އެމްޑީޕީ އާއި ދަ ޑިމޮކްރެޓްސް ވެސް ފުރިހަމައަށް ހިންގުމަކީ ރާއްޖޭގެ ސިޔާސީ މަޝްރަހަށް ނުހަނު މުހިންމު ކަމެއް ކަމަށް އެސްޓީއޯގެ ކުރީގެ އެމްޑީ އަދި ދަ ޑިމޮކްރެޓްސް ޕާޓީ އުފެއްދުމުގައި އިސްކޮށް އުޅުއްވި ހުސައިން އަމްރު ވިދާޅުވެއްޖެއެވެ.

އަމްރު މިހެން ވިދާޅުވެފައިވަނީ އޭނާގެ އެކްސް އެކައުންޓްގައި ކުރެއްވި ޕޯސްޓެއްގައެވެ.

މި ޕޯސްޓްގައި އަމްރު ފާހަގަކުރައްވާފައިވަނީ ދެ ޕާޓީގައި ވެސް ތިބީ ގިނަ ދުވަހު އެކުގައި ސިޔާސީ މަސައްކަތް ކުރެވިފައިވާ ރައްޓެހިން ކަމަށެވެ.

"ދަ ޑިމޮކްރެޓްސްގައި ތިބީ ވެސް އެކުގައި ގިނަ ސިޔާސީ މަސައްކަތް ކުރެވިފައިވާ ރައްޓެހިން. އެމްޑީޕީގައި ވެސް ތިބީ ފާއިތުވި ވިއްސަކަށް އަހަރު އެކި ގޮތްގޮތުން އެކީގައި މަސައްކަތް ކުރެވިފައިވާ ރައްޓެހިން،" އަމްރު ވިދާޅުވިއެވެ.

އަމްރު އިތުރަށް ފާހަގަކުރެއްވި ގޮތުގައި ދަ ޑިމޮކްރެޓްސްގައި ތިބީ ޤާބިލު، ހިތްވަރުގަދަ އަދި ސިޔާސީ ކުރިމަގު އުޖާލާ ޒުވާން ލީޑަރުންނެވެ. އަދި އެ ބޭފުޅުންނަށް އޭނާ އެދެނީ ކުރިއެރުމާއި ކާމިޔާބީ ކަމަށް ވެސް ވިދާޅުވިއެވެ.

"އެމީހެއްގެ ވިސްނުން ހުރި ގޮތަކަށް ކުރިޔަށް ދިޔުމަކީ އެންމެނަށް ވެސް އެންމެ ރަނގަޅު ގޮތް ކަމުގައި ދެކެން،" އަމްރު ވިދާޅުވިއެވެ.

އެމްޑީޕީގެ އެތެރޭގެ ހަމަނުޖެހުންތަކުގެ ތެރެއިން އެ ޕާޓީ ދޫކޮށް ދަ ޑިމޮކްރެޓްސް ނަމުގައި އައު ޕާޓީއެއް އުފެއްދުމުގައި އެންމެ އިސްކޮށް އުޅުއްވި އެކަކީ އަމްރެވެ. ނަމަވެސް އޭނާ މިހާރު ވަނީ ދަ ޑިމޮކްރެޓްސް ދޫކޮށް އަލުން އެމްޑީޕީއާ ގުޅިފައެވެ.