މިއަދު ކުރިއަށްދިޔަ 12 ރަށެއްގެ ލޯކަލް ކައުންސިލްތަކުގެ ބައި-އިލެކްޝަން އަދި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަނުގެ މެޖޯރިޓީ ގޮނޑިތައް ވެރިކަން ހިނގާ ޕީއެންސީން ކާމިޔާބުކޮށްފިއެވެ.

ބައި އިލެކްޝަނުގެ ވަގުތީ ނަތީޖާތައް ދައްކާގޮތުން 13 ގޮނޑީގެ ތެރެއިން ޕީއެންސީން ވަނީ 9 ގޮނޑި ނަގާފައެވެ. އިންތިހާބުގައި އިދިކޮޅު މައި ޕާޓީ، އެމްޑީޕީއަށް 2 ގޮނޑި ލިބުނުއިރު، އަމިއްލަގޮތުން ވާދަކުރި ދެ ކަނޑިޑޭޓަކުވެސް އިންތިހާބު ކާމިޔާބުކޮށްފައެވެ. އިންތިހާބުގައި ޕީއެންސީން ނެގި ގޮނޑިތަކުގެ ތެރޭގައި ހިމެނެނީ، ނ.ލަންދޫ ކައުންސިލް މެމްބަރުގެ ގޮނޑީގެ އިތުރުން، ލ.ގަމު، ނ.ފޮއްދޫ، ގއ.ކަނޑުހުޅުދޫ، ހދ.ހިރިމަރަދޫ، ތ.ބުރުނީ، ބ.ގޮއިދޫ، އަދި ރ.އިންނަމާދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ މެމްބަރުންގެ ގޮނޑިތަކެވެ. އެމްޑީޕީން ކާމިޔާބުކުރީ އދ.ހަންޏާމީދުއާއި ނ.މިލަދޫ އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑިތަކެވެ. 

މިނިވަން ކެނޑިޑޭޓުންގެ ގޮތުގައި ކުރިމަތިލީ ފަރާތްތަކުން ކާމިޔާބުކުރީ، ހދ.މަކުނުދޫ އަދި ދ.ހުޅުދެލި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ގޮނޑިތަކެވެ.

Advertisement

އިލެކްޝަންސް ކޮމިޝަނުން ބުނީ ވޯޓުލުމުގެ ސުންގަނޑި ހަމަވިއިރު ވޯޓުލާފައިވަނީ ޖުމްލަ 6،275 މީހުން ކަމަށެވެ. އެއީ ވޮޓުލާންޖެހޭ މީހުންގެ 55.4 އިންސައްތައެވެ. ވޮޓު ނުލައި 5،050 މީހުން ތިބިއިރު، އެއީ 44.59 އިންސައްތައެވެ. މި އިންތިހާބުގައި ވޯޓުލާފައިވަނީ ގިނައިން އަންހެނުންނެވެ. ވޯޓުލީ އަންހެނުންގެ އަދަދު 3،292 ގައި އުޅޭއިރު، ވޮޓުލީ ފިރިހެނުންގެ އަދަދަކީ 2،983 އެވެ. މި ބައި އިެލކްޝަނުގައި ވޯޓުލުމުގެ ހައްގު ލިބިފައިވާ މީހުންގެ އަދަދަކީ 11،325 އެވެ.