މާލެ ސަރަހައްދުގެ ފެނުގެ ނިޒާމް ކަށަވަރުކުރުމުގެ ގޮތުން އެމްޑަބްލިއުއެސްސީން ކުރިއަށްގެންދާ މާލެ އާއި ހުޅުމާލޭގެ ފެނުގެ ވިޔުގަ ގުޅާލުމުގެ މަސައްކަތް ނިމި މިއަހަރުގެ ދެވަނަ ކުއާޓަރ ނިމުމުގެ ކުރިން މި ނިޒާމް ބޭނުންކުރަން ފެށޭނޭކަމަށް ޤައުމީ ފެން ކުންފުނިން ބުނެފިއެވެ.

މާލެ އާއި ހުޅުމާލޭގެ ފެނުގެ ވިޔުގަ ގުޅާލުމުގެ މަސައްކަތް މިހާރު ކުރިއަށްދާގޮތާ ބެހޭގޮތުން އެމްޑަބްލިއުއެސްސީން ބުނީ، މާލެ އާއި ހުޅުމާލޭގެ ފެނުގެ ވިޔުގަ ގުޅާލުމުގެ މަޝްރޫޢުގެ 65 އިންސައްތަ މަސައްކަތް މިހާރު ނިމިފައިވާ ކަމަށެވެ. އެމްޑަބްލިއުއެސްސީން މިހާރު ކުރިއަށްދާ މަސައްކަތްތަކުގެ ތެރޭގައި މާލެއާއި ހުޅުމާލެއާއި ދެމެދު އަޅާފައިވާ، 20 އިންޗި ޑައިމީޓަރ، 5 ކިލޯމީޓަރ ދިގު މައި ހޮޅި ސާފުކޮށް ޑިސްއިންފެކްޓް ކުރުމުގެ އިތުރުން ޕްރެޝަރ ޓެސްޓް ކުރުމުގެ މަސައްކަތްވެސް ފެށިފައިވާކަމަށެވެ.

މި މަޝްރޫޢުގެ ދަށުން މާލެއާއި ހުޅުމާލޭގައި ޤާއިމްކުރެވޭ ޓްރާންސްފަރ ޕަމްޕް ސްޓޭޝަންތަކުގެ ފައުންޑޭޝަން މަސައްކަތްތައް ނިންމާ އިމާރާތުގެ އޮނިގަނޑުގެ މަސައްކަތްތައްވަނީ ފެށިފައެވެ. މިގޮތުން، މާލޭގެ ޕަމްޕް ސްޓޭޝަންގެ މުޅި މަސައްކަތުގެ %25 އިންސައްތަ މަސައްކަތް ނިމިފައިވާއިރު ހުޅުމާލޭގެ ޕަމްޕް ސްޓޭޝަންގެ %60 އިންސައްތަ މަސައްކަތް މިހާރު ނިމިފައިވާކަމަށް ފެން ކުންފުނިން ބުނެއެވެ. ޕަމްޕްސްޓޭޝަންތަކުގެ ޢިމާރާތްތަކުގެ މަސައްކަތް ނިންމުމަށް އަމާޒުކުރެވިފައިވަނީ އަންނަ މާޗްމަހުގެ ނިޔަލަށެވެ.

ޕަމްޕް ސްޓޭޝަން ގާއިމްކުރުމުގެ މަސައްކަތުގައި... ފޮޓޯ: އެމްޑަބްލިއުއެސްސީ

އެމްޑަބްލިއުއެސްސީން ބުނީ ޕަމްޕް ސްޓޭޝަން ޢިމާރާތްތަކުގެ މަސައްކަތްތައް ނިމުމުން ޕަމްޕްތައް ބަހައްޓައި މިއަހަރުގެ ޖުލައިމަސް ފެށުމުގެ ކުރިން މި ނިޒާމްގެ ބޭނުންކުރަން އަމާޒުހިފާފައިވާކަމަށެވެ.

ޤައުމީ ފެންކުންފުނިން ބުނީ، ހުޅުމާލެ އާއި މާލޭގެ ފެނުގެ ވިޔުގަ ގުޅާލުމުގެ މަޝްރޫޢު ނިމުމުން، މާލެއިން ހުޅުމާލެއަށް ނުވަތަ ހުޅުމާލެއިން މާލެއަށް، ގަޑިއަކު 800 ޓަނުގެ ފެން ޕަންޕުކުރުމުގެ ގާބިލްކަން ލިބިގެންދާނެއެވެ. މީގެ ސަބަބުން، މާލެ ސަރަހައްދުގެ ފެނުގެ ޚިދުމަތުގެ ކަށަވަރުކަން އިތުރުވެގެން ދާނޭކަމަށް ފެން ކުންފުނިން ބުނެއެވެ.

މާލެ އާއި ހުޅުމާލެއާ ދެމެދު ފެނުގެ ނިޒާމަކުން ގުޅާލުމަށް މަސައްކަތް ފެށީ 2016 ވަނަ އަހަރުގެ ތެރޭގައެވެ. ނަމަވެސް ދިމާވި އެކިއެކި ސަބަބުތަކާހުރި މި މަސައްކަތް ހުއްޓި ވަނީ ދިގުލައިގެންގޮސްފައެވެ.