ސަރުކާރުން ފޮނުވި ކަދުރު ބެހުމަށް ހއ.އުލިގަމު ކައުންސިލުން ކުރި ފުރަތަމަ ކުރި އިއުލާނަށް ރައްޔިތުންގެ ފަރާތުން މާބޮޑު ތަރުހީބެއް ނުލިބުމުން، އަނެއްކާވެސް ކަދުރު ބެހުމަށް އެރަށު ކައުންސިލުން އިއުލާނުކޮށްފިއެވެ.

އުލިގަމަށް ބެހުމަށް ސަރުކާރުން ފޮނުވީ 18 ޕަކެޓް ކަދުރެވެ. ކަދުރު ބެހުމަށް ފުރަތަމަ ކުރި އިއުލާނަށްފަހު، އަދިވެސް 13 ޕަކެޓް ކަދުރު އެބައޮތްކަމަށް ކައުންސިލުން ބުނެއެވެ. އުލިގަމް ކައުންސިލުން ބުނީ ކަދުރު ބޭނުންވާ ފަރާތްތަކުން މާދަމައިން ފެށިގެން އަންނަ އާދިއްތަ ދުވަހުގެ ނިޔަލަށް ރަސްމީ ބަންދުނޫން ކޮންމެ ދުވަހެއްގެ ހެނދުނު 9 އަކުން މެންދުރުފަހު 2 ޖެހުމާ ދެމެދު އައިޑީކާޑާއެކު ކަރަންޓް މީޓަރު ނަމްބަރު ކަށަވަރުވާފަދަ ލިޔުމެއް ހިފައިގެން އައުމަށް އެދިފައެވެ.

އުލިގަމް ކައުންސިލުން ބުނީ ކަދުރު ދޫކުރެވޭނީ އިސްލާމިކް މިނިސްޓްރީން އަންގާފައިވާގޮތަށް މީހުން ދިރިއުޅޭ ގޭބިސީތަކުގެ ތެރެއިން ކަދުރުބަލާ ހާޒިރުވާ ތަރުތީބުން ކޮންމެ ގޭބިސީއަކަށް ކަދުރު ޕެކެޓެއްގެ މަގުން 13 ޕަކެޓް ކަދުރު ހުސްވަންދެން ކަމަށެވެ.

އިސްލާމިކް މިނިސްޓްރީން މިދިޔަ ބުދަދުވަހު، އެކްސްގައި ކުރި ޕޯސްޓެއްގައި ބުނެފައިވަނީ، މިހާތަނަށް 102،712 ގޭބިސީއަށް 22،163 ކަދުރު ޕަކެޓް ބަހާފައިވާކަމަށެވެ. އެއީ މާލެ، ހުޅުމާލެ އަދި ވިލިމާލޭގެ 46،251 ގޭބިސީއަށް ހަދިޔާކުރި 11،375 ޕަކެޓް ކަދުރާއި، ކައުންސިލްތަކުން 56،461 ގޭބިސީއަށް ދޫކުރި 10،788 ޕަކެޓް ކަދުރެވެ.

ކަދުރު ބެހުމާ ގުޅޭގޮތުން އިސްލާމިކް މިނިސްޓަރު ޑރ.މުހައްމަދު ޝަހީމް ވިދާޅުވެފައިވަނީ، ސަޢޫދީ އަރަބިއްޔާގެ ސަރުކާރުން ހަދިޔާކުރި  ރޯދައިގެ ކުރިން ކަދުރު ބަހާ ނިންމާނޭކަމަށެވެ. ސައުދީ ސަރުކާރުން ވަނީ މިފަހަރުވެސް 50 ޓަނުގެ ކަދުރު ހަދިޔާކޮށްފައެވެ. ޑރ.ޝަހީމް ވިދާޅުވީ، މި ފަހަރު ކަދުރު ބެހުމުގައި މިސްކިތްތަކުގައި އިފްޠާރު ޕްރޮގްރާމް ހިންގަން ބޭނުންވާ ޖަމިއްޔާތަކަށް ވެސް ކަދުރުން ބައެއް ދޭނޭ ކަމަށެވެ.

ރޯދަމަހު ސައުދީން ހަދިޔާކުރާ ކަދުރަށް ގިނަ ބައެއްގެ ސަމާލުކަން ލިބިގެންދާއިރު، ގިނަ ބަޔަކު އެ ކަދުރަށް އިންތިޒާރުކުރާކަން ފާހަގަކޮށްލެވެއެވެ. މި ފަހަކަށް އައިސް ބައެއް އަހަރުތަކުގައި ކަދުރު ލިބިފައިވަނީ ރޯދަމަސް ނިމެން ކައިރިވެފައިވަނިކޮށެވެ.