޫރިމަނާ ކުރުމަށް ނިންމާފައިވެއެވެ.
މީގެ އިތުރުން، އުމްރާއަށް މީހުން ގެންދިއުމަށް މިނިސްޓްރީން ދޫކޮށްފައިވާ ރަސްމީ ލައިސަންސް ބޭނުންކޮށްގެން އުމްރާއަށް ދިއުމަށް ކަމަށް ބުނެ އެމްއެމްއޭ އިން ޑޮލަރު ނަގައި، އުމްރާއަށް ނުގޮސް ހުރި ކުންފުންޏެއް ފާހަގަކުރެވިފައިވާ ކަމަށްވެސް ވަޒީރު ވިދާޅުވިއެވެ.
"މި މައްސަލަ އިތުރަށް ބަލައި، މިނިސްޓްރީއަށް މިކަން ސާބިތުވެއްޖެނަމަ، އެ ކުންފުނި 30,000 ރުފިޔާއިން ޖޫރިމަނާކޮށް، ހުއްދަ ހިފަހައްޓައި، މައްސަލަ ތަޙްޤީޤު ކުރުމަށް ފުލުހުންނާ ހަވާލުކުރެވޭނެ," ވަޒީރު ވިދާޅުވިއެވެ.
މި ފިޔަވަޅު އަޅަން ޖެހުނު ސަބަބެއްގެ ގޮތުގައި ވަޒީރު ފާހަގަކުރެއްވީ، ޑޮލަރު ދޫކުރެވެނީ ފުރުމުގެ ޓިކެޓާއި ކަމާބެހޭ ލިޔެކިޔުންތައް ހުށަހެޅުމުން ކަމަށާއި، މި ހާލަތުގައި ދޮގު ލިޔެކިޔުންތަކެއް ހުށަހަޅާފައިވާ ކަމަށް ތުހުމަތުކުރެވޭތީ ކަމަށެވެ.
ވަޒީރު އިތުރަށް ވިދާޅުވީ، އުމްރާއަށް މީހުން ގެންދިއުމުގައި ޢަމަލުކުރަން ގެޒެޓްކޮށްފައިވާ އުޞޫލަށް ޢަމަލު ނުކުރާ ހުރިހާ ކުންފުނިތަކަށް ފިޔަވަޅު އެޅޭނެ ކަމަށެވެ.
Advertisement
This content is created and paid for by advertisers and does not involve Voice Journalists
