ރައްޔިތުން އެދޭ ވެރިކަމެއް ކޮށް ނުދޭނަމަ ނޫނީ ނަތީޖާ ހިތިވާނެ ކަމަށް ވިދާޅުވެ ކުރީގެ ޑިފެންސް މިނިސްޓަރ މާރިޔާ އަހުމަދު ދީދީ ރައީސް ޑރ.މުޙައްމަދު މުޢިއްޒަށް ވަރުގަދަ އިންޒާރެއް ދެއްވައިފިއެވެ.
އެމްޑީޕީން ގާނޫނު އަސާސީގެ ދިފާއުގެ ނަމުގައި ސިލްސިލާކޮށް ބާއްވަމުންދާ ޖަލްސާ ތަކުގެ ތެރެއިން ރޭ މާލޭގައި ބޭއްވި ހަރުގެ ޖަލްސާގައި ވާހަކަ ދައްކަވަމުން މާރިޔާ ވިދާޅުވީ، އެމްޑީޕީ އަކީ ރައްޔިތުންގެ ވޯޓަށް ވަރަށް އިހްތިރާމްކުރާ ޕާޓީއެއް ކަމަށެވެ. އެހެން ކަމުން ރައްޔިތުންގެ ވޯޓުން ވެރިކަމަށް އިންތިޚާބު ކުރައްވާފައި ހުންނެވި ރައީސަކަށް ފަސް އަހަރުގެ ދައުރު ފުރިހަމަ ކުރުމުގެ ފުރުސަތު ދެއްވަން ޖެހޭ ކަމަށް ވިދާޅުވިއެވެ.
އެހެން ނަމަވެސް، އެމްޑީޕީން މިހާރު ކުރިއަށް ގެންދާ ދޮރުން ދޮރަށް ހަރަކާތުގެ ތެރެއިން އެކި ގޭގެއަށް ޒިޔާރަތް ކުރުމުން އެގޭގޭގެ ރައްޔިތުންގެ ފަރާތުން އިވެމުން ދަނީ އެހެން އަޑެއް ކަމަށާ، އެ ރައްޔިތުން ބުނަމުންދަނީ، މި ވެރިކަން ވައްޓާލާށޭ ކަމަށް މާރިޔާ ވިދާޅުވިއެވެ.
އެ ރައްޔިތުން އެހެން ބުނަމުން ދަނީ، ރައްޔިތުންގެ އަތުން ޓެކްސް ފައިސާ ނެގި ނަމަވެސް، އެ ރައްޔިތުންނަށް އާސަންދަ ނުލިބި، ބާނާ މަހަށް ފައިސާ ނުލިބި، ރާއްޖެ އަންނަ ފަތުރުވެރިންގެ ބޮލަކަށް 500 ޑޮލަރު މާރުކުރަންޖެހި، ރައްޔިތުން ފަގީރު ވަމުންދާތީ ކަމަށް އޭނާ ވިދާޅުވިއެވެ.
"ރައްޔިތުންގެ ފައިސާ އިން ޚަރަދުކުރާ ކަމަށް ވަންޏާ ރައްޔިތުންނާއި ވާހަކަ ދައްކައިގެން ރަނގަޅު ގޮތުގައި ކަންކަން ކޮށްދެއްވާށޭ، މިމަހު 31 ވަނަ ދުވަހު އަޅުގަނޑުމެން އެންމެން މި ނިކުންނަނީ މިއަޑު ރައީސް މުޢިއްޒަށް އިއްވަން ރައީސް މުޢިއްޒަށް ދަންނަވަން ނަސޭހަތް ލައިދެން މިހެންނޭ އަޑުތައް ހުރީ، ރައީސް މުޢިއްޒޭ ރައްޔިތުން އެދޭވެރިކަމެއް ރައްޔިިތުން އެދޭގޮތަށް ކޮށްދެއްވާށޭ އެހެން ނޫނިއްޔާ ނަތީޖާ ވަރަށް ހިތިވެގެން ހިގައިދާނެއޭ،"
މާރިޔާ އަހުމަދު ދީދީ
މީގެ އިތުރުންވެސް މާރިޔާ ވަނީ ރައީސް މުޢިއްޒު އިތުރުފުޅު ހައްދަވައި ރައްޔިތުންގެ ފައިސާއިން ވައްކަން ކުރައްވަމުންދާ ކަމަށް ތުހުމަތު ކުރައްވާފައެވެ.
އަދި ރައްޔިތުންގެ މަޖިލީހާއި ފަނޑިޔާރު ގޭގައިވެސް ހިނގަނީ ރައީސް މުޢިއްޒުގެ ބާރުކަމަށް ވިދާޅުވެ ސަރުކާރުގެ ސިޔާސަތު ތަކަށް ވަރަށް ބޮޑަށް ފާޑުވިދާޅުވެފައެވެ.
Advertisement
This content is created and paid for by advertisers and does not involve Voice Journalists
