ނ. ހޮޅުދޫ، ޒަކިއްޔާ މޫސާގެ މަރުގެ މައްސަލައިގެ ތަހުގީގަށް އިތުރު ބައެއްގެ ރައުޔު ހޯދުމުގެ ގޮތުން އެމެރިކާގެ ފެޑެރަލް ބިއުރޯ އޮފް އިންވެސްޓިގޭޝަންއާއި، ތަހުގީގުގައި ދިވެހި ފުލުހުން ހޯދާފައިވާ ހޯދުންތައް ހިއްސާކޮށް އެހީތެރިކަން ހޯދުމުންދާ ކަމަށް ފުލުހުން ބުނެފިއެވެ. 

މިއަދު ފުލުހުންގެ މީޑިއާ ގުރޫޕަށް ފޮނުވި މެސެޖެއްގައި ބުނީ އެފްބީއައި ޓީމުގެ އެހީ ހޯދުމުގެ އިތުރުން، ދިވެހި ފުލުހުންގެ ސީނިއަރ ތަހުގީގު ޓީމެއް މި މައްސަލަ ރިވިއު ކުރުމަށްޓަކައި ނ. ހޮޅުދޫއަށް ޒިޔާރަތްކޮށްމި މައްސަލައިގެ ތަހުގީގު މުރާޖައާކޮށް، އިތުރަށް ބަލަންޖެހޭ ކަންކަން ދެނެގަތުމުގެ މަސައްކަތް ކުރިއަށް ގެންގޮސްފައިވާ ކަމަށެވެ. 

މިއާއެކު ފުލުހުން ބުނީ ޒަކިއްޔާ މޫސާގެ މަރުގެ މައްސަލައިގެ ތަހުގީގު ދިވެހި ފުލުހުންގެ ޚިދުމަތުން އަދިވެސް ދަނީ ކުރަމުން ކަމަށެވެ. 

ފުލުހުން މީގެ ކުރިން މައުލޫމާތު ދިން ގޮތުގައި ޒަކިއްޔާގެ މަރުގެ މައްސަލަ އެ އިދާރާއަށް ރިޕޯޓް ކޮށްފައިވަނީ 10 ސެޕްޓެންބަރު 2024 ވަނަ ދުވަހުގެ ހެނދުނު 10:10 ހާއިރުއެވެ.

ޒަކިއްޔާގެ ހަށިގަނޑު ފެނުނީ އެ ގެއަށް ކުނި ނަގަން ވަތް މުނިސިޕަލް މުވައްޒަފުންނަށެވެ. ހަށިގަނޑު ފެނުނުއިރު ކަރުގައި ވަޅި އަޅާފައިވާއިރު، ކައިރީގައި ގިނަ އަދަދެއްގެ ލޭ ހުއްޓެވެ.

ފުލުހުންގެ ތަޙްޤީޤަށް ޒަކިއްޔާގެ ހަށިގަނޑު މާލެ ގެނެސް، ސާމްޕަލް ނެގުމަށްފަހު 12 ސެޕްޓެންބަރު 2024 ގައި ވަޅުލާފައިވެއެވެ. ވަޅުލާފައިވަނީ ޒަކިއްޔާގެ އުފަންރަށް ނ.ހޮޅުދޫގައެވެ.

އެ ހާދިސާއާއި ގުޅިގެން ފުލުހުން މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ބުނެފައިވާ ގޮތުން، ޒަކިއްޔާގެ މަރުގެ މައްސަލާގައި މީހެއްގެ އަތެއްވާކަމުގެ ހެއްކެއް އަދި މިހާތަނަށް ލިބިފައެއް ނުވެއެވެ. 

ނަމަވެސް އެރަށު މީހުންނާއި އާއިލާ މީހުން އަންނަނީ އެއީ މީހަކު ކުރި ކަމެއް ކަމަށް ބުނެ މައްސަލަ ރަނގަޅަށް ތަހުގީގު ކުރުމަށް ފުލުހުންނަށް ގޮވާލަމުންނެވެ.