ރ. އިނގުރައިދޫ ކައުންސިލަށާއި ލ. މާވަށު ކައުންސިލަށް ފަޅުރަށެއް ހަވާލުކުރުމަށް ނިންމާފައިވާ ކަމަށް ސިޓީ ތަކާއި އިދާރީ ދާއިރާތައް ހިންގުމާ ބެހޭ ވަޒީރު އާދަމް ޝަރީފް އުމަރު މިއަދު ހާމަކުރެއްވިއެވެ.

މިނިސްޓަރ އާދަމް ޝަރީފް އުމަރު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި، ރައީސް މުޙައްމަދު މުޢިއްޒުގެ ސިޔާސަތުގެ ދަށުން ކައުންސިލްތަކަށް ފަޅުރަށް ލިބޭގޮތަށް އިޢުލާނު ކުރެއްވި ޕްރޮޕޯސަލްގެ ދަށުން މި މަސައްކަތް ކުރިއަށް ގެންދިއުމަށް ނިންމަވާފައިވެއެވެ.

މިނިސްޓަރ އާދަމް ޝަރީފް އުމަރުގެ ޕޯސްޓުގައި ވިދާޅުވެފައިވާ ގޮތުގައި، މިނިސްޓްރީ އޮފް ފިނޭންސް އެންޑް ޕްލޭނިންގ އާއި މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް ޓެކްނޮލޮޖީ އާ ގުޅިގެން މި މަސައްކަތް ކުރިއަށް ގެންދާނެއެވެ.

Advertisement

މިގޮތުން ރ. އިނގުރައިދޫ ކައުންސިލަށް ރ. ނޭވާ، އަދި ލ. މާވަށު ކައުންސިލަށް ލ. ބޮޑުމާބުޅަލި ހަވާލުކުރުމަށް ވަނީ ނިންމާފައެވެ.

މީގެ އިތުރުން ދ. އަތޮޅު ކައުންސިލަށް ދ. މިނިމަސްގަލި އަދި ދ. ފެންފުށި ހަވާލުކުރުމަށްވެސް ވަނީ ނިންމާފައެވެ.

މިނިސްޓަރ އާދަމް ޝަރީފް އުމަރު އޭނާގެ ޕޯސްޓުގައި ރ. އިނގުރައިދޫ، ދ. އަތޮޅު އަދި ލ. މާވަށު ކައުންސިލް އަށާއި އެ ރަށްރަށުގެ ހުރިހާ ރައްޔިތުންނަށް މަރުޙަބާ ދަންނަވާފައިވެއެވެ.