ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ރައްޔިތުންގެ މަޖިލީހުގައި ދެއްވި ރިޔާސީ ބަޔާނުގައި ޤައުމަށް މަންފާކުރާނޭކަމެއް ހިމެނިފައެއް ނެތްކަމަށް އެމްޑީޕީ ސަރުކާރުގެ މާލީވަޒީރު އިބްރާހިމް އަމިރު ވިދާޅުވެއްޖެއެވެ.

އެމްޑީޕީ ހަރުގެ ޖަލްސާގައި ރިޔާސީ ބަޔާނާ ގުޅޭގޮތުން ވާހަކަދައްކަވަމުން އަމީރު ވިދާޅުވީ ރައީސް ޑރ.މުއިއްޒު މަޖިލީހުގައި މިއަދު ދެއްވީ ރިޔާސީ ބަޔާނެއްކަމަށް ޤަބޫލު ނުކުރައްވާ ކަމަށެވެ. އެމްޑީޕީ މެމްބަރުން މަޖިލީހުން ނެރުއްވައި ދެއްވި އެ ބަޔާނަކީ މިދިޔަ ފަހަރުވެސް ދެއްވި ބަޔާނުގެ ކޮޕީއެއްގެ ގޮތުގައި އަމީރު ސިފަކުރެއްވިއެވެ. އަމީރު ވިދާޅުވީ މިފަހަރުގެ ރިޔާސީ ބަޔާން ދެއްވިއިރު، މީގެކުރިން ދެއްވި ރިޔާސީ ބަޔާނުގައި ބުނި އެއްވެސްކަމެއް ހާސިލްވެފައިނުވާކަމަށެވެ.

އަމީރު ވިދާޅުވީ މި ސަރުކާރުގެ ދެވަނަ އަހަރު ފެށިގެންމިދަނީ އެއްވެސްކަހަލަ ރޭވުންތެރި ކަމެއްނެތި ކަމަށާއި، ފަސް އަހަރުގެ ސްޓްރެޓެޖިކް ޕްލޭނެއް ނުހެދޭ ބަޔަކަށް 20 އަހަރުގެ ޕްލޭނެއް ހެދޭނެ ހަމައެއް ނޯންނާނެ ކަމަށެވެ. އަމީރު ވިދާޅުވީ މިދިޔަ ރިޔާސީ ބަޔާނުގައި ސަރުކާރުގެ ހަރަދުތައް ކުޑަކުރާނޭކަމަށް ރައީސް ޑރ.މުހައްމަދު ވިދާޅުވިއިރު، ހަޤީޤީ މާނާގައި އެކަންކުރިތަން ފެނިގެން ނުދިޔަ ކަމަށެވެ.

ސިޔާސީ މަޤާމުތައް މަދުކޮށް އެއަދަދު 700 އަށްވުރެ ބޮޑުނުވާނޭކަމަށް ވިދާޅުވިއިރު، މި ސަރުކާރުގެ ސިޔާސީ މަގާމުތައް 3،000 ހާހުން މައްޗަށް އަރައިގެން ގޮސްފައިވާކަން އަމީރު ފާހަގަކުރެއްވިއެވެ. 

މީގެ ކުރީ އަހަރު ދެއްވި ރިޔާސީ ބަޔާނުގައި ސަރުކާރު އޮފީސް އިމާރާތެއް ހުޅުމާލޭގައި އަޅަން ފަށާނޭކަމަށް ވިދާޅުވިއިރު، އަހަރެއް ފާއިތުވެގެންދިޔައިރު އެކަންވެސް ކޮށްފައިނުވާކަމަށެވެ. އަދި ދެފުށްފެންނަ ގޮތަށް ސަރުކާރުގެ ކަންކަން ކުރައްވާނޭކަމަށް ވިދާޅުވިއިރު، މިހާތަނަށް އުޅުއްވީ ނޫސްވެރިންނާވެސް ފިއްލަވައިގެންކަމަށް އަމީރު ވިދާޅުވިއެވެ. 

އަމީރު ވިދާޅުވީ މި ވޭތުވެދިޔަ އަހަރެއްހާ ދުވަހުގެ ތެރޭގައި ބޭރުގެ އިންވެސްޓަރުންނަށް ރާއްޖޭގައި އިންވެސްޓްކުރުމުގެ ޝައުގުވެރިކަން ގެއްލިގެންދިޔައިރު، ޤައުމީ އުފެއްދުންތެރިކަމުގެ ނިސްބަތްވެސް މިދިޔަ އަހަރެއްހާ ދުވަހުގެ ތެރޭގައި ދަށަށް ގޮސްފައިވާކަން އަމީރު ފާހަގަކުރެއްވިއެވެ. މިގޮތުން ހާއްސަ ގޮތެއްގައި މަސްވެރިކަމުގެ ސިނާއަތުގެ އުފެއްދުންތެރިކަން  ވަރަށްބޮޑަށް ދަށަށްގޮސް މަސްކާރުހާނާގެ މަސައްކަތް ދަށަށްގޮސްފައިވާކަމަށް އަމީރު ވިދާޅުވިއެވެ.