ގއ. ވިލިނގިލީގައި ބުދަ ދުވަހު ނިޔާވި މާބަނޑު އަންހެން މިީހާއާއި އޭނާގެ ދަރިފުޅު އިތުރު ފަރުވާއަށް މާލެ ގެނައުމަށް އެއަރ އެމްބިއުލާންސ އޮޕަރޭޓް ކުރީ ދެމައިންނަށް ބޭނުންވާ އާލާތްތަކާ އެކު ކަމަށް މޯލްޑިވިއަން އިން ބުނެފިއެވެ.

ސިޒޭރިއަން ހެދުމަށް ފަހު އިތުރު ފަރުވާއަށް އިތުރު ފަރުވާ ނުލިބި ލަސްވެގެން ނިޔާވެފައި ވަނީ، ގއ ވިލިނގިލީ ޒަމާނީވިލާ ޝިއުނާ ތައުފީގާއި ޝިއުނާ ވިހެއި އޭނާގެ 3 ވަނަ ދަރިފުޅެވެ.

އެދެމައިން ނިޔާވީ، އެއަރ އެމްބިއުލާންސްގައި މަންމައާއި ދަރިފުޅަށް ބޭނުންވާ ވަރަށް އޮކްސިޖަން ނެތުމުން ބަލިމީހާ ގޮވައިގެން ނުފުރި ލަސްވުމުގެ ސަބަބުން ކަމަށް ވިލިނގިލީ ކައުންސިލްގެ މެންބަރަކު ވަނީ ސޯޝަލް މީޑިއާގައި ލިޔުއްވާފައެވެ.

Advertisement

މި ހާދިސާއާ ގުޅިގެން މޯލްޑިވިއަނުން އެކްސްގައި ކުރި ޕޯސްޓެއްގައި ބުނެފައިވަނީ، އެއަރ އެމްބިއުލާންސް އޮޕަރޭޓްކޮށްފައިވަނީ މޯލްޑިވްސް އިމަރޖެންސީ މެޑިކަލް ސަރވިސަސްއާއި ގުޅިގެން، ދެމައިން މެޑިކަލް އިވެކުއޭޓް ކުރުމަށް ބޭނުންވާ އާލާތްތަކާއެކު ޕްރޮޓޮކޯލްގެ ދަށުން ކަމަށެވެ.

އަދި މި ހިތާމަވެރި ހާދިސާގައި ނިޔާވި އަންހެންމީހާ އަށާއި ދަރިފުޅަށް ސުވަރުގޭގެ ދާއިމީ ނިޢުމަތް ލެއްވުން އެދި ދުޢާކުރާ ކަމަށާއި، އާއިލާގެ ފަރާތްތަކަށް ކެތްތެރިކަން ދެއްވުން އެދި ދުޢާކުރާ ކަމަށްވެސް މޯލްޑިވިއަންގެ ފަރާތުން ބުނެފައިވެއެވެ.

"ވޮއިސް" އަށް މަޢުލޫމާތު ދެމުން ގއ. ވިލިނގިލީގެ ރައްޔިތަކު ބުނެފައިވަނީ، ބަނޑަށް 8 މަސް ފުރުނު އެ ބަލިމީހާ ސިޒޭރިއަން ހަދައި، އޭގެ ފަހުން ހޭނާރައިގެން ދަރިފުޅާއެކު ދެމީހުން ވެންޓިލޭޓަރަށް ލާންޖެހުނު ކަމަށެވެ. އަދި ސިޒޭރިއަން ހެދި ވަގުތުވެސް ބަލިމީހާ ހުރީ ވަރަށް ބޮޑަށް އަރިދަފުސް ރޯގާ ޖެހިފައި ކަމަށްވެސް މަޢުލޫމާތު ލިބިފައިވެއެވެ. 

މި ހާދިސާއާ ގުޅިގެން އިތުރު ފަރުވާއަށް އެ ދެމައިން މާލެ ގެންދިއުމަށް ލަސްވުމުން ރަށުގެ ބައެއް ރައްޔިތުން ހޮސްޕިޓަލް ކުރިމަތީގައި އަޑުގަދަކޮށް ނުރުހުންވުން ފާޅުކޮށްފައިވާ ކަމަށްވެސް މަޢުލޫމާތު ލިބިފައިވެއެވެ.

މި މައްސަލަ ހެލްތު މިނިސްޓްރީން ވެސް އަންނަނީ ބަލަމުންނެވެ.