ރ.އަތޮޅު ފައިނުގައި އެއާޕޯޓެއް އެޅުމަށް އަންނަ ފެބުރުއަރީމަހުގެ ތެރޭގައި އެމްޓީސީސީއާ ހަވާލުކުރައްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރ.އަތޮޅުގެ ރަށްތަކަށް ކުރައްވަމުންގެންދަވާ ޒިޔާރަތުގައި މިއަދު ފައިނަށް ވަދައިގެން އެރަށުގެ ރައްޔިތުންނާ ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ތަރައްޤީގެ މަގުގައި ފައިނުގެ ރައްޔިތުންކުރަމުންދާ އުއްމީދުތަކެއް އެބަހުރިކަމަށާއި އެގޮތުން ފައިނުގައި އެއާޕޯޓެއް އެޅުމަކީ ރަށު ރައްޔިތުން ކުރާ އުއްމީދެއް ކަމަށެވެ. ރައީސް ވިދާޅުވީ ފައިނު ރައްޔިތުންގެ އެ އުއްމީދުތައް ސަރުކާރުން ފުއްދައިދޭނޭކަމަށެވެ. އެގޮތުން އަންނަ ފެބުރުއަރީމަހުގެ ތެރޭގައި ފައިނުގައި އެއާޕޯތް އެޅުމުގެ މަސައްކަތް ސަރުކާރާ ރައްޔިތުން ހިއްސާވާ ކުންފުނި، އެމްޓީސީސީ އާ ހަވާލުކުރާނޭކަމަށް ރައީސް ވިދާޅުވިއެވެ.

ރައީސް ވިދާޅުވީ ފައިނު އެއާޕޯޓް އެޅުމުގެ މަސައްކަތް އަންނަމަހުގެ ތެރޭގައި އެމްޓީސީސީއާ ހަވާލުކުރުމުގެ އެއްބަސްވުމުގައި ސޮއިކުރެވިގެންދާއިރު، އެ މަޝްރޫޢުގެ އަމަލީ މަސައްކަތްތައްވެސް ވަރަށް އަވަހަށް ފެށިގެންދާނޭކަމަށެވެ. ރައީސް ވިދާޅުވީ ފެނާ ނަރުދަމާ ނިޒާމުގެ މަސައްކަތް ކޮށްފައިވާ ސަަރަހައްދު އެއާޕޯޓް އަޅަންއޮތް ސަރަހައްދާ ދިމާވާތީވެ ގެންނަންޖެހޭ ބަދަލުތައް ގެންނާނޭކަމަށެވެ. 

ރައީސް ވިދާޅުވީ ރައްޔިތުން އެދޭގޮތަށް އެއާޕޯޓް އެޅުމުގެ ކަންކަން ސަރުކާރުން ކުރިއަށްގެންދާނޭކަމަށާއި، ފައިނުގައި އެއާޕޯޓެއް އެޅުމަކީ، ފައިނު މީހުންގެ އިތުރުން ދާއިރާގެ ރައްޔިތުންގެވެސް އުއުްމީދުތަކާ ގުޅިފައިވާ އެއާޕޯޓެއްކަމަށެވެ. ފައިނު އެއާޕޯޓާއެކު ދާއިރާއަށް އިތުރު ކުރިއެރުންތައް ލިބި ވަޒީފާގެ ފުރުސަތުތައް އިތުރުވެގެންދާނޭކަން ފާހަގަކުރައްވަމުން ރައީސް ވިދާޅުވީ، މި ސަރަހައްދަށް އިތުރު އެއާޕޯޓްތައްވެސް އައުމަށް މަގުފަހިވެގެންދާނޭކަމަށެވެ.