ފުވައްމުލަކުގައި ޓޫރިޒަމް ތަރައްގީ ކުރަން ހާއްސަކޮށް ނުވަ ބިމެއް ކުއްޔަށް ދޫކުރަން ކައުންސިލުން ނިންމައި ބިންތައް އިއުލާނުކޮށްފި އެވެ.

ފުވައްމުލަކު ސިޓީ ކައުންސިލުން ބުނީ، މި ދޫކުރެވޭ ބިންތަކަކީ ބަނދަރު ސަރަޙައްދުން ޑައިވިންގ ސްކޫލްގެ ބޭނުމަށް ދޫކުރުމަށް ހަމަޖެހިފައިވާ ބިންތަކެއް ކަމަށެވެ. އަދި ދޫކުރެވޭ ބިންތަކަކީ 1200 އަކަފޫޓްގެ 09 ބިން ކަމަށެވެ.

މީގެ އިތުރުން އެ ކައުންސިލުން ބުނީ، ބިން ކުއްޔަށް ދިނުމަށް ހަމަޖެހިފައިވަނީ ބިޑު ޑޮކިއުމެންޓް ވިއްކައިގެން ކަމަށާ، އެގޮތުން ބިޑް ޑޮކިއުމެންޓެއްގެ އަގަކީ $100.00 (އެއްސަތޭކަ އެމެރިކާ ޑޮލަރ) ކަމަށެވެ. އަދި (IUL)468-APS/468/2024/251 ނަންބަރ އަދި (IUL)468-APS/468/2024/314 ނަންބަރ އިޢުލާން އާއި ގުޅިގެން ބިޑް ގަނެފައިވާ ފަރާތްތަކުން އިތުރަށް ފައިސާ ދައްކާކަށް ނުޖެހޭނެ ކަމަށެވެ.

ބިޑް ޑޮކިއުމެންޓް ގަތުމަށް ބޭނުންވާ ފަރާތްތަކުން މިއަދުން ފެށިގެން 21 ޖެނުއަރީ 2025 ވާ އަންގާރަ ދުވަހުގެ މެންދުރު 13:00 ގެ ކުރިން ފުވައްމުލަކު ސިޓީ ކައުންސިލް އިދާރާގެ ޕްރޮކިއުމަންޓް ޔުނިޓްގެ މެއިލްއަށް ([email protected]) ބިޑް ގަންނަން ބޭނުންވާ ފަރާތުގެ ތަފްސީލާއިއެކު (ފަރުދެއްނަމަ ނަމާއި އެޑްރެސް/ ކުންފުންޏެއް ނަމަ ކުންފުނީގެ ނަމާއި އެޑްރެސް/ ފޯން ނަންބަރު/ އީމެއިލް އެޑްރެސް) މެއިލްކުރުމަށް އެދިފައިވެއެވެ.

އަދި ރަޖިސްޓްރީ ކުރި ފަރާތްތަކަށް ބިޑް ވިއްކުން އޮންނާނީ 22 އަދި 23 ޖެނުއަރީ 2025 ގެ ރަސްމީ ގަޑީގައި ކަމަށްވެސް ބުންޏެވެ. 

ބީލަމާއި ގުޅޭ މައުލޫމާތު ބައްދަލުވުން 27 ޖެނުއަރީ ވާ ހޯމަ ދުވަހު 11:00 ގައި ފުވައްމުލަކު ސިޓީ ކައުންސިލްގެ އިދާރާގެ ކުރުނދުމާ މާލަމް ގައި އޮންނާނެ ކަމަށްވެސް އިއުލާނުގައި ވެއެވެ. 

އަދި ބީލަން ހުށަހެޅުމާއި ބީލަން ހުޅުވުން އޮންނާނީ 02 ފެބްރުވަރީ 2025 ވާ އާދީއްތަ ދުވަހުގެ 11:00 ގައި ފުވައްމުލަކު ސިޓީ ކައުންސިލްގެ އިދާރާގެ ކުރުނދުމާ މާލަމް ގައި ކަމަށް ބުނެފައިވެއެވެ. 

ފުވައްމުލަކު ބަނދަރު ސަރަޙައްދުން ޓޫރިޒަމް ބޭނުމަށް މިދިޔަ އަހަރުވެސް ބިންތަކެއް ދޫކޮށްފައިވެ އެވެ.