އިންޑިއާގެ އުތުރުގެ ފަރުބަދަތައް ކަނޑައިގެން ހަދާފައިވާ 6.4 ކިލޯމީޓަރުގެ ޓަނަލެއް ބޮޑުވަޒީރު މޯދީ ހުޅުވައިދެއްވައިފިއެވެ.
ފިނިމޫސުމުގައި، ކޮންމެ އަހަރަކު 4 ވަރަކަށް މަސްދުވަހަށްވުރެ ގިނަ ދުވަހު ސްނޯގެ ސަބަބުން މި ޓަނަލް ކަނޑާފައިވާ ސަރަހައްދު އޮންނަނީ އެއްގަމު ދަތުރުފަތުރު ނުކުރެވޭތީ އެހެން ސަރަހައްދުތަކާ އެކަހެރިވެފައެވެ. އެހެންކަމުން އެސަރަހައްދާއި އިންޑިއާގެ އެހެން ސަރަހައްދުތައް ގުޅާލުމަށް މިއީ މުހިއްމު ޓަނަލެކެވެ.
ސޮންމާގް ނުވަތަ ޒީ-މޯރހް ގެ ނަމުން ނަންދީފައިވާ މި ޓަނަލް ގުޅާލާ ސަރަހައްދަކީ އިންޑިއާގެ އުތުރުން ޗައިނާ އަދި ޕާކިސްތާނާއި ސަރަހައްދީ އިން ވަކިވާ ސަރަހައްދުވެސް މެއެވެ. މި ޓަނަލް ވެގެންދާނީ ހަނގުރާމައިގެ ހާލަތެއްގައި ސަރަހައްދީ އިމުގެ ކައިރިއަށް ސިފައިންނާއި ހަތިޔާރާއި އުޅަނދުފަހަރު އުނދަގުލެއް ނެތި ގެންދާނެ މަގަކަށްވެސްމެއެވެ. ހަމައެއާއެކު ލަދަކްއާއި ކަޝްމީރު ގުޅުވައިދޭ މަގަކަށްވެސް މި ޓަނަލް ވެގެންދާނެއެވެ.
313 މިލިއަން އެމެރިކާ ޑޮލަރު ޚަރަދުކޮށްގެން ހެދި މި ޓަނަލްގެ މަސައްކަތްކުރަނިކޮށް ކަޝްމީރުގެ ހަނގުރާމަވެރިން ވަނީ ޓަނަލްގެ މަސައްކަތުގައި އުޅުނު 7 މީހަކު މިދިޔަ އޮކްޓޯބަރު މަރާލާފައެވެ.
ޓަނަލް ހިމެނޭ މަގުގައި 13 ކިލޯމީޓަރުގެ އިތުރު ޓަނަލެއް ހެދުމުގެ މަސައްކަތްވެސް އިންޑިއާއިން ދަނީ ކުރަމުންނެވެ. އެޓަނަލުގެ މަސައްކަތް އަންނަ އަހަރުގެ ނިޔަލަށް ނިންމާލެވޭނެކަމަށް އިންޑިއާގެ ކަމާ ބެހެ ފަރާތްތަކުން އަންދާޒާކުރެއެވެ.
Advertisement
This content is created and paid for by advertisers and does not involve Voice Journalists
